قوعام • 02 جەلتوقسان، 2022

جولدا قالىپ قويعان تۇركيالىق جۇرگىزۋشى قۇتقارىلدى

تۇركيادان كەلگەن جۇك تاسىمالداۋشى تجم كۇرەجول پۋنكتىنەن كومەك سۇرادى، دەپ حابارلايدى Egemen.kz.

1 جەلتوقسانعا قاراعان ءتۇنى پوليتسەيلەر توڭىپ قالعان جۇك تاسىمالداۋشىنى وسكەمەن-سەمەي تاسجولىندا ورنالاسقان «پريۆولنوە» كۇرەجول مەديتسينالىق-قۇتقارۋ پۋنكتىنە الىپ كەلدى. ونىڭ جۇك كولىگى جولدا بۇزىلىپ قالعان ەكەن.

«شىعىس قازاقستان وبلىسىنداعى 34 گرادۋستىق ايازعا بايلانىستى جۇك تاسىمالداۋشى مىنگەن «MAN» جۇك كولىگىنىڭ وتىن جۇيەسى ىستەن شىقتى. ەر ادام ايازدى كۇنى سۋىق جۇك كولىگىندە بىرنەشە ساعات وتكىزدى، ونى پوليتسيا قىزمەتكەرلەرى جولدان تاۋىپ الىپ، تەكسەرۋ جانە مەديتسينالىق كومەك ءۇشىن تجم كۇرەجول پۋنكتىنە جەتكىزدى»، دەلىنگەن تجم حابارلاماسىندا.

كۇرەجول بويىنداعى پۋنكت بريگاداسىنىڭ قىزمەتكەرلەرى جۇرگىزۋشىنىڭ اۋا رايىنىڭ قولايسىزدىعىن سەزىنبەۋى ءۇشىن قولدان كەلگەننىڭ ءبارىن جاسادى. قۇتقارىلعان ادام دارىگەرلىك تەكسەرۋدەن ءوتتى، وعان قاجەتتى كومەك كورسەتىلدى. اۋرۋحاناعا جاتقىزۋ قاجەتتىلىگى تۋىندامادى.

كەلەسى كۇنى ءسونىپ قالعان كولىكتى جوندەي الماعاندىقتان، جۇرگىزۋشى تۇنگە قاراي تاعى دا كۇرەجول پۋنكتىنە ورالدى. بۇگىن تاڭەرتەڭ كولىكتى وتالدىرىپ، جۇرگىزۋشى جولعا شىقتى.

ەلىمىزدىڭ كۇرەجول قىزمەتى قىرىق كۇرەجول مەديتسينالىق-قۇتقارۋ پۋنكتتەرىنەن تۇرادى. ولار ەلىمىزدەگى اۆتوجولداردىڭ اۆاريالىق-قاۋىپتى ۋچاسكەلەرىندە ورنالاسقان.

تمقپ-ءنىڭ نەگىزگى مىندەتىنە جكو زارداپ شەككەندەرگە شۇعىل مەديتسينالىق كومەك كورسەتۋ جاتادى. قىس مەزگىلىندە كمقپ بريگادالارى جولداردا تۇرىپ قالعان كولىكتەردەگى ادامدارعا كومەككە كەلەدى، قار قۇرساۋىندا قالعان جۇرگىزۋشىلەر مەن جولاۋشىلارعا ارنالعان جىلىتۋ پۋنكتتەرى رەتىندە پايدالانىلادى، قاجەتتى مەديتسينالىق كومەك كورسەتەدى.

قىستىڭ العاشقى ايىنىڭ وزىندە كۇرەجول پۋنكتتەرى بريگاداسىنىڭ كۇشىمەن اقاۋى بار اۆتوكولىكتەردەن 40-تان استام ادام ەۆاكۋاتسيالاندى. بارلىق جولاۋشىلار مەن جۇرگىزۋشىلەر ارنايى جىلىتۋ پۋنكتتەرىنە جەتكىزىلدى.

جول بويىنداعى پۋنكتتەردىڭ جۇمىسىنىڭ ارقاسىندا تمقپ جاۋاپكەرشىلىك ايماعىندا كەز-كەلگەن جۇرگىزۋشىگە نەمەسە جولاۋشىعا شۇعىل جاعدايدا تەگىن بىلىكتى مەديتسينالىق كومەك الۋعا كەپىلدىك بەرىلەدى.