سونىمەن كەلەشەك ۇرپاقتىڭ دەنساۋلىعىن ساقتاۋعا باعىتتالعان باستامالاردىڭ قاي-قايسىسى قولداۋ مەن نازار اۋدارۋدى قاجەت ەتەتىندىكتەن, الماتى قالاسىنداعى №52 جالپى ءبىلىم بەرەتىن مەكتەپتە باس اسپازبەن بىرگە وتكەن شەبەرلىك ساباعىنا كەلدىك. بۇل جولى «سالاۋاتتى تاماقتانۋ مەكتەبى» ءبىلىم بەرۋ باعدارلاماسى اياسىندا وتكەن دارىسكە 3-سىنىپ وقۋشىلارى اتا-انالارىمەن بىرگە قاتىستى.
ايتقانداي, ءىس-شاراعا 2030 جىلعا دەيىن دۇنيەجۇزىندەگى 50 ميلليونعا دەيىن بالانى دۇرىس تاماقتانۋعا داعدىلاندىرۋعا باستاماشى بولىپ وتىرعان «نەستلە قازاقستان» مەن الماتى قالالىق ءبىلىم بەرۋدەگى جاڭا تەحنولوگيالار عىلىمي-ادىستەمەلىك ورتالىعى ۇيىتقى بولدى.
الماتى قالالىق ءبىلىم باسقارماسىنىڭ ءبىلىم بەرۋدەگى جاڭا تەحنولوگيالار قالالىق عىلىمي-ادىستەمەلىك ورتالىعىنىڭ ءبولىم باسشىسى تاتيانا ەجوۆا بالالاردىڭ دۇرىس تاماقتانۋعا ادەتتەندىرۋ تۋرالى ايتا كەلە: «باعدارلاما بارىنشا جەڭىل بولعاندىقتان, بالالار نەگىزگى قورەكتىك زاتتار, پايدالى تاعامدار, دارۋمەندەر, ديەتا قۇرۋ نەگىزدەرىن بىلۋگە ىقىلاسپەن ۇمتىلادى», دەيدى.
ال «نەستلە» ءبىلىم بەرۋ باعدارلامالارى ءبولىمىنىڭ باسشىسى, پەداگوگيكا عىلىمدارىنىڭ كانديداتى الەكساندرا ماكەەۆا «سالاۋاتتى تاماقتانۋ مەكتەبى» ءبىلىم بەرۋ باعدارلاماسى ءوزىنىڭ 10 جىلدىعىنا قادام باسىپ كەلە جاتقانىنا توقتالا كەلە: «وسى اۋقىمدى جوبانىڭ اياسىندا تاعى ءبىر قوسىمشا باستامانى قولعا الدىق. بالالار كونكۋرس اياسىندا ساباقتان تىس ۋاقىتتا مەكتەپتە نەمەسە ۇيدە باس اسپازدار جۇرگىزگەن ونلاين شەبەرلىك-دارىستەرى ارقىلى دەنساۋلىققا پايدالى تاعامدار ازىرلەپ, ارنايى پلاتفورماعا ورنالاستىرادى. بىرىنشىدەن, بۇل تاعامداردىڭ دايىندالۋى وتە قاراپايىم, ەكىنشىدەن وتە پايدالى, ۇشىنشىدەن ءدامدى ءارى كوڭىلدى. كۋلينارلىق بايقاۋ باعدارلامانىڭ ءداستۇرلى فورماتىنا اينالدى. كەيىن بالالارعا ءومىر بويى قاجەت بولاتىن ويىن تۇرىندەگى كونكۋرس جەلتوقسان ايىندا اياقتالادى. ارينە, جەڭىمپازدار ماراپاتتالادى. ەڭ قىزىعى, باعدارلاماعا تارتىلعان وقۋشىلار ۇيدە اكە-شەشەلەرىن دۇرىس تاماقتانا بىلۋگە ۇيرەتەدى ەكەن», دەيدى.
№52 جالپى ءبىلىم بەرەتىن مەكتەپتىڭ باستاۋىش سىنىپ مۇعالىمى راميلا تەنەشەۆا: «مەكتەبىمىزدىڭ جوباعا العاشقىلاردىڭ ءبىرى بولىپ قوسىلعانىن ماقتان تۇتامىز. اسىرەسە, ءبىز ءۇشىن وتە ماڭىزدى جەتىستىك – مەكتەپ پەن وتباسىنىڭ بايلانىسىن اتاپ وتكىم كەلەدى. اتا-انالار باعدارلاما ماڭىزدىلىعىن جوعارى باعالايدى. ءتىپتى وسىنىڭ ارقاسىندا ۇيدەگى ادەتتەرىن پايدالى جاعىنا وزگەرتكەندەرىن مويىندادى», دەيدى.
سونىمەن قازان ايىنان بەرى استانا مەن الماتى قالالارىنىڭ مەكتەپتەرىندە ءبىلىم بەرۋدەگى جاڭا تەحنولوگيالار عىلىمي-ادىستەمەلىك ورتالىعىنىڭ قولداۋىمەن, باستاۋىش سىنىپ وقۋشىلارىنا ارنالعان اسپازدىق شەبەرلىك بايقاۋلارى ءجۇرىپ جاتقانىن ايتا كەتەيىك. دەگەنمەن, بۇل جەردەگى باستى وقيعا – بايقاۋ ەمەس, كەلەر ۇرپاقتىڭ دەنساۋلىعى.
