قوعام • 27 قاراشا، 2022

جۇمىسشىلارعا سۇرانىس كوپ

45 رەت كورسەتىلدى

ەلىمىزدىڭ بارلىق ايماعىنداعى حالىقتى جۇمىسپەن قامتۋ ورتالىقتارى جىل سايىن بوس جۇمىس ورىندار جارمەڭكەسىن ۇيىمداستىرۋدى داعدىعا اينالدىرعالى قاشان. سەبەبى جارمەڭكەدە جۇمىس بەرۋشى مەن جۇمىسشى بازبىرەۋدىڭ نۇسقاۋىنسىز تىكەلەي جۇزدەسىپ، كەڭەسىپ، بىرەر كۇندە-اق ەڭبەك شارتىن جاساسا بولادى. جۋىردا استانا قالاسىنداعى جاستار سارايىندا ونىنشى رەت ۇيىمداستىرىلعان جارمەڭكەدە دە وسى تارتىپپەن 43 جۇمىس بەرۋشى 669 بوس جۇمىس ورنىن ۇسىندى.

نارىقتاعى جاعدايعا، قوعامنىڭ سۇ­رانىسىنا قاراي جىل سايىن بەلگىلى ءبىر ماماندىقتارعا سۇرانىس ارتاتىنى بەلگىلى. سوعان قاراماستان بوس جۇمىس ورىن­دار جارمەڭكەسىندە اڭعارعانىمىز، جۇمىسشى ماماندىقتارعا سۇرانىس ەسە­لەپ ارتپاسا، كەمىمەيدى. بۇعان قوسا جۇ­مىس بەرۋشىلەر تاربيەشى، كاسسير، فارما­تسەۆت، سلەسار، ەسەپشى، ساۋلەتشى»، ينجەنەر-جوبالاۋشى، جۇرگىزۋشى، ساتۋ جونىندەگى مەنەدجەر، قارجى كەڭەسشىسى، بانك مەنەدجەرى سىندى مامانداردى ىزدەپ جۇرگەنىن بىلدىك. جارمەڭكەنىڭ تاعى ءبىر ەرەكشەلىگى، مۇگەدەكتىگى بار، اتا-اناسىنىڭ قامقورلىعىنسىز قالعان ەرەسەك بالالارعا جانە پروباتسيا قىزمەتىنىڭ ەسەبىندە تۇرعان جانە قىلمىس جاساپ، جازاسىن وتەپ كەلگەندەرگە دە جۇمىس ۇسىنىلدى.

استانا قالاسى اكىمدىگى حالىقتى جۇمىسپەن قامتۋ ورتالىعىنىڭ جۇ­مىس بەرۋشىلەرمەن ءوزارا بايلانىس ءبولى­مىنىڭ باسشىسى باقىت راقىشەۆا بوس جۇمىس ورىندار جارمەڭكەسىن كەڭ كولەم­دە ۇيىمداستىرۋ ءۇشىن الدىمەن اقپارات­تاندىرۋ جۇمىسىنا باسىمدىق بەرۋ ماڭىزدى ەكەنىن ايتتى.

– بوس جۇمىس ورىندار جارمەڭكەسى تۋرالى ءبىز الدىن الا باق قۇرالدارىندا، الەۋمەتتىك جەلىدە، جەرگىلىكتى اكىمدىك پەن حالىقتى جۇمىسپەن قامتۋ ورتالىعىنىڭ رەسمي پاراقشالارىندا حابارلاندىرۋ جاريالادىق. قالادا وسىعان دەيىن 9 مارتە جارمەڭكە ۇيىمداستىرىلىپ، 480 جۇمىسسىز ازامات جۇمىس بەرۋشىمەن سۇحباتتاسۋعا بارسا، 276 ادام وزىنە قو­لاي­لى تۇراقتى جۇمىس تاپتى. ارينە، وسىن­داي اۋقىمدى ءىس-شارادان كەيىن استا­نا قالاسى جۇمىسپەن قامتۋ ورتالىعى­نىڭ ماماندارى جۇمىس بەرۋشى مەن جۇ­مىسسىز ازاماتتارعا حابارلاسىپ، جاع­دايدى باعامداپ وتىرادى. قاي سالادا بولسىن ءوزىنىڭ ءىسىن جەتىك بىلەتىن، شەبەر، تالاپتى ماماندارعا سۇرانىس ءار كەز جوعارى. دەگەنمەن قازىر ساۋدا سالاسىندا كاسسير، ساتۋشى، ماركەتولوگ، سول سەكىلدى قۇرىلىس سالاسىندا ينجەنەر، IT جانە تەحنيكانىڭ ءتىلىن بىلەتىن ماماندار تاپشى. تامىز ايىنان بەرى وتكەن ءار جارمەڭكەگە شامامەن 200-دەن 400 ادامعا دەيىن كەلەتىن. بۇل جولى دا جارمەڭكەگە كەلەتىن تۇرعىنداردىڭ ۇلەسى وسىعان جەتەعابىل بولادى دەپ وتىرمىز، – دەيدى ول.

جارمەڭكەگە «ەكى قولعا ءبىر كۇرەك تابىلسا» دەگەن نيەتپەن كەلگەندەر ءار جۇمىس بەرۋشىنىڭ الدىنا بارىپ سۇحباتتاسىپ، بايلانىس ءنومىرىن سۇراپ ۇزاق ءجۇردى. بۇل كۇنى قىز-كەلىنشەكتەردىڭ باسىم كوپشىلىگى 160 مىڭ تەڭگەدەن جوعارى ەڭبەكاقى ۇسىناتىن جۇمىس ىزدەسە، ەر ازاماتتار شامامەن 200 مىڭ تەڭگە نەمەسە ودان جوعارى جالاقىعا جۇمىس ىستەۋگە دايىن ەكەنىن بايقاتتى. وسى مەزەتتە ءبىز استانا قالاسى پوليتسيا دەپارتامەنتىنىڭ جەدەل قيمىلدايتىن ارنايى جاساعىنا ەر ازاماتتار ىزدەپ جاتقانىن بىلدىك. ارينە، ارنايى جاساققا ەكىنىڭ ءبىرى قابىلدانبايتىنى تۇسىنىكتى. جۇمىسقا ورنالاسۋدى كوزدەگەندەرگە قۇلاققاعىس رەتىندە ايتار بولساق، ارنايى جاساقتىڭ قۇرامىنا وقۋ ورنىن تامامداعان، اسكەري بيلەتى بار، بويى 1،75 سانتيمەتردەن جوعارى جانە دەنساۋلىعىندا كىناراتى جوق ازاماتتار قابىلدانادى. وندا دا ۇمىتكەر 3 اي دايىندىق مەرزىمىنەن ءوتىپ، ءوزىن جاقسى جاعىنان كورسەتۋگە ءتيىس. بيىل تامىز ايىنان بەرگى جارمەڭكەدە جەدەل قيمىلدايتىن ارنايى جاساقتىڭ قۇرامىنا 6 ادام قابىلدانعان.

ءار سالاداعى جۇمىس بەرۋشى تاجى­ري­بەلى مامانداردى بايقاسا، جۇمىسقا كۇنى ەرتەڭ كەلۋىن وتىنەدى ەكەن. مىسا­لى، بۇرىن كوممۋنالدىق قىزمەت سالاسىندا جۇمىس ىستەگەن اينۇر قايىر­گەلدى «استاناەنەرگوسبىت» جشس قىزمەت­كەرلەرى جۇمىسقا شاقىرىپ وتىرعانىن ايتتى.

– بوس جۇمىس ورىندار جارمەڭكەسى تۋرالى حابارلاندىرۋدى الەۋمەتتىك جەلىدەن وقىپ ءبىلىپ كەلدىم. بۇرىن «استانا سۋ ارناسى» سەرىكتەستىگىندە مامان­دىعىم بويىنشا 10 جىل جۇمىس ىستەدىم. ەسەپشى ماماندىعىن وقىعان سوڭ، بۇگىن «استاناەنەرگوسبىت» جشس جانە ەكىنشى دەڭگەيلى بانككە كەڭەسشى بولسام دەپ ءوتىنىش قالدىردىم. ەسەپ-قيساپپەن بۇرىننان اينالىسقان سوڭ، ەرتەڭ «استاناەنەرگوسبىت» مەكەمەسىنە 10.00-دە باراتىن بولىپ كەلىستىك. جالاقىسى 160 مىڭ تەڭگە ەكەن. ءوزىم اۋەلدەن بەسكۇندىك جۇمىس بولسا ەكەن دەپ ەدىم، سەرىكتەستىك وكىلدەرى مەنىڭ وتىنىشىمە كەلىسىپ وتىر، – دەيدى اينۇر.

جارمەڭكەدە «استانا Halal Food» اسحانا جەلىسىنە دە بىرنەشە مامان قاجەت ەكەنىن بىلدىك. قازىردە اسحانانىڭ استانا قالاسى بويىنشا 5 نۇكتەسى بار بولسا، ەندى جەلتوقساندا 6-شى اسحانا اشىلادى ەكەن. سەرىكتەستىك قىزمەتكەرلەرى، جۇمىستىڭ ءتيىمدى، جالاقىسى كوڭىلگە قونىمدى ەكەنىن ايتۋدا. سونداي-اق جارمەڭكەدە قوناقۇي ىسىنە دە جۇمىسشىلار قاجەت ەكەنىن بىلدىك. ىزىنشە جارمەڭكەگە استانا قالاسى اكىمدىگىنىڭ حالىقتى جۇمىسپەن قامتۋ ورتالىعىنىڭ ديرەكتورى ازامات بايتاسوۆ كەلگەن سوڭ، قالا تۇرعىندارىن جۇمىسپەن قامتۋدىڭ بەلسەندى شارالارىنا تارتۋ جونىندە بىرنەشە سۇراقتىڭ جاۋابىن انىقتاۋعا تىرىستىق.

– قالا تۇرعىندارىن جۇمىسپەن قامتۋعا ارنالعان بىرنەشە باعدارلاما بار. جىل باسىنان ورتالىققا 26 مىڭنان اسا ازامات جۇگىنسە، 23 مىڭ تۇرعىن جۇمىسپەن قامتۋدىڭ بەلسەندى شارالارىنا جولداندى. ونىڭ ىشىندە 7 400 ادام تۇراقتى جۇمىسقا ورنالاسسا، جاس­تار تاجىريبەسىنە – 900، قوعامدىق جۇمىستارعا 2 600 ازامات جولداما الدى. بۇعان قوسا بيىل كاسىپتىك باعدار بەرۋ باعدارلاماسى شەڭبەرىندە 9 500 مەكتەپ وقۋشىسى كاسىپتىك باعدار بويىنشا قىزمەت الادى. ياعني وسى ارقىلى وقۋشىلار قانداي ماماندىققا بەيىم ەكەنىن بىلەدى. Enbek.kz ەلەكتروندى ەڭبەك بيرجاسىنىڭ دا تيىمدىلىگى مول. وندا جۇمىس بەرۋشى مەن جۇمىسشىلار تىكەلەي بايلانىس ورناتىپ وتىر. جۇمىس بەرۋشى مەن جۇمىسشى ەڭبەك بيرجاسىنا تىركەلىپ، جۇمىسپەن قامتۋ ورتالىعىنا قايىرىلماي-اق كەزدەسە بەرەدى. وسىن­داي ەسەلى ەڭبەكتىڭ ناتيجەسىندە تۇرعىن­داردىڭ تسيفرلىق ساۋاتتىلىعى ارتىپ كەلەدى، – دەيدى ورتالىق ديرەكتورى.

ارينە، بوس جۇمىس ورىندار جار­مەڭ­كەسىنە بىرنەشە مارتە بارىپ، وزىنە قولايلى جۇمىس تاپپاي جۇرگەن تۇر­عىندار دا جوق ەمەس. مىسالى، جار­مەڭكەگە ەكىنشى رەت كەلگەن قالا تۇرعىنى مانزۋرا قوشىمبەك ءوزىنىڭ وڭ جامباسىنا كەلەتىن بىرنەشە جۇمىسقا تۇيىندەمە قالدىرىپتى.

– جارمەڭكەگە بىرەر اپتا بۇرىن كەلگەنمىن. ويتكەنى اۋەلدەن مامان­دىعىما ساي ەسەپشىنىڭ كومەكشىسى بولىپ جۇمىسقا ورنالاسۋدى كوزدەگەن ەدىم. قازىر سۋپەرماركەت، اسحانالارعا كاسسير قاجەت ەكەنىن ءبىلدىم. مىسالى، سۋپەرماركەتتە 15 كۇن جۇمىس ىستەپ، 15 كۇن دەمالسام، 140 مىڭ تەڭگە جالاقى الادى ەكەنمىن. قازپوشتا ماماندارىنا دا 40 جاستان اسقانىمدى ايتتىم. ولار جاسىڭىزعا قاراماي بايلانىس وپەراتورى قىزمەتىنە جۇمىسقا الامىز دەپ وتىر. ال ەكىنشى دەڭگەيلى بانكتەردىڭ تىرشىلىگى قاۋىرت بولعان سوڭ، ولار ادەتتە جاستاردى جۇمىسقا الادى، – دەيدى قالا تۇرعىنى.

بۇل كۇنى Enbek.kz پلاتفورماسىنا جۇمىسسىز رەتىندە تىركەلگەن تۇرعىندار دا جارمەڭكەگە شاقىرىلدى. نەگە دەسەك، پلاتفورمادا استانا قالاسى بو­يىنشا 1 153 جۇمىس بەرۋشى 4 573 جۇمىس ورنىن تىركەگەن. ونىڭ اراسىندا ەرەكشە قابىلەتتى جاندارعا، ەڭبەكاقىسىن كۇندەلىكتى الۋدى ويلاعان جانە ەگدە جاستاعىلارعا قولايلى جۇمىستار ۇسىنىلعان. سوندىقتان جارمەڭكەدە حالىقتى جۇمىسپەن قامتۋ ورتالىعىنىڭ ماماندارى جۇمىس ىزدەپ جۇرگەن قالا تۇرعىندارىنا بارىنشا كەڭەس بەردى. سەبەبى ورتالىققا جۇگىنگەن تۇرعىندارعا ماماندار ۇنەمى حابارلاسىپ، جۇمىس ۇسىنىپ وتىرادى. ءبىر سوزبەن ايتقاندا، ورتالىق قىزمەتكەرلەرى 18 جاستان اسقان، ءتىپتى زەينەت جاسىنا تاياعان تۇرعىندارعا جۇمىس تاۋىپ بەرۋگە قولدان كەلگەنشە جاردەمدەسەدى.

سوڭعى جاڭالىقتار

ۇقساس جاڭالىقتار