پرەزيدەنت • 24 قاراشا، 2022

قاسىم-جومارت توقاەۆ الەم كوشباسشىلارىنىڭ قۇتتىقتاۋلارىن قابىل الدى

82 رەت كورسەتىلدى

قازاقستان رەسپۋبليكاسىنىڭ پرەزيدەنتى بولىپ قايتا سايلانۋىنا بايلانىستى قاسىم-جومارت توقاەۆتىڭ اتىنا قۇتتىقتاۋ حاتتار مەن جەدەلحاتتار ءتۇسىپ جاتىر، دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.

گەرمانيا پرەزيدەنتى فرانك-ۆالتەر شتاينمايەر قاسىم-جومارت توقاەۆقا الداعى ماڭىزدى مىندەتتەرىن اتقارۋدا تابىس، ال قازاقستان حالقىنا بەيبىتشىلىك، ەركىندىك جانە باق-بەرەكە تىلەدى.

«قازاقستان حالقىنىڭ يگىلىگى ءۇشىن قولعا العان ءسىزدىڭ رەفورمالارىڭىز بەن جاڭعىرۋ ۇدەرىسى جاڭا وكىلەتتىك مەرزىمىڭىزدە جالعاسادى دەپ سەنەمىن. بۇل رەتتە گەرمانيا قازاقستاننىڭ سەنىمدى سەرىكتەسى بولىپ قالا بەرەدى»، دەلىنگەن گەرمانيا پرەزيدەنتى جولداعان جەدەلحاتتا.

يتاليا پرەزيدەنتى سەردجيو ماتتارەللا قاسىم-جومارت توقاەۆقا تولاعاي تابىس تىلەپ، قازاقستان مەن يتاليانى ەكىجاقتى تىعىز قارىم-قاتىناستار بايلانىستىراتىنىن اتاپ ءوتتى.

«يتاليا زاڭ ۇستەمدىگىن نىعايتۋعا جانە ەلدى جاڭعىرتۋعا باعىتتالعان ماڭىزدى رەفورمالاردىڭ جۇزەگە اسىرىلۋ بارىسىن باقىلاپ وتىر. قازاقستان جانە ورتالىق ازيا ءوڭىرى ءۇشىن تۇراقتىلىق پەن دامۋدىڭ جارشىسى بولاتىن بۇل ۇدەرىس ەۋروپالىق وداقپەن قاتىناستاردىڭ نىعايۋىنا بايلانىستى دا زور مانگە يە»، دەپ جازدى سەردجيو ماتتارەللا.

ال سەربيا پرەزيدەنتى الەكساندر ۆۋچيچ قاسىم-جومارت توقاەۆقا كورسەتىلگەن ۇلكەن سەنىم ەلدىڭ دامۋ جانە وركەندەۋ باعىتىن جالعاستىرۋعا تىڭ سەرپىن بەرەتىنىن جەتكىزدى.

«سەربيا قازاقستاننىڭ سەنىمدى سەرىكتەسى بولىپ قالا بەرەدى. سوندىقتان ءسىز جاڭا پرەزيدەنتتىك لاۋازىمدا ءبىزدىڭ ەلگە ساپارمەن كەلەسىز دەگەن ۇمىتتەمىن. ءسىزدىڭ ساپارىڭىز ەكىجاقتى قارىم-قاتىناستاردى جانە سەربيا مەن قازاقستان اراسىنداعى جان-جاقتى ىنتىماقتاستىقتى نىعايتۋعا ەلەۋلى ۇلەس قوسار ەدى»، دەلىنگەن الەكساندر ءۆۋچيچتىڭ قۇتتىقتاۋ حاتىندا.

چەحيا پرەزيدەنتى ميلوش زەمان ءوزىنىڭ قۇتتىقتاۋ جەدەلحاتىندا سايلاۋ قاسىم-جومارت توقاەۆتىڭ مەملەكەت باسشىسى رەتىندەگى بەرىك باعدارىن راستادى جانە ازاماتتاردىڭ وعان سەنىمى جوعارى ەكەنىن كورسەتتى دەپ اتاپ ءوتتى.

«مەن ءسىزدى وسى جەڭىسىڭىزبەن شىن جۇرەكتەن قۇتتىقتايمىن. چەحيا رەسپۋبليكاسى مەن قازاقستان رەسپۋبليكاسى اراسىنداعى قارىم-قاتىناستىڭ جىلدار بويى دوستىق سيپاتقا نەگىزدەلگەنىنە قۋانىشتىمىن. ەكىجاقتى ىنتىماقتاستىق تەك ەكونوميكالىق سالادا عانا ەمەس، باسقا دا كوپتەگەن باعىتتا تابىستى دامىپ كەلەدى»، دەپ جازدى ميلوش زەمان.

سونداي-اق بۇگىن قاسىم-جومارت توقاەۆتىڭ اتىنا فرانتسيا پرەزيدەنتى ەممانيۋەل ماكروننىڭ قۇتتىقتاۋ جەدەلحاتى كەلىپ ءتۇستى.

«قازاقستان 2019 جىلدان بەرى ساياسي جانە ەكونوميكالىق جاڭعىرتۋ ۇدەرىسىن ءساتتى جۇزەگە اسىرىپ كەلەدى. مۇنى ءبىز زور قىزىعۋشىلىقپەن باقىلاپ وتىرمىز. ءسىزدىڭ قايتا سايلانۋىڭىز وسى ماڭىزدى ءىستىڭ قارقىنىن ساقتاۋعا جانە قازاقستان حالقىنىڭ مۇددەسى ءۇشىن ءوزىڭىز جاريالاعان رەفورمالاردى جۇزەگە اسىرۋعا مۇمكىندىك بەرەتىنىنە سەنىمدىمىن. ورتالىق ازياداعى وڭىرلىك ىنتىماقتاستىقتى نىعايتۋعا ەلەۋلى ۇلەس قوسىپ جۇرگەنىڭىزدەن حاباردارمىن. وسى جولدا ءسىزدى تولىققاندى قولدايمىن»، دەپ جازدى ەممانيۋەل ماكرون.

سوڭعى جاڭالىقتار

بۇگىنگى ۆاليۋتا باعامى

قارجى • بۇگىن، 09:55

ۇقساس جاڭالىقتار