كەزەكتەن تىس بولعان وسى سايلاۋدىڭ توڭىرەگىندە قوزعالعان كەيبىر اڭگىمەلەرگە توقتالا كەتسەك. ماسەلەن, وپپوزيتسيالىق كوزقاراستاعى ءبازبىر وتانداستارىمىز سايلاۋعا تۇسكەن ۇمىتكەرلەردىڭ ەل ىشىندە تانىمالدىلىعى تومەن بولعانىن ايتىپ, مۇنىڭ ءوزى ساياسي ناۋقاننىڭ ابىروي-بەدەلىنە نۇقسان كەلتىرۋى مۇمكىن دەگەن ءسوز تاراتقانى بەلگىلى. ال شىنتۋايتىندا, تاۋەكەل ەتىپ, دوداعا تۇسكەن كانديداتتاردى لايىقتىلاردىڭ تىزىمىنەن سىزىپ تاستاۋعا استە بولماس ەدى. نەگە دەسەڭىز, ولاردىڭ قاي-قايسىسىن الساڭىز دا, ءوز سالاسىنىڭ بىلگىر مامانى, ويىن اشىق جانە ەركىن جەتكىزە الاتىن ءبىلىمدى, سانالى ازاماتتار-تۇعىن. جانە ولار وزدەرىنىڭ بۇل قاسيەتتەرىن سايلاۋالدى ناۋقان كەزىندە ىسپەن دالەلدەپ كورسەتتى دە. ۇمىتكەرلەردىڭ جاڭا قازاقستاننىڭ بولاشاعىن جارقىن ەتۋ جولىنداعى وڭدى وي-پىكىرلەرى مەن ۇستامدى ۇسىنىستارىنىڭ كوپتىڭ كوكەيىنەن شىققانىن دا جوققا شىعارۋعا
بولماس.
ءسوز جوق, وسىنداي جاسامپازدىقتى جانىنا سەرىك ەتكەن كانديداتتاردىڭ كەلەشەكتەگى ساياسي مانسابىنىڭ كۇنى ەرتەڭگى پارلامەنت سايلاۋىندا كوككە ورلەمەسە, قۇلدىراماسى ايدان انىق. ويتكەنى ولاردىڭ دا كوزدەگەنى – ەلدىڭ ەرتەڭى, بولاشاق ۇرپاقتىڭ قامى.
كەيبىر تاۋەلسىز بايقاۋشىلار داۋىس بەرۋ كەزىندە مايدا-شۇيدە كەمشىلىكتەردىڭ بولعانىن ايتتى. البەتتە, اۋقىمدى شارۋالار اتقارىلىپ جاتقاندا, ۇساق-تۇيەك كەمشىلىكتەردىڭ مىندەتتى تۇردە بولاتىنىن ەشكىم جوققا شىعارا المايدى. تەك مۇنداي ولقىلىقتاردىڭ قولدانىستاعى زاڭعا, ورتاق مۇددەگە قياناتىنىڭ بولماعانى ابزال.
سونىمەن قازاقستان حالقى ءوزىنىڭ تاڭداۋىن جاساپ, الداعى جەتى جىلدا مەملەكەتىمىزدىڭ تۇعىرىن نىعايتىپ, مەرەيىن ۇستەم ەتەتىن تۇلعانى پرەزيدەنت ەتىپ سايلادى. ومىرىمىزدەگى وڭ وزگەرىستەردىڭ جىلىمىعىن, ساياسي رەفورمالاردىڭ شاراپاتىن شىن مانىسىندە سەزىنە باستاعان جۇرتتىڭ باسقاشا شەشىم قابىلداۋى مۇمكىن ەمەس تە ەدى.
ۇزاق جىلدان بەرى ۋادەدەن ىعىر بولىپ, تۇرمىستىڭ جۇدەۋلىگىنەن قاجىپ, سەنىمىنە سەلكەۋ تۇسكەن ەلدىڭ ەندىگى جەردە تالابى دا كۇشەيە تۇسپەك. حالىق ەلىمىزدە ادىلەتتىڭ, زاڭنىڭ ۇستەمدىك قۇرعانىن قالايدى. وتانداستارىمىز ءوزىنىڭ تاعدىرىن قوعامنىڭ دەنەسىنە س ۇلىكشە جابىسقان سىبايلاس جەمقورلىقتىڭ دەرتىن سىلىپ تاستاپ, جەرىمىزدىڭ استى-ۇستىندەگى بايلىقتىڭ ىرىزدىعىن ءاربىر ازاماتتىڭ يگىلىگىنە جاراتۋدى اسىل مۇراتى سانايتىن مەملەكەت باسشىسىمەن بايلانىستىرعىسى كەلەدى.
ءوزىنىڭ سايلاۋالدى باعدارلاماسىن جاريا ەتكەندە مەملەكەت باسشىسى بىلاي دەگەن بولاتىن: «مەن ۇسىنىپ وتىرعان باعدارلاما «ادىلەتتى قازاقستان: ءبارىمىز جانە ارقايسىمىز ءۇشىن» دەپ اتالادى. ونىڭ ءار تارماعىن ءوزىم جازدىم. بۇل باعدارلاما مەنىڭ جۇرەگىمنەن شىقتى دەپ ايتسام, ارتىق بولمايدى. ءبىزدىڭ ءبىر عانا ماقساتىمىز بار. بۇل – ادىلەتتى قازاقستاندى قۇرۋ».
ءيا, جۇرەكتەن شيرىعىپ شىققان جۇرەككە شارىقتاپ جەتەدى. بۇل – دالەلدى قاجەت ەتپەيتىن شىندىق! ءسوز ساباعىن تۇيىندەر بولساق, جوعارىدا اڭگىمە قىلعاننىڭ ءبارى جاڭادان جەتى جىل مەرزىمگە سايلانعان قاسىم-جومارت كەمەل ۇلى توقاەۆ سىندى الەمدىك دەڭگەيدەگى ساياساتكەردىڭ قولىنان كەلەدى دەپ نىق سەنىممەن ايتۋعا بولادى.
قايرات ءابىلدا,
«Saryarqa Aqparat» مەدياحولدينگىنىڭ ديرەكتورى
قاراعاندى
