ەۋرازيالىق ينتەگراتسيا كاسىپكەرلەر ءۇشىن وتە پايدالى

استانا. 30 مامىر. ينتەگراتسيا – بۇل قازىرگى قالىپتاسىپ جۇرگەن جاڭا ۇران. ينتەگراتسيا ارقىلى ادامدار ءبىر-بىرىنە جاقىنداي تۇسەدى. جاقىنداسقان ادامدار جۇمىلا ءجۇرىپ, دامۋدىڭ كەڭ داڭعىلىنا تۇسە الادى. ەگيپەتتىك كاسىپكەر, «لوس اميگوس» كومپانياسىنىڭ باسقارۋشى ديرەكتورى گاليال ماحەر گاليال ەلگور وسىلاي دەدى. بۇل تۋرالى egemen.kz ءتىلشىسى حابارلادى. گاليال ماحەر گاليال ەلگور: «ەۋرازيالىق ەكونوميكالىق وداققا مۇشە ەلدەر بۇل بىرلەستىكتىڭ يگىلىگىن مىندەتتى تۇردە كورەدى, جاقسى مۇمكىندىكتەرىنە قول جەتكىزەدى. مەن مۇنايشىمىن, سول سەبەپتى بۇل سالاداعى زور مۇمكىندىكتەردى بىلەمىن. بۇل باعىتتاعى قازاقستاننىڭ قۋاتىن, بايلىعىن باعامدايمىن. قازاقستان الەمنىڭ مينەرالدى بايلىعىنىڭ ايتارلىقتاي بولىگىنە يە. ال ونىڭ ءبارىن يگەرۋ, ءوندىرىستى دامىتۋ, ءونىمدى نارىققا شىعارۋ ءۇشىن ساۋدا-ەكونوميكالىق ىقپالداستىقتىڭ پايداسى زور. ال بۇگىنگى شارت وسى مۇمكىندىكتەردى اشىپ, بارلىق ينۆەستورلارعا ءتيىمدى الاڭ تۋدىرعالى تۇر. ەندى ءبىز سىزدەردەگى 17 ملن. ەمەس, 170 ملن. حالقى بار نارىقتى ايتاتىن بولامىز. بۇل – بيزنەس ءۇشىن وتە اۋقىمدى نارىق. مۇنايشى رەتىندە, قازاقستان ماعان قاشاندا جاقىن, قازاقستاندىقتار ءبىزدىڭ اعايىنىمىز», – دەدى. سونداي-اق, ول ەۋرازيالىق ەكونوميكالىق وداق قازاقستاننىڭ سىرتقى ساياساتىن جەتىلدىرە تۇسەدى دەگەن پىكىرىن ءبىلدىردى. جولدىباي بازار. دەرەككوز: egemen.kz. فوتو: «24kz».