قاراپايىم ازاماتتان ەل تانيتىن تۇلعالارعا دەيىن وسى كۇنى سايلاۋ ۋچاسكەلەرىنەن تابىلۋدا.
بۇلاي دەيتىن سەبەبىمىز, تاڭەرتەڭ بوكستان وليمپيادا ويىندارىنىڭ كۇمىس جۇلدەگەرى ەلىمىزدىڭ داڭقتى بوكسشىسى مۇحتارحان دىلدابەكوۆ جۇبايى البينا ەلشيەۆامەن بىرگە قالاداعى №269 سايلاۋ ۋچاسكەسىنە كەلىپ, ءوز تاڭداۋىن جاساپ كەتتى.
«بۇگىن ادەتتەگىدەن ەرتە وياندىم. سايلاۋ ەكەنىن ءبىلىپ, جۇبايىمىزدى ەرتىپ, داۋىس بەرۋگە كەلدىك. مەن بۇل سايلاۋدا ەل تىزگىنىن ۇستار پرەزيدەنتكە عانا ەمەس, جالپى مەملەكەتتىڭ بولاشاعىن تاڭداپ داۋسىمدى ۇسىندىم دەپ بىلەمىن. ويتكەنى وسى سايلاۋدىڭ ناتيجەسىنە قاراي ەلدىڭ الداعى دامۋ جولى, ستراتەگياسى ايقىندالادى. ال مەن كەلەشەك قازاقستاندى ەكونوميكاسى كۇشتى, ساياسي احۋالى تۇراقتى, بەيبىتسۇيگىش ەل رەتىندە كورگىم كەلەدى. سول سەبەپتى ماسەلە سايلاۋعا كەپ تىرەلگەندە ءوزىمدى جايباراقات سەزىنە المادىم. مىنا جاقتا ەل تاعدىرى تالقىعا ءتۇسىپ جاتقاندا قالاي داۋىس بەرمەي, قالىس قالۋعا بولادى. ءبىزدىڭ ءىزىمىزدى جالعاپ كەلە جاتقان وسكەلەڭ ۇرپاقتىڭ دا كەلەشەگىن ويلاپ تا سايلاۋعا اسىعا جەتتىم», دەدى بوكس سپورتىنىڭ مايتالمانى.
وليمپيادا جۇلدەگەرى بۇگىندە شىمكەنت قالالىق №1 سپورت مەكتەبىن باسقارادى. اتالعان سپورت ۇيىمى جاستار مەن جاسوسپىرىمدەردى وليمپيادالىق رەزەرۆكە دايىندايدى. مەكتەپتە سپورتتىڭ بىرنەشە تۇرىنەن اتاپ ايتقاندا, بوكس, كۇرەس, كاراتە, تاەكۆوندادان جانە كيكبوستان ءتالىم بەرىلەدى.
№269 پرەزيدەنتتىك سايلاۋ كوميسسياسىنىڭ ءتورايىمى گۇلنۇر ۇسەننىڭ ايتۋىنشا, بيىلعى پرەزيدەنتتىك سايلاۋ دوداسىندا داۋىس بەرۋ قۇقىعىنا 2950 ادام يە ەكەن.
