- جەكپە-جەك تۇرلەرى بويىنشا رەسەي فەدەراتسياسى ورەل قالاسىندا وتكەن الەم چەمپيوناتىنان ورالعان بويىم. ۇيگە كەلىپ, بىردەن وتباسىمدى ەرتىپ پرەزيدەنت سايلاۋىنا كەلدىم. سايلاۋعا قاتىسىپ, ءوز داۋىسىمدى بەرۋ – ازاماتتىق بورىشىم. وسى سايلاۋدان حالقىمىز ۇلكەن ءۇمىت كۇتەدى. مەن ادىلەتتى قازاقستاندى قۇرۋعا ءاربىر ازامات ۇلەس قوسۋى كەرەك دەپ ەسەپتەيمىن. ءاربىرىمىز ءوز سالامىزدا ادال ءارى شىن نيەتىمىزبەن جۇمىس ىستەسەك, قوعامدى جاقسى جاعىنا قاراي وزگەرتە الامىز.مەنىڭ جاسىم 60-تا. سپورتتىڭ جاۋىنگەرلىك تۇرلەرى بويىنشا بالالاردى جاتتىقتىرامىن. ورەل قالاسىنداعى چەمپيوناتتان بىرنەشە جاس سپورتشى جۇلدەمەن ورالدىق. سوعان قاتتى قۋانىشتىمىن. ءبىز وتانىن سۇيەتىن پاتريوت جاستاردى تاربيەلەۋىمىز كەرەك. اقتوبەدەگى جاۋىنگەرلىك كۇرەس تۇرلەرى فەدەراتسياسىندا جاستارىمىز سپورتتىڭ 26 ءتۇرى بويىنشا جاتتىعادى. جالپى ەلىڭنىڭ قادىرىن سىرتقا بارعاندا سەزەسىڭ, - دەيدى ءاشىم قالي.
يندۋستريالدى كوللەدجدىڭ عيماراتىندا ورنالاسقان №39 سايلاۋ ۋچاسكەسى تاڭعى ساعات 7.00-دە اشىلعان. ەرتەڭگىلىك ەكى ساعات ىشىندە 100-گە جۋىق سايلاۋشى كەلىپ داۋىس بەردى.
- كوبىنەسە ورتا جاستاعىلار بەلسەندىلىك تانىتىپ جاتىر. جالپى وسى ۋچاسكەدە 1871 سايلاۋشى تىركەلگەن, - دەيدى №39 سايلاۋ ۋچاسكەسىنىڭ توراعاسى اقالتىن ماشان.
ايتا كەتەيىك, اقتوبە وبلىسىنان 560 مىڭ 819 سايلاۋشى 517 سايلاۋ ۋچاسكەسىندە داۋىس بەرەدى. بۇگىنگى كۇنى 3 مىڭ 477 ادام ۋچاسكەلىك سايلاۋ كوميسسيالارىندا جۇمىس ىستەپ جاتىر.
