مەملەكەت باسشىسى قاسىم-جومارت توقاەۆ 2022 جىلعى 1 قىركۇيەكتەگى جولداۋىندا كەزەكتەن تىس پرەزيدەنتتىك سايلاۋ وتكىزۋدى ۇسىندى. 21 قىركۇيەكتە وسى جىلدىڭ 20 قاراشاسىنا پرەزيدەنتتىڭ كەزەكتەن تىس سايلاۋىن تاعايىنداۋ تۋرالى جارلىققا قول قويىلدى.
ەلىمىزدىڭ سايلاۋ ۋچاسكەلەرىنىڭ نەگىزگى بولىگىندە داۋىس بەرۋ جەرگىلىكتى ۋاقىت بويىنشا ساعات 07:00-دەن 20:00-گە دەيىن وتەدى. سونداي-اق 86 سايلاۋ ۋچاسكەسىندە داۋىس بەرۋ جەرگىلىكتى ۋاقىت بويىنشا ساعات 06:00-دە باستالادى.
الداعى پرەزيدەنتتىك سايلاۋعا ەلىمىز بويىنشا بارلىعى 10 101 ۋچاسكە تارتىلادى, ال 53 ەلدە 68 سايلاۋ ۋچاسكەسى قۇرىلادى.
سايلاۋشىلار تىزىمىنە 11 950 485 ازامات ەنگىزىلگەن. 4 قاراشادان باستاپ ازاماتتارعا تىزىمدەردە وزدەرىن تەكسەرۋگە مۇمكىندىك بەرىلدى. داۋىس بەرۋشىلەر ءوز سايلاۋ ۋچاكەسىن «جسن بويىنشا سايلاۋ ۋچاسكەسىن ىزدەۋ» اقپاراتتىق سەرۆيسى ارقىلى تابا الادى نەمەسە «1414», «109» call-ورتالىعىنا حابارلاسىپ بىلۋگە بولادى. سونىمەن قاتار Smart Astana ءموبيلدى قوسىمشاسى مەن smartastana_bot Telegram-بوتى جۇمىس ىستەپ تۇر.
ايتا كەتەيىك, سايلاۋ ۋچاسكەسىنە جەكە كۋالىكتى الىپ بارۋ قاجەت. سونداي-اق eGov, Kaspi قوسىمشاسىنداعى تسيفرلىق جەكە كۋالىكتى كورسەتۋگە بولادى.
21 قازان كۇنى ساعات 18:00-دە قازاقستان پرەزيدەنتتىگىنە كانديداتتاردى تىركەۋ اياقتالدى. وسك كۇنتىزبەلىك جوسپارىنا سايكەس پرەزيدەنتتىككە كانديداتتاردى ۇسىنۋ 23 قىركۇيەك پەن 11 قازان ارالىعىندا ءوتتى. التى ادام پرەزيدەنتتىككە ۇمىتكەر رەتىندە تىركەلدى.
پرەزيدەنتتىككە كانديداتتاردىڭ سايلاۋ ناۋقانى 21 قازاندا ساعات 18.00-دە باستالىپ, سايلاۋ كۇنىنىڭ الدىنداعى كۇنى 00.00-دە اياقتالدى. 19 قاراشادا ساعات 00:00-دە كەزەكتەن تىس پرەزيدەنتتىك سايلاۋ الدىندا تىنىشتىق كۇنى باستالدى.
ۇنسىزدىك كۇنى سايلاۋعا بايلانىستى كەز-كەلگەن ۇگىت-ناسيحات جۇمىستارىنا تىيىم سالىنادى. داۋىستاردى ساناۋ داۋىس بەرۋ اياقتالعاننان كەيىن بىردەن جۇزەگە اسىرىلادى. ونى ساناۋ ۇزاقتىعى 12 ساعاتتان اسپاۋى ءتيىس. داۋىستاردى ساناۋ اياقتالعاننان كەيىن بىردەن حاتتاما جاسالادى.
ايتا كەتەيىك, 35 شەت مەملەكەتتەن سايلاۋعا 641 حالىقارالىق بايقاۋشى اككرەديتتەلگەن.
