«مەكتەپ جانە كوللەدج مۇعالىمدەرىمەن بىرگە ءبىلىم بەرۋ سالاسىن ودان ارى دامىتۋ, وقۋ ورىندارىن سالۋ, ينكليۋزيا كابينەتتەرىن اشۋ, گرانتتار ءبولۋ سەكىلدى ت.ب. ماسەلەلەردى تالقىلادىق. وقۋ ورىندارىنىڭ قۇرىلىسىن جۇرگىزۋگە, ءبىلىم بەرۋ ساپاسىن ارتتىرۋعا, جۇمىس ىستەۋ ءۇشىن قولايلى جاعداي جاساۋعا بىردەي كوڭىل بولەمىز», دەپ جازدى اكىم.
التاي كولگىنوۆتىڭ ايتۋىنشا, سالاعا جاس مامانداردى تارتۋ ماقساتىندا ءبىلىم گرانتتارىنىڭ سانى جىل سايىن ۇلعايىپ كەلەدى. ماسەلەن, 3 جىل ىشىندە تۇلەكتەرگە 1400 گرانت بەرىلگەن بولسا, بيىل 1 مىڭنان استام ءبىلىم گرانتى ءبولىندى.
«الەۋمەتتىك نىساندار سالۋ – جۇيەلى جۇمىسىمىزدىڭ ماڭىزدى باعىتتارىنىڭ ءبىرى. وسى ماقساتتا 420-دان استام جەر ۋچاسكەسى بەلگىلەندى: مەكتەپ سالۋ ءۇشىن – 158 ۋچاسكە, بالاباقشالار ءۇشىن – 185, مەديتسينالىق ورتالىقتار ءۇشىن (ەمحانالار, پەرزەنتحانالار, وڭالتۋ ورتالىقتارى) – تاعى 78 ۋچاسكە. الەۋمەتتىك نىسانداردى سالۋ ءۇشىن جەر ۋچاسكەلەرىنىڭ سانىن جىل سايىن ۇلعايتامىز», دەدى التاي كولگىنوۆ.
قالا اكىمى اتاپ وتكەندەي, 2019 جىلدان باستاپ 93 مىڭ وقۋشىعا ارنالعان (2 اۋىسىمدا) 45 مەكتەپ سالىندى. ونىڭ 9-ى بيىلعى وقۋ جىلىندا اشىلادى. «جايلى مەكتەپ» ۇلتتىق جوباسى اياسىندا 84 مىڭنان استام وقۋشىعا ارنالعان (2 اۋىسىمدا) 23 اسا ءىرى مەكتەپتى جوبالاۋ جۇمىسى باستالىپ كەتتى. ولاردىڭ قۇرىلىسى كەلەسى جىلعا جوسپارلانعان.
سول سياقتى 40-قا جۋىق وقۋ ورنىندا (مەكتەپتەر, بالاباقشالار, كوللەدجدەر) كۇردەلى جانە اعىمداعى جوندەۋ جۇمىسى جۇرگىزىلدى, مەكتەپ كىتاپحانالارىنىڭ 38%-ى جاڭعىرتىلدى, بىرقاتار قوسىمشا ءبىلىم بەرۋ ورتالىقتارى, ونىڭ ىشىندە شاحمات ۇيىرمەلەرى اشىلدى.
«ەرەكشە قاجەتتىلىگى بار جانداردىڭ كەدەرگىسىز ءومىر ءسۇرۋى ءۇشىن جايلى ورتا قۇرۋ جۇمىسىن جالعاستىرامىز. بيىل قىركۇيەك ايىنان باستاپ كورۋ قابىلەتى بۇزىلعان بالالارعا ارنالعان 4 ارنايى سىنىپ اشتىق. ال جەلتوقسان ايىندا اۋتيزممەن اۋىراتىن بالالاردى قولداۋ ورتالىعىن اشۋدى جوسپارلاپ وتىرمىز. جوعارىدا اتالعان شارالاردىڭ ءبارىن ءارى قاراي دا دامىتۋدى جالعاستىرامىز. ءبىلىم بەرۋ سالاسىنىڭ ماماندارىمەن وتەتىن تۇراقتى كەزدەسۋلەر پروبلەمالاردى جىلدام شەشۋگە, سول سياقتى جوسپارىمىزعا مىندەتتەر ەنگىزۋگە مۇمكىندىك بەرەدى», دەپ قورىتىندىلادى ەلوردا اكىمى.
