ءىىم ۇيىمداسقان قىلمىسقا قارسى كۇرەس دەپارتامەنتىنىڭ بولىمشەلەرى الماتى قالاسى ساتباەۆ كوشەسىندەگى جاسىرىن ءۇي-جايلاردىڭ بىرىندە استىرتىن ويىنحانا ۇيىمداستىرعان قىلمىستىق توپتى ۇستاۋ بويىنشا ارنايى وپەراتسيا جۇرگىزدى.
تىيىم سالىنعان ويىن مەكەمەسى قالانىڭ بوستاندىق اۋدانىنداعى كوپقاباتتى ءۇيدىڭ جەرتولەسىندە بولعان. ول جەرگە كىرۋ ءۇشىن بەلگىلى ءبىر جاسىرىن ءسوزدى پايدالانعان. ارنايى وپەراتسيا كەزىندە كازينودا 20-دان استام كەلۋشىلەر بولعان, ولاردىڭ اراسىندا 30 جىلدىق تاجىريبەسى بار ويىنشىلار دا بولعان. وپەراتسيا ناتيجەسىندە 20-دان استام ويىن جابدىعى, ءىرى كولەمدەگى اقشا, كەلۋشىلەردىڭ اتى-ءجونى ءتىزىمى بار قۇجاتتاما, اقشانىڭ كىرىس-شىعىس حاتتامالارى تاركىلەندى.
قىلمىستىق ارەكەتتەن تۇسكەن كىرىستىڭ الدىن الا سوماسى كۇنىنە 5 ميلليون تەڭگەدەن اسادى. اتالعان فاكتى بويىنشا قازاقستان رەسپۋبليكاسى قىلمىستىق كودەكسىنىڭ 307-بابىنىڭ 1-بولىگى «زاڭسىز ويىن بيزنەسىن ۇيىمداستىرۋ» بويىنشا قىلمىستىق ءىس قوزعالدى. قازىرگى تاڭدا جاسىرىن ويىنحانانى ۇيىمداستىرۋشىلاردى انىقتاپ, جاۋاپكەرشىلىككە تارتۋ بويىنشا جەدەل شارالار جۇرگىزىلۋدە.
