«2022 جىلعى 7 قازاندا وتكەن استانا قالاسى ونوماستيكا كوميسسياسىنىڭ كەزەكتى وتىرىسىندا ەلوردانىڭ كەيبىر كوشەلەرىنە اتاۋ بەرۋ جانە قايتا اتاۋ بويىنشا ۇسىنىستار قارالىپ, قولداۋ كورسەتىلدى. اتاپ ايتقاندا, الماتى اۋدانى بويىنشا: ا23 جوبالىق اتاۋى بار كوشەگە ەكىنشى دۇنيەجۇزىلىك سوعىسقا قاتىسۋشى, مايدانگەر-جازۋشى, جۋرناليست جانە پروزاشى اسكەن نابيەۆتىڭ ەسىمى بەرىلسىن. اسكەن اعا - وسى جەرلەردىڭ تۋماسى, كەلەسى جىلى ونىڭ تۋعانىنا 100 جىل تولادى. ايتا كەتسەك, بۇل ۇسىنىستى قالالىق ءماسليحات تا قولدادى», دەدى ساكەن ەسىركەپ.
سپيكەر ا24 كوشەسىنە اقىن, قر مەملەكەتتىك سىيلىعىنىڭ لاۋرەاتى سىرباي ماۋلەنوۆتىڭ ەسىمىن بەرۋ ۇسىنىلعانىن ايتتى.
ساكەن ەسىركەپتىڭ ايتۋىنشا, ەسىل اۋدانىنداعى ە12 كوشەسىن كەڭەس وداعىنىڭ باتىرى مانشۇك مامەتوۆانىڭ قۇرمەتىنە اتاۋ ۇسىنىلدى. قازىرگى ۋاقىتتا مانشۇك مامەتوۆا كوشەسى بايقوڭىر اۋدانىندا ورنالاسقان, ونىڭ ۇزىندىعى نەبارى 100 مەتردى قۇرايدى.
سونداي-اق ە20 كوشەسىن اكادەميك, ەنەرگەتيك عالىم, قر ۇلتتىق عىلىم اكادەمياسىنىڭ اكادەميگى, قازاقستانداعى ەنەرگەتيكا عىلىمىنىڭ نەگىزىن قالاۋشىلاردىڭ ءبىرى شاپىق شوقيننىڭ ەسىمىمەن, ال ە753 كوشەسىن كورنەكتى مەملەكەت جانە قوعام قايراتكەرى, عالىم-تاريحشى سانجار اسفەندياروۆ ەسىمىمەن اتاۋ ۇسىنىلدى.
باسقارما باسشىسى حابارلاعانداي, سارىارقا اۋدانى بويىنشا 197-كوشەگە بالالار ادەبيەتىنىڭ كورنەكتى وكىلى بەردىبەك سوقپاقباەۆتىڭ, 189-كوشەگە سۇلتان بەيبارىستىڭ ەسىمىن بەرۋ ماسەلەسى كوتەرىلدى.
سونىمەن قاتار الماتى اۋدانى بويىنشا 23-16 جانە ماعجان جۇماباەۆ كوشەلەرىن بىرىكتىرىپ, ماعجان جۇماباەۆ داڭعىلى دەپ اتاۋ ۇسىنىلدى.
بايقوڭىر اۋدانىنداعى مانشۇك مامەتوۆا كوشەسىن قارامەرگەن كوشەسى دەپ وزگەرتۋ ۇسىنىلدى.
سونىمەن قاتار ەسىل اۋدانىندا بۇقار جىراۋ كوشەسىنەن باستالىپ, №29/1 كوشەدە اياقتالاتىن ساۋران كوشەسىنىڭ قىسقا بولىگىن ازەربايجان رەسپۋبليكاسىنىڭ تۇڭعىش پرەزيدەنتى گەيدار اليەۆ كوشەسىنە قايتا اتاۋ ۇسىنىلدى.
بۇرىنعى ءسابيت مۇقانوۆ كوشەسىنە اقمولا وبلىسىنداعى ەلدى مەكەن – قوستومار اتاۋىن بەرۋ ۇسىنىلادى.
تىڭداۋ قورىتىندىسى بويىنشا ءسابيت مۇقانوۆ كوشەسىن قوستومار كوشەسىنە قايتا اتاۋ تۋرالى ۇسىنىستى قايتا قاراۋ تۋرالى شەشىم قابىلداندى.
