«قاراعاندى-قارقارالى تاس جولىندا كوكتايعاق سالدارىنان ەكى جول-كولىك وقيعاسى بولدى. ءبىرىنشى اپات ساعات 09:50-دە تاس جولدىڭ 195 شاقىرىمىندا بولعان. Ravon Nexia كولىگىنىڭ 50 جاستاعى جۇرگىزۋشىسى قارسى جولاققا شىعىپ كەتىپ, كاماز كولىگىمەن سوقتىعىسقان. جول اپاتى سالدارىنان Ravon كولىگىنىڭ جۇرگىزۋشىسى مەديتسينالىق مەكەمەگە جەتكىزىلدى, 61 جاستاعى جولاۋشى العان جاراقاتتارىنان اۋرۋحانادا كوز جۇمدى. سونداي-اق ساعات 18:26-دا شەشەنقارا اۋىلى مەن اششىسۋ ستانساسى اراسىندا Lexus جانە Volkswagen Passat كولىكتەرى سوقتىعىستى. سالدارىنان Volkswagen كولىگىنىڭ 62 جاستاعى جۇرگىزۋشىسى وقيعا ورنىندا كوز جۇمدى», دەدى قاراعاندى وبلىسى پد جەرگىلىكتى پوليتسيا قىزمەتىنىڭ باستىعى قۋانىش زارۋباەۆ.
9 قاراشا كۇنى ساعات 01:29 شاماسىندا شاحتينسك-قاراعاندى تاس جولىندا «ۆاز-217230» اۆتوكولىگىنىڭ 22 جاستاعى جۇرگىزۋشىسى ءرۋلدى باسقارا الماي, كوپىردىڭ قورعانىش قورشاۋىنا سوقتىعىسىپ, ارىققا اۋدارىلىپ كەتكەن. زارداپ شەككەندەر مەن قازا تاپقاندار جوق.
جول-كولىك وقيعاسىنىڭ بارلىق فاكتىلەرى پوليتسيادا تىركەلگەن.
ء«بىز كولىك جۇرگىزۋشىلەرىن جولدا ءجۇرۋ ەرەجەلەرىن قاتاڭ ساقتاۋعا شاقىرامىز. جۇرگىزۋشىلەرگە اپاتتى بولدىرماۋ ءۇشىن اۋا رايىنا سايكەس جىلدامدىق رەجيمىن تاڭداپ, بەلگىلەنگەن قاشىقتىقتى ساقتاۋ ۇسىنىلادى. سونداي-اق مانەۆر جاساۋ ەرەجەلەرىن بۇزباڭىز جانە جاياۋ جۇرگىنشىلەردى بايقاڭىز. سونداي-اق جاياۋ جۇرگىنشىلەردى بەلگىلەنبەگەن جەردەن جولدى كەسىپ وتپەۋگە شاقىرامىز», دەدى ق.زارۋباەۆ.
