ەۋرازيالىق ەكونوميكالىق وداقتىڭ قۇرىلۋى بيزنەستى دامىتۋعا وڭتايلى اسەر ەتەدى

استانا. 29 مامىر. مەملەكەت باسشىسىنىڭ بيىلعى جىلدىڭ 28 ساۋىرىندە م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىندە وقىعان ءدارىسىن الەم ساراپشىلار, اسىرەسە, ەۋروپا وداعى مۇقيات زەرتتەۋدە. بۇل تۋرالى «قازاقپارات» حابارلادى. ماسەلەن, بريۋسسەلدە قازاقستاندىق جۋرناليستەرگە بەرگەن سۇحباتىندا ەۋروپالىق الدىڭعى قاتارلى ساراپشى, «شىعىس-باتىس» ينستيتۋتىنىڭ عىلىمي قىزمەتكەرى دانيل بوچكارەۆ: «پرەزيدەنت نۇرسۇلتان نازارباەۆتىڭ بيىلعى ءدارىسى ىقپالداستىق ۇدەرىستەر جايىنداعى ممۋ-دەگى ءبىرىنشى دارىسىنەن كەيىن 20 جىلدان سوڭ بولدى. نۇرسۇلتان نازارباەۆتىڭ بولاشاقتى عىلىمي تۇرعىدان بولجاۋ دارىنى مەن ساياسي دانالىعى ونى ەۋرازيالىق ينتەگراتسيانىڭ ارحيتەكتورى رەتىندە كورسەتتى. ەندى ەرتەڭ ەۋرازيالىق ەكونوميكالىق وداقتى قۇرۋ تۋرالى كەلىسىمگە قول قويۋ ءراسىمى وتپەك. بۇل قوزعالىس دۇرىس باعىتتا كەلە جاتىر», – دەدى. ەۋروپالىق ساراپشىنىڭ ايتۋىنشا, ورتا جانە شاعىن ەلدەرگە ءىرى مەملەكەتتەرمەن بىرلەسپەي ءومىر ءسۇرۋ وتە قيىنعا سوعادى. دانيل بوچكارەۆ: «ءبىز وسىنداي ينتەگراتسيالىق ۇدەرىستەر ازيادا باستالعانىن كورىپ وتىرمىز. سونىمەن قاتار بۇنداي قادامدار سولتۇستىك امەريكادا دا, لاتىن امەريكاسىندا دا ءجۇرىپ جاتىر. بۇل جالپىالەمدىك ترەندتەردىڭ بولىگى. وسى شارالار ازيالىق نارىقتا توتەپ بەرۋگە, سونداي-اق, ەۋروپالىق وداقپەن ءوزىنىڭ كەلىسسوزدەر ۇستانىمىن نىعايتۋعا كومەكتەسەدى», – دەدى. جالپى, دانيل بوچكارەۆتىڭ پىكىرىنشە, ەۋرازيالىق ەكونوميكالىق وداق قۇرۋدىڭ ىشكى مانىندە بىرقاتار ەكونوميكالىق العىشارتتار مەن باسىمدىقتار بار. تەز وزگەرىسكە ۇشىرايتىن الەمدە جانە حالىقارالىق باسەكەلەستىكتىڭ كۇشەيۋى جاعدايىندا اتالعان وداقتى قۇرۋ قاتىسۋشى مەملەكەتتەرگە پايداسىن تيگىزەدى. جولدىباي بازار. دەرەككوز: «قازاقپارات». فوتو: «24kz».