ەۋرازيالىق ەكونوميكالىق وداق اياسىندا «سامۇرىق-قازىنا» ءۇشىن باسەكەلەستىك كۇشەيەدى

استانا. 28 مامىر. ءبىز قازاقستان ەكونوميكاسى جونىندە ءسوز قوزعالعاندا, «سامۇرىق-قازىنا» قورىن دامىتۋ ماسەلەسىن العا تارتامىز. ەكونوميكا جانە بيۋدجەتتىك جوسپارلاۋ ءمينيسترى, «سامۇرىق-قازىنا» اكتسيونەرلىك قوعامى ديرەكتورلار كەڭەسىنىڭ مۇشەسى ەربولات دوساەۆ اتالعان قوردىڭ ترانسفورماتسيالاۋ باعدارلاماسى تالقىلانعان وتىرىستا وسىلاي دەدى. بۇل تۋرالى Bnews.kz حابارلادى. ەربولات دوساەۆتىڭ ايتۋىنشا, ەۋرازيالىق ەكونوميكالىق وداق اياسىندا «سامۇرىق-قازىنا» ۇلتىق ءال-اۋقات قورى» اكتسيونەرلىك قوعامى ءۇشىن باسەكەلەستىك دەڭگەيى وسەدى. جيىندا مينيستر: «كومپانيانىڭ ترانسفورماتسيالاۋ باعدارلاماسىن تالقىلاۋ كەزىندە ەۋرازيالىق ەكونوميكالىق وداق قۇرىلعاننان كەيىن «سامۇرىق-قازىنانىڭ» ءرولى قالاي وزگەرەتىنىنە دە كوڭىل ءبولۋ قاجەت. بۇگىندە 170 ملن. حالقى بار نارىقتىڭ كەڭەيۋىن ەسكەرە وتىرىپ, «سامۇرىق-قازىنانىڭ» فورماتىن قايتا قاراستىرعان ءجون», – دەدى. سونداي-اق, ول: «سامۇرىق-قازىنا» قورىنىڭ ءبىزدىڭ ەكونوميكانى دامىتۋداعى ماڭىزى زور. وسىعان بايلانىستى كومپانيانى دامىتۋدىڭ پاراديگماسى وزگەرۋدە. بۇل ترانسفورماتسيالاۋ باعدارلاماسى اياسىندا جەكە قاراستىرىلۋى كەرەك دەگەن ويدامىن», – دەگەن ويىن جەتكىزدى. جولدىباي بازار. دەرەككوز: Bnews.kz. فوتو: ortcom.kz.