ەۋرازيالىق وداق اياسىندا ءار ەل مۇناي باعاسىن ءوزى بەلگىلەيدى

استانا. 28 مامىر. ەۋرازيالىق ەكونوميكالىق وداق اياسىندا مۇناي ونىمدەرىنىڭ باعاسىن ءار مەملەكەت ءوزى بەلگىلەيدى. بۇل تۋرالى بۇگىن پرەزيدەنتى جانىنداعى ورتالىق كوممۋنيكاتسيالار قىزمەتىندە ۇكىمەت وتىرىسىنىڭ قورىتىندىسى بويىنشا وتكەن بريفينگتە مۇناي جانە گاز ءمينيسترى ۇزاقباي قارابالين مالىمدەدى. «ەۋرازيالىق ەكونوميكالىق وداق اياسىندا مۇناي ونىمدەرىنىڭ باعاسىن انىقتاۋعا كەلسەك, وداقتىڭ نەگىزى مەن قاعيدالارىن ايقىندايتىن قۇجاتتاردا ءاربىر ەل مۇناي ونىمدەرىنىڭ باعاسىن ءوز زاڭناماسىنا ساي بەلگىلەيتىنى ايتىلعان», - دەدى مينيستر ءوزىنىڭ سوزىندە. ونىڭ پايىمىنشا, بۇل ماسەلەدە ءاربىر مەملەكەت تاۋەلسىزدىگىن ساقتاپ قالادى. ياعني, ول ءوز ەركىمەن قيمىلداپ, شەشىم قابىلدايدى. «ۋاقىت وتە كەلە, بىرىڭعاي ەكونوميكالىق وداق بولعاننان كەيىن مۇشە مەملەكەتتەر مۇناي ونىمدەرىنىڭ باعاسىن سايكەستەندىرۋگە تىرىسادى. بۇل دۇرىس باعىت. بىراق 2025 جىلعا دەيىن ءبىز قازىرگى جاعدايداعى شارتتار بويىنشا جۇمىس جاسايمىز», - دەدى ول اقىرىندا. مۇرات ايتقوجا. دەرەككوز: اقوردانىڭ سايتى. فوتو: اقوردانىڭ سايتى.