ەۋرازيالىق ەكونوميكالىق وداق تۋرالى كەلىسىم ساياسي استاردان ادا

استانا. 28 مامىر. قازاقستان تاراپىنىڭ تالاپ ەتۋىمەن ەۋرازيالىق ەكونوميكالىق وداق قۇرۋ تۋرالى كەلىسىمنەن بىرقاتار ماسەلەلەر الىنىپ تاستالدى. بۇل تۋرالى پرەزيدەنت جانىنداعى ورتالىق كوممۋنيكاتسيالار قىزمەتىندە وتكەن بريفينگتە سىرتقى ىستەر ءمينيسترىنىڭ ورىنباسارى سامات ورداباەۆ باياندادى. «ءبىز كەلىسىمدى ساياسيلاندىرۋعا جول بەرگەن جوقپىز. وداق تەك قانا ەكونوميكالىق بايلانىس نەگىزىندە جۇمىس جاسايدى. قازاقستاننىڭ پوزيتسياسى ارقاسىندا كەلىسىمنەن جالپى ازاماتتىق, سىرتقى ساياسات, پارلامەنتارالىق ىنتىماقتاستىق, پاسپورت-ۆيزا سالاسى, شەكارانى ورتاقتاسا كۇزەتۋ, ەكسپورتتىق باقىلاۋ ءتارىزدى ماسەلەلەر الىنىپ تاستالدى. ونىڭ تىزىمىنە كىرگەن جايتتار وتە كوپ, - دەدى ول. «وسى وراي اتاپ وتەر ءبىر جايت, بولاشاق كەلىسىمنەن الىنىپ تاستالعان سالالار ەشقايدا كەتپەيدى, وندا ەشقانداي دا «سۇرعىلت» ايماق جوق. بۇل ماسەلەلەر ۇجىمدىق قاۋىپسىزدىك تۋرالى كەلىسىمشارت ۇيىمى, سول سياقتى تمد اياسىنداعى ەكىجاقتى جانە كوپجاقتى قۇجاتتار ارقىلى رەتتەلەدى. سوندىقتان ەشقانداي قۇقىقتىق ۆاككۋم بولمايدى. بۇل وداقتىڭ ەرەكشەلىگى تەك ەكونوميكالىق ماسەلەلەر عانا بولماق. سونداي-اق, ۇلكەن الەۋمەتتىك بلوكتى الىپ تاستادىق. بۇل سۇراقتار دا ەكىجاقتى جانە كوپجاقتى تۇرعىدا رەتتەلەدى», - دەگەندى العا تارتتى ورداباەۆ ءوز سوزىندە. مۇرات ايتقوجا. دەرەككوز: BNews.kz. فوتو: eurasian_union.