وسىنداي كەزدەسۋلەر كەزىندە وبلىس پروكۋرورى نۇرلان بيجانوۆ ارال اۋدانىندا 10-عا جۋىق تۇرعىندى قابىلداپ, جەكە ماسەلەلەرىن تىڭدادى. قابىلداۋعا كەلگەن تۇرعىننىڭ ءبىرى ارالدىق ز.وتەنوۆ ءبىلىم بەرۋ ۇيىمدارىنىڭ «مەكتەپ مەنيۋ» قوسىمشاسىن پايدالانۋ ءۇشىن نەگىزسىز قارجى تولەتىپ وتىرعانىن ايتىپ, شاعىمداندى. ماسەلەنىڭ ءمان-جايىمەن تانىسقان وبلىس پروكۋرورى كاسىپكەرگە زاڭ تالاپتارىن ءتۇسىندىرىپ, ىقپال ەتۋ اكتىسىن ەنگىزىپ, جاعدايدىڭ باقىلاۋدا بولاتىنىن جەتكىزدى.
ال قامىستىباس اۋىلىنىڭ تۇرعىنى ب.تىلەۋبايقىزى بالاسىنا قاتىستى قوزعالعان قىلمىستىق ءىس بويىنشا شاعىمداندى. قىلمىستىق قۇقىق بۇزۋشىلىق باسقا وبلىستا تىركەلگەندىكتەن تۇرعىنعا ءتيىستى قاداعالاۋشى پروكۋراتۋراعا جۇگىنۋ ءۇشىن كومەك كورسەتىلەدى.
وبلىس پروكۋرورىنىڭ قازالى اۋدانىندا وتكىزگەن جەكە قابىلداۋىندا 6 ازامات بولىپ, ءبىر تۇرعىننىڭ ارىزى قابىلداندى. قابىلداۋدا بولعان ازاماتتاردىڭ 5-ءى قىلمىستىق ىستەردىڭ تەرگەلۋىنە جانە اكىمشىلىك ىستەردىڭ سوتتا قارالۋىنا قاتىستى ماسەلەلەرمەن جۇگىنسە, ءبىر ازامات ءدارى-دارمەكتى رۇقسات قاعازبەن بەرۋ ماسەلەسىن كوتەردى. ال الەۋمەتتىك جەلى بەلسەندىسى د.داستەنوۆا ءوزىنىڭ نەگىزسىز اكىمشىلىك جاۋاپتىلىققا تارتىلعانى جونىندە جانە اۋداندا بولىپ جاتقان قۇقىق بۇزۋشىلىقتار بويىنشا شارا قولدانۋ ماسەلەسىن كوتەردى.
الدىنا ارىز-شاعىممەن كەلگەن ءار ازاماتتىڭ ماسەلەسىن مۇقيات تىڭداعان ءوڭىردىڭ باس پروكۋرورى وتىنىشتەر بويىنشا قويىلعان تالاپتاردىڭ ورىندالۋىن ءوز باقىلاۋىنا الاتىنىن جەتكىزدى.
قارماقشى اۋدانىندا وتكەن جەكە قابىلداۋ بارىسىندا دا تۇرعىندار كوكەيدە جۇرگەن ساۋالدارىن قويىپ, پىكىرلەرىن ءبىلدىردى. بۇل وڭىردە, اتاپ ايتقاندا, دەنساۋلىق ساقتاۋ جانە ءبىلىم بەرۋ سالاسىنداعى جەكەلەگەن ۇيىمداردىڭ قىزمەتىنە قاتىستى ماسەلە, سوتتاردىڭ قاراۋىنداعى قىلمىستىق جانە ازاماتتىق ىستەر جانە قۇقىق قورعاۋ ورگاندارى قىزمەتكەرلەرىنىڭ ارەكەتىنە نەمەسە ارەكەتسىزدىگىنە قاتىستى سۇراقتار مەن ۇسىنىس-پىكىرلەر كوتەرىلدى.
ن.بيجانوۆ جەكە قابىلداۋعا كەلگەن ءاربىر تۇلعاعا زاڭ تالاپتارىن ءتۇسىندىرىپ, ماسەلەنىڭ شەشۋ جولدارى بويىنشا باعىت-باعدار بەردى. قازىرگى تاڭدا وبلىستىق پروكۋراتۋرانىڭ مۇرىندىق بولۋىمەن وڭىردەگى بارلىق ەلدى مەكەندە «زاڭ كەرۋەنى» اكتسياسى ىسكە اسىرىلۋدا. بۇل ءىس-شارانىڭ باستى ماقساتى – بارلىق اۋدان, اۋىلدارعا بارىپ, تۇرعىندارمەن كەزدەسۋ, حالىقتىڭ كوكەيىندە جۇرگەن ساۋالدارىنا جاۋاپ بەرىپ, وتىنىشتەرىن قاراپ, قۇقىقتىق كومەك كورسەتۋ. اكتسيا اياسىندا قۇرىلعان موبيلدىك توپتار شالعايداعى اۋىل-ايماقتاردا دا جۇمىس ىستەۋدە.
عابيت ۇزاقباي,
قىزىلوردا وبلىسى پروكۋراتۋراسىنىڭ ءباسپاسوز حاتشىسى
