تۇڭعىش رەت كونستيتۋتسيالىق سوت, ادام قۇقىقتارى جونىندەگى ۋاكىل تۋرالى كونستيتۋتسيالىق زاڭدار قابىلداندى. قازاقستاننىڭ قۇقىقتىق جۇيەسى ءۇشىن بۇل العا قاراي قارىشتى قادام. ازاماتتار وزدەرىنىڭ كونستيتۋتسيالىق قۇقىقتارى مەن بوستاندىقتارىن جوعارعى سوتتا ءوز بەتىنشە نەمەسە ادام قۇقىقتارى جونىندەگى ۋاكىلدىڭ كومەگىمەن قورعاي الادى. بۇعان دەيىن قازاقستاندا كونستيتۋتسيالىق سوت بولدى. ول 1992-1995 جىلدار ارالىعىندا جۇمىس ىستەپ, ءوزىنىڭ جوعارى ميسسياسىن جۇزەگە اسىرىپ ۇلگەرمەدى. قازىر كەز كەلگەن دەموكراتيالىق مەملەكەتتىڭ مۇنداي ينستيتۋتتارىنا تىڭ سەرپىن بەرىلىپ وتىر. ماڭىزدى قۇقىق قورعاۋ ينستيتۋتتارىنىڭ كونستيتۋتسيالىق مارتەبەسىن بەكىتۋ ادىلەتتى قازاقستان قۇرۋدىڭ قۇقىقتىق نەگىزىنە اينالاتىنىنا سەنىمدىمىن.
ەلدىڭ ساياسي جۇيەسىن رەفورمالاۋدىڭ دايەكتى باعىتى ازاماتتاردىڭ مەملەكەتتىك ورگانداردى قۇرۋ مۇمكىندىكتەرىن كەڭەيتتى. جاڭارتىلعان «سايلاۋ تۋرالى» كونستيتۋتسيالىق زاڭدا اۋدان, وبلىستىق ماڭىزى بار قالا اكىمدەرىن تىكەلەي سايلاۋعا قاتىستى نورمالار بار. ەندى ازاماتتار وبلىستارداعى 170 اۋدان مەن 38 وبلىستىق ماڭىزى بار قالا اكىمىن ءوز بەتىنشە سايلايدى.
ارالاس جۇيە بويىنشا ءماجىلىس پەن وبلىستاردىڭ ءماسليحاتتارى قۇرىلادى. مىسالى, وبلىستاردىڭ الماتى, شىمكەنت جانە استانا قالالارى ءماسليحاتتارىنىڭ جارتىسىن پارتيالىق دەپۋتاتتار قۇراسا, ەكىنشى جارتىسىن ءبىر مانداتتى وكرۋگتەر بويىنشا سايلانعان پارتيالىق ەمەس دەپۋتاتتار قۇراماق. بۇل وتە ماڭىزدى وزگەرىس, ويتكەنى ول ازاماتتاردىڭ دەپۋتاتتاردى سايلاۋ مۇمكىندىكتەرىن كەڭەيتىپ قانا قويماي, ءاربىر قازاقستاندىققا سايلانۋ مۇمكىندىگىن بەرەدى. بۇل نورمالاردى ەنگىزۋ جەرگىلىكتى جەردەگى جاعدايدى تۇبەگەيلى وزگەرتەدى. ءىس جۇزىندە رەفورما بارلىق 17 وبلىس پەن رەسپۋبليكالىق ماڭىزى بار 3 قالانىڭ ءماسليحاتتارىن قامتيدى.
اۋداندار مەن وبلىستىق ماڭىزى بار قالالارداعى 200-دەن استام ماسليحاتقا كەلەتىن بولساق, ولاردىڭ دەپۋتاتتىق كورپۋسى 100 پايىز ءبىر مانداتتى وكرۋگتەردەن, پارتيالىق ەمەس كانديداتتاردان قۇرىلادى. بۇل وڭىرلەردىڭ دەربەستىگىن ارتتىرىپ, جەرگىلىكتى بيۋدجەتتى قالىپتاستىرۋعا ىقپال ەتۋگە جانە ونىڭ ورىندالۋىن باقىلاۋعا سەپتىگىن تيگىزەرى ءسوزسىز.
پرەزيدەنتتىڭ بيلىكتى ورتالىقسىزداندىرۋ جانە ساياسي جۇيەنى دەموكراتيالاندىرۋ جونىندەگى دايەكتى ساياساتى بيلىككە ازاماتتىق بەلسەندى قاتىسۋدىڭ نەگىزىن سالىپ ۇلگەردى. مەملەكەت حالىققا قۇلاق اسادى, قوعامنىڭ مۇددەسى مەن سۇرانىسىن ەسكەرەدى. بۇگىنگى قابىلدانعان شەشىمدەر جاقىن ارادا وڭ ناتيجە بەرەتىنىنە سەنىمدىمىن.
ەركىن تۇقىموۆ,
قازاقستان ستراتەگيالىق زەرتتەۋلەر ينستيتۋتىنىڭ ديرەكتورى
