استانادا پارلامەنت ءماجىلىسىنىڭ دەپۋتاتى, «نۇر وتان» فراكتسياسىنىڭ مۇشەسى قايىربەك سۇلەيمەنوۆتىڭ توراعالىعىمەن رەسپۋبليكالىق جەمقورلىققا قارسى ءىس-ارەكەت جونىندەگى قوعامدىق كەڭەستىڭ وتىرىسى بولىپ ءوتتى. ءىس-شارا بارىسىندا رجقك مۇشەلەرى شىعىس قازاقستان وبلىسىنداعى كاسىپكەرلەردى سىبايلاس جەمقورلىقتان قورعاۋ ماسەلەلەرىن تالقىلادى.
قازاقستان, رەسەي جانە بەلارۋس ەلدەرى ەۋرازيالىق ەكونوميكالىق وداق قۇرۋدىڭ الدىندا تۇرعاندا سىبايلاس جەمقورلىقتان قورعاۋ جانە وتاندىق بيزنەستىڭ باسەكەگە قابىلەتتىلىگىن قامتاماسىز ەتۋ ماسەلەسىنىڭ وزەكتىلىگى بۇرىنعىدان دا ارتا ءتۇستى. اسىرەسە, مۇنىڭ نەگىزگى قىزمەتى رەسەي فەدەراتسياسىنىڭ اۋماعىندا ءوتىپ جاتقان كاسىپكەرلەرگە قاتتى قاتىسى بار.
اشىق ايماق جاعدايىندا بيزنەستىڭ باسەكەگە يكەمدەلە الۋىنا جاعداي جاساۋ پارتيا مەن بۇكىل قوعامنىڭ مىندەتى بولىپ تابىلادى. زور وندىرىستىك الەۋەتى بار شىعىس قازاقستان وبلىسى كەدەن وداعىنداعى ارىپتەس-ەلدەردىڭ كومپانيالارىمەن تىعىز قارىم-قاتىناس ورناتقان.
قوعامدىق كەڭەستىڭ ساراپتاما توبى شىعىس قازاقستان وبلىسىنا ساپارى بارىسىندا ايماقتاعى 120-دان استام بيزنەس وكىلدەرىمەن كەزدەسۋ وتكىزىپ, ايماقتا كاسىپكەرلەردى سىبايلاس جەمقورلىقتان قورعاۋدىڭ جاي-كۇيىن تەكسەردى.
وتىرىستا قوعامدىق كەڭەستىڭ مۇشەسى, ۇلتتىق كاسىپكەرلەر پالاتاسىنىڭ كاسىپكەرلەردىڭ قۇقىقتارىن قورعاۋ جونىندەگى كەڭەستىڭ حاتشىسى عالىمجان قاناتبەكوۆ جەمقورلىق قۇقىق بۇزۋشىلىقتىڭ ءوسۋىنىڭ جاعىمسىز ءۇردىسىن اتاپ كورسەتتى. بۇل ءبىر جاعىنان قۇقىق فاكتىلەرىن تىركەۋدىڭ جولعا قويىلماعانىنا دا بايلانىستى, دەدى ول.
ونىڭ اقپاراتى بويىنشا, ايماقتا پارا الۋ 2009 جىل مەن 2011 جىل ارالىعىندا 2 ەسە وسكەن, ال 2012 جىلى ازداپ ءتومەندەگەنىمەن, 2013 جىلدىڭ قورىتىندىسى بويىنشا تاعى دا وسە باستاعان. سونداي-اق, مەملەكەتتىك ساتىپ الۋدى جۇزەگە اسىرعان كەزدە جەمقورلىق كورىنىستەرىنىڭ ءوسۋى بايقالىپتى.
كاسىپكەرلىكتى قورعاۋ ماقساتىندا 2011 جىلدان باستاپ 2014 جىلعى ءى توقسان ارالىعىندا پروكۋراتۋرا ورگاندارى 190 تەكسەرۋ جۇرگىزدى, بۇل رەتتە 2,3 مىڭنان اسا زاڭ بۇزۋشىلىقتار انىقتالدى, ولاردى جويۋ ءۇشىن 200-دەن اسا قارسىلىقتار مەن ۇسىنىستار ەنگىزىلدى. ماسەلەن, ولاردى قاراۋ ناتيجەلەرى بويىنشا مەملەكەتتىك ورگانداردىڭ 230-دان استام لاۋازىمدى ادامدارى, ونىڭ ىشىندە 30 جەمقورلىق قۇقىق بۇزۋشىلىق ءۇشىن تارتىپتىك جاۋاپكەرشىلىككە تارتىلدى. تارتىپتىك جاۋاپكەرشىلىككە تارتىلعانداردىڭ سانى بويىنشا جەرگىلىكتى اكىمدىكتەر مەن ىشكى ىستەر ورگاندارىنىڭ قىزمەتكەرلەرى كوش باستاپ تۇر.
وتىرىستىڭ ناتيجەلەرى بويىنشا قاۋلى قابىلداندى, وندا كاسىپكەرلىكتى جەمقورلىقتان قورعاۋ تيىمدىلىگىن ارتتىرۋعا باعىتتالعان مۇددەلى قۇرىلىمدارعا ارنالعان ناقتى ۇسىنىمدار باياندالعان.
«ەگەمەن-اقپارات».
