بويىندا قازاقى قان تۋلاعان ءار ازامات قامشىعا قىزىعا قارايدى. مىناۋ زاماندا كۇندەلىكتى ات ءمىنىپ, جۇيرىك جاراتىپ جۇرمەسەك تە, ءار شاڭىراقتىڭ تورىندە ءبىر قامشى تۇمار رەتىندە ءىلۋلى تۇر. ال بۇرىندا قازاقتىڭ قامشى ۇستاسىندا دا پالساپالىق وي جاتقان. ايتار بولساق, ۇيگە كەلگەن ادام قامشىسىن قولىنا قىسىڭقىراپ ۇستاپ كىرسە, داۋلاسۋعا كەلگەندى بىلدىرەدى. ەگەر دە تورگە وزىپ, قامشىسىن ورتاعا تاستاي سالسا, قانداي دا ءبىر داۋ-جانجالدى توقتاتىپ, بىتىمگە كەلەيىك دەگەنى ەكەن. ءيا, قامشى ۇستاپ قانا ويىڭدى جەتكىزۋ نەتكەن دانالىق دەرسىڭ. قامشىنى باقسى-بالگەرلەردىڭ پايدالانعانىن دا ەستىگەنبىز. قالاي دەسەك تە, قاسيەت بار.
كىشكەنتايىنان سايگ ۇلىك ءمىنىپ, ات ابزەلدەرىنە قىزىعىپ وسكەن ابىلاي كەيىندەرى قامشى ءورۋدى ەرمەك ەتكەن. ەرمەگىن تۇبەگەيلى كاسىپكە اينالدىرىپ جىبەرۋگە بولار ەدى, وعان مەكتەپتەگى جۇمىسى مۇرسات بەرمەيدى. ابىلاي ءماۋلىت ۇلى س.تۇكىباەۆ اتىنداعى ەڭبەك ورتا مەكتەبىندە العاشقى اسكەري دايىندىق پانىنەن ساباق بەرەدى. ءيا, ەڭبەگى مەن ەرمەگى ەكى ءتۇرلى سالا.
ابىلاي ءماۋلىت ۇلى تۋىسقان اعاسى ايدىن نۇرعابدەنوۆپەن بىرلەسىپ, جول بويىنا كادەسىي ساتاتىن دۇڭگىرشەك اشىپ قويۋدى دا ويلاستىرىپ ءجۇر. ايدىن دەپ وتىرعان ازامات تا قايىستان تاسپا ءتىلىپ, قامشى ورەدى. مىنە, اۋىلدا قازاقى ونەردىڭ قايماعىن بۇزباي, اتا ءداستۇردى جاڭعىرتىپ وتىرعان جاستارعا قالاي عانا ريزا بولمايسىز؟!
شىعىس قازاقستان وبلىسى,
كاتونقاراعاي اۋدانى
