حالىقارالىق اعاش ۇرمەلى اسپاپتار اكادەمياسى مۇعالىمدەر مەن جەتەكشى سوليستەر – سون حيۋن چو (وڭتۇستىك كورەيا), توماس حاتچينسون (جاڭا زەلانديا, فرانتسيا), رومان ليۋك (گەرمانيا, فرانتسيا) جانە دجوۆانني پۋنتسي (يتاليا) ۇسىنعان ءتورت كۇندىك پراكتيكالىق سەمينارلاردان تۇرادى. بۇل جوبا كوكتەمدە قۇرىلعان فلەيتا اكادەمياسىنىڭ جالعاسى ىسپەتتى.
اكادەمياعا الماتى, استانا جانە قاراعاندى قالالارىنان ىرىكتەلگەن 40 قاتىسۋشى كونكۋرستىق نەگىزدە شاقىرىلدى. ولار جەتەكشى حالىقارالىق مامانداردىڭ باسشىلىعىمەن پراكتيكالىق ءبىلىمدى تەگىن يگەرەدى. ۇيىمداستىرۋشىلار ءۇشىن جاس ورىنداۋشىلاردىڭ, مۋزىكانتتاردىڭ كاسىبي دامۋىنا قاتىستى تولعاندىرعان سۇراعىنا جاۋاپ بەرىپ, سونداي-اق قوعامداستىق اراسىنداعى بايلانىستى نىعايتۋ ماڭىزدى. اكادەميانىڭ شەبەرلىك سىنىپتارى ەركىن تىڭداۋشىلار ءۇشىن اشىق بولادى, بۇل ءۇردىستى باقىلاۋعا, ءبىلىمىن جەتىلدىرە تۇسۋگە جانە وسى ورتاداعى ارىپتەستەرىمەن تانىسۋعا مۇمكىندىك بەرەدى.
ء«بىز ءۇشىن اكادەميالىق ورتانى دامىتۋ جۇمىسى 2018 جىلى باستالدى. سوندا سەرىكتەستەرىمىزدىڭ ارقاسىندا ۇرمەلى اسپاپتاردا وينايتىن دارىندى ورىنداۋشىلار ءۇشىن اتاۋلى شاكىرتاقى تاعايىندادىق جانە ۇرمەلى اسپاپتاردا ويناۋدى ۇيرەنەتىن دارىندى وقۋشىلار مەن ستۋدەنتتەرگە ارنالعان ەكى رەسپۋبليكالىق بايقاۋ وتكىزدىك», دەيدى باتىرحان شوكەنوۆ اتىنداعى قوردىڭ ديرەكتورى نارگيز شوكەنوۆا.
اكادەميا جامبىل اتىنداعى قازاق مەملەكەتتىك فيلارمونياسىنىڭ ۇلكەن زالىندا وتكەن سالتاناتتى گالا-كونتسەرتپەن اياقتالدى.
بايان مۇراتبەكقىزى,
ءال-فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتى
