شارانىڭ ماقساتى – ەلدەر اراسىنداعى ينۆەستيتسيالىق جانە ساۋدا قاتىناسىن تەرەڭدەتۋ.
دوڭگەلەك ۇستەلگە يراندىق ىسكەر توپ دەلەگاتسياسى, ەكى ەلدىڭ مەملەكەتتىك مەكەمەلەرى, ۇلتتىق دامۋ ينستيتۋتتارى, سالالىق جانە ايماقتىق بيزنەس قاۋىمداستىق وكىلدەرى قاتىسقان.
بۇگىنگە دەيىنگى ستاتيستيكا بويىنشا, قازاقستان مەن يران اراسىنداعى تاۋار اينالىمى 2021 جىلى 440,1 ملن دوللار, 2022 جىلدىڭ ءبىرىنشى جارتىسىندا – 303,1 ملن دوللاردى قۇراعان. 2005 جىلدان بەرى يراننان قازاقستان ەكونوميكاسىنا قۇيىلعان تىكەلەي ينۆەستيتسيا كولەمى شامامەن 159 ملن دوللاردى قۇرادى, ونىڭ باسىم بولىگى ەكونوميكانىڭ اگرارلىق جانە ونەركاسىپتىك سەكتورلارىنا باعىتتالعان. يراندىق كاسىپكەرلەر 4 جوبانى ىسكە قوستى, ودان وزگە 9 جوبا ازىرلەنۋ ساتىسىندا.
دوڭگەلەك ۇستەلدى اشقان يران يسلام رەسپۋبليكاسىنىڭ قازاقستانداعى ەلشىسى مادجيد سامادزادە سابەر ەلدەر اراسىنداعى قارىم-قاتىناستىڭ ماڭىزدىلىعىنا توقتالىپ, بۇل شارا ينۆەستيتسيالىق بايلانىستاردىڭ كەڭەيۋىنە, سونداي-اق جاڭا بىرلەسكەن جوبالاردى جۇزەگە اسىرۋدا بەلسەندى قاتىسۋعا ىقپال ەتەتىنىنە سەنىم ءبىلدىردى.
ءوز كەزەگىندە قر سىرتقى ىستەر مينيسترلىگى ينۆەستيتسيالار كوميتەتىنىڭ توراعاسى ارداق زەبەشەۆ تاتۋ كورشىلىك قارىم-قاتىناستىڭ نىعايۋى, ەكى ەلدىڭ ۇلكەن ەكسپورتتىق الەۋەتتى ەسكەرە وتىرىپ ازيا مەن ەۋروپانىڭ نارىقتارىن بايلانىستىراتىن قازاقستان-تۇركىمەنستان-يران-تۇركيا تەمىر جولىنىڭ ىسكە قوسىلۋى ەكى ەلدىڭ ەكونوميكالىق دامۋىنا وڭ اسەر ەتەتىن ايتقان. سونداي-اق ەكىجاقتى قارىم-قاتىناستار بارلىق سالالاردا جوعارى ءوسۋ ديناميكاسىن كورسەتىپ وتىرعانىن ايتتى.
«KAZAKH INVEST» ۇك» اق باسقارما توراعاسىنىڭ ورىنباسارى جاندوس تەمىرعالي وز سوزىندە قازاقستاننىڭ ينۆەستيتسيالىق مۇمكىندىكتەرى, مەملەكەتتىك قولداۋ شارالارى, سونداي-اق ۇلتتىق كومپانيانىڭ قىزمەتى تۋرالى ايتتى. سونىمەن قاتار ول بيىل يراننىڭ ساۋدا-ونەركاسىپ پالاتاسىمەن بىرلەسىپ تەگەرانداعى ينۆەستيتسيالىق فورۋمدا 230 ميلليون دوللاردان اساتىن 12 قۇجاتقا قول قويىلعانىن اتاپ ءوتتى.
ايتا كەتەيىك, قازىر ساۋدا جانە ينتەگراتسيا مينيسترى سەرىك جۇمانعارين باستاعان قازاقستاندىق دەلەگاتسيا يران يسلام رەسپۋبليكاسىندا جۇمىس ساپارىمەن ءجۇر, ونىڭ نەگىزگى ماقساتى ساۋدا-ەكونوميكالىق جانە ترانزيتتىك-كولىكتىك سالالارىنداعى ىنتىماقتاستىقتى دامىتۋ.
