وداق اياسىندا 2019 جىلى ورتاق ەنەرگەتيكا نارىعى قۇرىلادى

استانا. 27 مامىر. ەۋرازيالىق ەكونوميكالىق وداق اياسىندا ورتاق ەلەكتر ەنەرگەتيكاسى نارىعىن قۇرۋ تۋرالى حالىقارالىق كەلىسىمگە 2019 جىلدىڭ 1 شىلدەسىنە دەيىن قول قويىلادى. بۇل تۋرالى Bnews.kz تىلشىسىنە بەرگەن سۇحباتىندا يندۋستريا جانە جاڭا تەحنولوگيالار ۆيتسە-ءمينيسترى باقىتجان جاقساليەۆ مالىمدەدى. «قازىرگى ۋاقىتتا كەدەن وداعى مەن بەك اياسىندا ىنتىماقتاستىقتىڭ بارلىق باعىتتارى بويىنشا, ونىڭ ىشىندە ەلەكتر ەنەرگەتيكاسى سالاسىندا دا ىقپالداسۋ ۇدەرىستەرى جۇرگىزىلىپ جاتىر», - دەيدى ب.جاقساليەۆ. ءمينيستردىڭ ورىنباسارىنىڭ ايتۋىنشا, ءۇش ەلدىڭ ەلەكتر ەنەرگەتيكاسى سالاسى تاريحي تۇرعىدان العاندا ىقپالداسقان. دەگەنمەن, قازىرگى ۋاقىتتا ورتاق ەلەكتر ەنەرگەتيكاسى تۋرالى ءسوز قوزعاۋ ءالى ەرتەلەۋ. وعان سەبەپ – ەلەكتر ەنەرگەتيكاسى نارىقتارى مودەلدەرىنىڭ ءار ءتۇرلى بولۋىندا. «قازاقستاندا ىرىقتاندىرىلعان ەلەكتر نارىعى بولسا, بەلارۋستە مەملەكەتتىك ساتىلاس بىرىكتىرىلگەن كومپانيا, ال رەسەيدە ەلەكتر ەنەرگياسى مەن قۋاتتار نارىعى توراپتى باعانى بەلگىلەيدى. جىل ىشىندە ساراپشىلار ەلەكتر ەنەرگەتيكاسى سالاسىنداعى ماسەلەلەردى قاراستىردى. قاتارلاس جۇمىس ىستەيتىن ەلەكتر ەنەرگەتيكاسى جۇيەلەرىنىڭ نەگىزىندە وداقتىڭ ورتاق ەلەكتر ەنەرگەتيكاسى نارىعىن كەزەڭ-كەزەڭمەن قۇرۋ بويىنشا قول جەتكىزىلگەن كەلىسىمدەر, ۇستانىمداردىڭ بارلىعى كەلىسىلدى», - دەدى ب.جاقساليەۆ. ونىڭ ايتۋىنا قاراعاندا, 2015 جىلعىڭ 1 شىلدەگە دەيىن ورتاق ەلەكتر ەنەرگەتيكاسى نارىعىن قۇرۋ تۇجىرىمداماسى ازىرلەنەدى. 2016 جىلدىڭ 1 شىلدەسىنە دەيىن ورتاق نارىقتى قۇرۋ باعدارلاماسى جاسالادى. «باعدارلاما ءىس-شارالارىن ىسكە اسىرۋدى اياقتاعاننان كەيىن وداققا مۇشە مەملەكەتتەر 2019 جىلدىڭ 1 شىلدەسىنە دەيىن ورتاق ەلەكتر ەنەرگەتيكاسى نارىعىن قۇرۋ تۋرالى حالىقارالىق كەلىسىمگە قول قويادى. وندا جەلىلەردى قولدانۋدىڭ بىرىڭعاي ەرەجەلەرى دە قاراستىرىلادى», - دەدى ۆيتسە-مينيستر. قازىرگى تاڭدا 2019 جىلعا دەيىن وداققا مۇشە مەملەكەتتەردىڭ ىشكى قاجەتتىلىكتەرىن قامتۋ ءۇشىن ەلەكتر ەنەرگياسىن قولدانۋ شارتتارىندا تەحنيكالىق مۇمكىندىكتەر اياسىندا مەملەكەتارالىق الماسۋدى ىسكە اسىرۋ ءۇشىن جەلىلەرگە كەدەرگىسىز قولجەتىمدىلىكتى قامتاماسىز ەتۋ تۋرالى شەشىم قابىلدانعان. مۇرات ايتقوجا. دەرەككوز: Bnews.kz. فوتو: 168.am.