اۆتورلىق قۇقىق يەلەرى ميراس ايتبەك پەن دانيال مولدىبەكوۆ بىرلەسىپ, اباي ءوڭىرىنىڭ مادەني-تاريحي مۇرالارىنىڭ ينتەراكتيۆتى كارتاسىن ازىرلەپ شىقتى. اتالعان كارتا ارقىلى ساياحاتشىلار قاسيەتتى ولكەنىڭ تاريحي ورىندارى تۋرالى ءۇش تىلدە اقپارات الا الادى.
«كارتامىز ازىرگە ماكەت تۇرىندە جاسالدى. دەسە دە ساياحاتشىعا قاجەتتى اقپاراتتىڭ بارلىعىن قامتىدىق دەپ ايتا الامىن. نەگە دەسەڭىز, سەمەي –قاراۋىل كۇرە جولىنان باستاۋ الاتىن كارتا مارشرۋتىندا كۇشىكباي اسۋىنان بورىلىدەگى م.اۋەزوۆ مۇراجاي-ءۇيى, قاسقابۇلاق, ويقۇدىق, ەڭلىك-كەبەك ۇڭگىرى, ەرالى جازىعى, ايگەرىم قىستاۋى, جيدەبايداعى مەموريالدى كەشەنگە دەيىنگى تاريحي-مادەني ورىندار جايلى مول ماعلۇمات بەرەدى. ءبىزدىڭ كارتامىزدىڭ ارتىقشىلىعى – ساياحاتشىعا ىڭعايلى بولۋ ءۇشىن قازاق, ورىس, اعىلشىن تىلدەرىندە اقپاراتتار جۇكتەلدى. ال وسى اقپاراتتاردى وقىماي, تىڭداعىسى كەلەتىندەر ءۇشىن اۋديو جازبا ەنگىزدىك. دەمەك, وزىنە كەرەك اقپاراتتى ءارتۇرلى الەۋمەتتىك جەلىدەن ىزدەۋدىڭ قاجەتى جوق. بارلىعى ءبىر جەرگە توپتاستىرىلعان ءبىزدىڭ كارتانى پايدالانسا بولعانى», دەدى جوبا اۆتورلارىنىڭ ءبىرى ميراس ايتبەك.
شاكىرتتەردىڭ عىلىمي جەتەكشىسى, تاريح ءپانىنىڭ مۇعالىمى ماقسات قۇداگەلديننىڭ سوزىنە سۇيەنسەك, جاس زەرتتەۋشىلەر اتالعان جوبامەن ءبىرازدان بەرى اينالىسىپ كەلەدى.
«ۇستاز بولعان سوڭ شاكىرتتەرىمىزدىڭ وسىنداي ىزدەنىستەرىنە ۇنەمى قولداۋ ءبىلدىرىپ وتىرعان دۇرىس. ءبىز باعىتتاۋشىمىز. قاجەت بولعان جاعدايدا ءتيىستى كومەگىمىزدى كورسەتەمىز. ەندى ءبىزدىڭ الدىمىزدا جوبانى جەتىلدىرۋ جۇمىستارى تۇر. ەندىگى ماقساتىمىز – كارتا ماكەتىن تولىققاندى سايتقا اينالدىرىپ, ونىڭ عالامتورسىز جۇمىس ىستەۋىنە جاعداي تۋدىرۋ», دەدى عىلىمي جەتەكشى. جاس زەرتتەۋشىلەر ينتەراكتيۆتى كارتا جاساۋ يدەياسى ۇلىلار ولكەسىنىڭ وبلىس مارتەبەسىن الۋىنا بايلانىستى تۋىنداعانىن, سونداي-اق جاڭا جوبانى سول قۋانىشقا قوسقان سىيى ەكەنىن جەتكىزدى.
اباي وبلىسى
