ونىڭ كوزقاراسىندا ونەر ءومىردىڭ تەك بار عاجابىن كورسەتۋى كەرەك. ادام كارتيناعا قاراپ تۇرىپ, ەستەتيكالىق ءلاززات الادى, ءىشى جىلىپ, ءبىر ءسات جاقسىلىققا سەنەدى, ارمانىن جالعايدى. سۋرەتشىنىڭ بۇل ويى اقىن سەرىك اقسۇڭقار ۇلىنىڭ ء«ومىر دەگەن كۇندى اينالۋ» دەگەن ولەڭىن ەرىكسىز ەسىڭە تۇسىرەدى.
رەنۋار قالامىنداعى تابيعي كۇي ونىڭ بارلىق تۋىندىسىندا سەزىلەتىن باقىت كۇيى ەدى. سۋرەتشىنىڭ شىعارماشىلىعىنان جالىققان, شارشاعان, قاجىعان, جاۋىر بولعان وبرازدى, ياكي ءومىردىڭ قوڭىرقاي ءبىر تۇستارىن كەزدەستىرۋ قيىن. قاز-قاتار تىزىلگەن پولوتنو اشىق تۇستەر مەن كۇن ساۋلەسىنە تولى.
رەنۋاردى ارقاشان ادامدار قىزىقتىراتىن. سوندىقتان دا ونىڭ كەيىپكەرلەرى, نەگىزىنەن, ايەلدەر, بالالار جانە راۋشان. سۋرەتشى ولاردىڭ بەينەلەرىندە تىنىشتىق پەن رۋحاني ەركىندىك كۇيىن بەرۋگە تىرىستى. پورترەتتى دە كوپ جازدى: تۋعان-تۋىس, دوستارىنىڭ, تاپسىرىس بەرۋشىلەردىڭ, اتاقتى ادامداردىڭ, ءتىپتى كوشەدە نەمەسە كافەدە جولىققان بەيتانىس جانداردىڭ بەينەسىن ءبىر كورگەن اسەرمەن سالا بەرەتىن. اۆتوردىڭ كارتينالارىنىڭ ىشىندە, اسىرەسە «مۋلەن دە لا گالەتتەگى بال», «قايىقشىلاردىڭ تاڭعى اسى», «جاننا ءساماريدىڭ پورترەتى», «اتكەنشەكتە», «قولشاتىرلار», «شارپانتە حانىم بالالارىمەن» پورترەتى امبەگە ايان.
ماسەلەن, پاريجدەگى «كومەدي فرانسەز» تەاترىنىڭ اكتريساسى جاننا ءساماريدىڭ پورترەتىندەگى بوياۋلاردىڭ ۇيلەسىمى, رەڭكتەر توعىسى مەن جىلىلىقتىڭ, جاستىقتىڭ, سەزىمنىڭ, كۇنشۋاقتىڭ, تابيعي سۇلۋلىقتىڭ اسەرى قالاي شەبەر ورىلگەنىنە تاڭعالاسىڭ. تۇرمىس قۇرعانعا دەيىن ساماري فروشو كوشەسىندەگى سۋرەتشىنىڭ ستۋدياسى جانىندا تۇرىپتى. سوندا سۋرەت سالدىرۋعا ءجيى كەلەتىن. 1877 جىلى رەنۋار ونىڭ ەڭ ادەمى پورترەتتەرىنىڭ ءبىرىن جازدى. ك ۇلىمسىرەگەن, ەندى ءبىر قاراعاندا, تەرەڭ ويعا باتقان, جاسىل-كوك كويلەكتەگى اكتريسا اشىق قىزعىلت فوندا تۇر. اۆتور ونىڭ وبرازىنداعى ەڭ اسەرلى جاقتارىنا بوياۋىن قويۋلاندىرا ءتۇسىپ, ايشىقتاپ كورسەتەدى. نازىك سىمباتتىلىق, سۋىق اقىل, كوگىلدىر جانارداعى ءسال-ءپال قۋلىق ءھام نۇر شاشقان كۇلكى, ۇلپىلدەگەن قىزىل شاش. سۋرەتشىنىڭ شەبەرلىگى سول, كەيىپكەردىڭ سىرتقى كەلبەتىندەگى ىشكى رۋحاني وزگەرىستەردىڭ ارەڭ بايقالاتىن تۇستارىن دا جاي عانا ك ۇلىمسىرەۋدەن, دىمقىل كوزدىڭ وتتاي جارقىراۋىنان-اق بايقاتادى. وسى دەتالدار ارقىلى باۋراتادى. شىن مانىندە, جاننا ساماري ومىردە اسقان سۇلۋ ەمەس دەسەدى. رەنۋار اكتريسانىڭ بويىنداعى تابيعي رەڭكتەردى تەرەڭدەتە كورسەتە وتىرىپ, پورترەتتى ايگىلى ەتكەن.
سول رەنۋار تازا اقىلدان شىققاننىڭ ءبارىن جانى سۇيمەيتىن: سانداردى, تەوريالاردى, فورمۋلا, ەرەجە, يدەيا, قورىتىندى. زيالىلاردى دا, ولار اسا جوعارى مارتەبەمەن ايتاتىن ونەر تۋرالى اڭگىمەلەردى دە جاقتىرمايتىن. ال كەزدەيسوقتا جولىققان ادامى كەسكىندەمە تۋرالى ساليقالى اڭگىمە باستاسا, رەنۋار شىدامسىزدانىپ, كەيدە ءتىپتى دورەكىلىك كورسەتەدى. بىردە ول سونداي بىرەۋگە: «كەشىرىڭىز, مەن اسىل ونەردەن ەشتەڭە تۇسىنبەيمىن, ءتىپتى حابارىم جوق. مەن پورنوگرافيالىق جانردا جۇمىس ىستەيمىن», دەپ شوشىتادى.
ءيا, سۋرەتشى ەشقاشان كوركەمدىك پرينتسيپتەرمەن شەكتەلگەن ەمەس, قالاعانىن ءوز قالاۋىنشا سالدى. سودان دا بولار, ونىڭ كارتينالارىندا ەرەكشە ءبىر ەركىندىك سەزىلەدى.
تىگىنشى لەونارد رەنۋاردىڭ وتباسىنداعى التىنشى بالا وسى پەر وگيۋست بولدى. كىشكەنتاي پەر-وگيۋست رەنۋار العاشقى سۋرەتتەرىن تىگىنشى بورىمەن ءۇيدىڭ ەدەنىنە سالىپ باستادى. جاس تالانتتىڭ داۋسى دا ەرەكشە ەدى. توعىز جاسىندا چارلز گۋنو وعان وپەرا حورىندا ورىن ۇسىنىپ, بالكي ءانشى بولار دەپ ويلادى. الايدا وگيۋست قىلقالامدى تاڭدادى. ءسويتىپ, 15 جاسىندا ىدىس-اياقتاردى بوياپ, پەردەلەرگە ءىنجىل كورىنىستەرىن سالىپ, سۇمدىق اقشا تاپتى. اكە-شەشەسىنە ءۇي الۋعا كومەكتەسىپ, شالا بايىدى. ونەر اكادەمياسىنا ءتۇسۋ كونكۋرسىندا 80-ءنىڭ ىشىنەن 68-ورىندى وگيۋست رەنۋار يەلەندى. سوندا دا ول ونەر اكادەمياسىمەن قاتار گلەيردىڭ شەبەرحاناسىندا ەكى جىل وقىدى. رەنۋاردىڭ سۋرەتشىلىك ءبىلىمى وسىمەن اياقتالدى.
ونىڭ كيىم بولمەسىندە ارقاشان ءۇش كوستيۋم تۇراتىن. ەكەۋى جولاقتى سۇر ءتۇستى, ءۇشىنشىسى كەشكى فراك. ەڭ ەسكىسىن كۇندە كيەتىن, ال ەكىنشىسى جۇمىسقا ارنالعان. ەكىنشى كوستيۋمى ابدەن توزىپ, ۇيكەلگەن كەزدە رەنۋار ونى كوشەدەگى قايىرشىعا بەرەدى. ياعني سۋرەتشى ەشقاشان پالتو نەمەسە سموكينگ كيمەگەن.
ول فرانتسۋز-پرۋسسيا سوعىسىندا سەگىز اي بولدى. سۋرەتشى فرەدەريك ۆاسيلي سياقتى شابۋىلعا قاتىسقان جوق جانە بەرتا موريزو, دەگا مەن مانە سياقتى ءپاريجدىڭ ءتورت ايلىق قورشاۋىنا تۇسپەدى. رەنۋار جوندەۋ روتاسىندا قىزمەت ەتتى.
سۋرەتشىنىڭ «جاڭا كوپىر» كارتيناسى 1875 جىلى درۋو قوناقۇيىندە وتكەن اۋكتسيوندا 300 فرانككە باعالاندى. بۇل رەنۋاردىڭ سول كەزدەگى جاقسى باعاعا ساتىلعان شىعارماسى ەدى. ال قالعان 19 كارتينا ماردىمسىز تيىنعا – 50-دەن 90 فرانككە دەيىن ءوتىپ جاتتى.
جالپى, وگيۋست رەنۋاردىڭ اۋكتسيوندا ساتىلعان ەڭ قىمبات كارتيناسى 78 ميلليون تۇرادى. بۇل «مۋلەن دە لا گالەتتەدەگى بال» كارتيناسىنىڭ قىسقارتىلعان اۆتورلىق كوشىرمەسى. 1990 جىلى ساتىلىم كەزىندە بۇل جۇمىس ەڭ قىمبات كارتينالار تىزىمىندە ەكىنشى ورىندا بولدى.
