وڭتۇستىك كورەيانىڭ پرەمەر-ءمينيسترى حان داك سۋ ەل تاريحىنداعى ەڭ اۋىر اپاتتاردىڭ ءبىرى - سەۋلدەگى حەللوۋين مەرەكەسىنە قاتىستى وقيعانى تەكسەرۋگە ۋادە بەردى. وڭتۇستىك كورەيادا ءبىر اپتالىق قارالى كۇن جاريالاندى.
شەنەۋنىكتەردىڭ حابارلاۋىنشا, ءبىر تۇندە قازا تاپقاندار سانى 154-كە جەتكەن. زارداپ شەككەندەر سانى ءالى دە وسۋدە, 149-ى جارالانىپ, 33-ءىنىڭ جاعدايى اۋىر دەپ باعالانعان. قازا تاپقاندار اراسىندا كەمىندە جيىرما ەلدىڭ ازاماتتارى بار.
«ۇكىمەت بۇل قايعىلى وقيعانىڭ سەبەپتەرىن مۇقيات زەرتتەپ, مۇنداي جاعداي قايتالانباۋى ءۇشىن قاجەتتى ينستيتۋتسيونالدىق وزگەرىستەردى ەنگىزۋ ءۇشىن قولدان كەلگەننىڭ ءبارىن جاسايدى. ءبىز وتباسىلاردىڭ پىكىرىن ەسكەرە وتىرىپ, قاجەتتى قولداۋ كورسەتۋگە بار كۇشىمىزدى سالامىز», دەدى پرەمەر-مينيستر حان داك سۋ.
بۇگىندە قۇرباندارعا تاعزىم شارالارى ءوتىپ جاتىر. وڭتۇستىك كورەيا حالقى يتەۆون مەترو ستانتسياسىنىڭ جانىنا اق حريزانتەمالار مەن شامداردى قويۋدا. ماڭايداعى دۇكەندەر مەن ءدامحانالار جابىلىپ, پوليتسيا وقيعا ورنىن قورشاۋعا العان.
وڭتۇستىك كورەيا بيلىگى حابارلاعانداي, ۇلتتىق ازا تۇتۋ كۇنى جاريالاندى. پرەزيدەنت يۋن سوك يول اپات بولعان يتەۆون ايماعىنا بارىپ, قۇرباندارعا تاعزىم ەتتى.
ەسكە سالايىق, 29 قازاندا سەۋلدىڭ ايگىلى يتەۆون اۋدانىنىڭ كوشەلەرىنە مىڭداعان ادام حەللوۋين مەرەكەسىن تويلاۋعا جينالعان بولاتىن. ادام سانى كوپ جينالعان ايماقتا, قىسىلىپ-تۇنشىققاننان 150-دەن استام قازا تاپتى.
سەۋل قالاسىنىڭ جەدەل شتابى مەن پوليتسياسىنىڭ مالىمەتىنشە, يتەۆون اۋدانىنداعى قايعىلى وقيعادان زارداپ شەككەندەردىڭ اراسىندا قازاقستان ازاماتى دا بار.
