Bort_01
پرەزيدەنت تمد ەلدەرى دەلەگاتسيالارىنىڭ باسشىلارىنا ءىلتيپات بىلدىرە وتىرىپ, ەكونوميكالىق سەرىكتەستىكتى كەڭەيتۋ ءۇشىن جاعداي جاساۋدىڭ ماڭىزدىلىعىن ايتتى.

«جۋىردا تمد-عا مۇشە ەلدەردىڭ باسشىلارىنىڭ ءسامميتى ءوتتى. ءبىز ءوزارا ىنتىماقتاستىقتى ارتتىرۋعا, ەكونوميكانىڭ الەۋەتىن نىعايتۋعا دەگەن ورتاق نيەتىمىزدى بىلدىردىك», دەدى مەملەكەت باسشىسى.

قاسىم-جومارت توقاەۆ شيەلەنىسە تۇسكەن گەوساياسي قايشىلىقتارعا, الەمدىك ەكونوميكاداعى تۇراقسىزدىققا نازار اۋدارا وتىرىپ, بىرقاتار ءتيىمدى شارا قابىلداۋعا شاقىردى.
«بۇل رەتتە ءوزارا ساۋدا-ەكونوميكالىق ىنتىماقتاستىق ماڭىزدى ءرول اتقارادى. وزدەرىڭىزگە ءمالىم, قازاقستاننىڭ بيىلعى توراعالىعى اياسىندا تمد-نىڭ 2030 جىلعا دەيىنگى ەكونوميكالىق دامۋ ستراتەگياسىنىڭ مىندەتتەرىن بەلسەندى جۇزەگە اسىرۋ ءىسى جالعاستى. حالىقارالىق نارىقتاعى داعدارىس جاعدايىنا قاراماستان, ەكونوميكامىز بىرتىندەپ قالپىنا كەلە باستادى», دەدى پرەزيدەنت.



مەملەكەت باسشىسى كەدەرگىلەردى جويۋعا, پروتەكتسيونيزمگە جول بەرمەۋگە, قولايلى تاريفتىك شارت قالىپتاستىرۋعا, اكىمشىلىك راسىمدەردى جەڭىلدەتۋگە شاقىردى.

قاسىم-جومارت توقاەۆ ءوز سوزىندە كولىك-ترانزيت الەۋەتىن دامىتۋ ماسەلەلەرىنە دە توقتالدى. اتاپ ايتقاندا, ەۋرازيا نارىقتارىنا جاڭا مۇمكىندىكتەر اشاتىن ترانسكاسپي حالىقارالىق كولىك باعىتىنىڭ كەلەشەگى بار ەكەنىن جەتكىزدى.
«بۇل ماسەلەنىڭ وزەكتىلىگى ارتىپ كەلەدى. تمد-عا مۇشە مەملەكەتتەر قولدا بار الەۋەتتى دامىتۋ ءۇشىن بىرلەسىپ جۇمىس ىستەيتىن بولادى. اتاپ ايتقاندا, يرانعا, پارسى شىعاناعى مەن ۇندىستانعا شىعاتىن «سولتۇستىك – وڭتۇستىك» باعىتى بويىنشا ساۋدا-ساتتىقتى وركەندەتۋ ماڭىزدى», دەدى پرەزيدەنت.
ءسوز سوڭىندا استانادا ءوتىپ جاتقان تمد ۇكىمەتتەرى باسشىلارى كەڭەسىنىڭ وتىرىسى بۇل - دوستاستىققا مۇشە ەلدەردىڭ الدىندا تۇرعان مىندەتتەردى شەشۋگە ءوز ۇلەسىن قوساتىنىنا سەنىم ءبىلدىردى.