رەسەي پرەزيدەنتى ەۋرازيالىق وداقتىڭ قۇرىلۋىن جىلدىڭ باستى وقيعاسى دەپ سانايدى

استانا. 26 مامىر. كەدەن وداعى پەن بىرىڭعاي ەكونوميكالىق كەڭىستىككە قاتىسۋشى ەلدەردىڭ باسشىلارى 29 مامىر كۇنى استانادا ەۋرازيالىق ەكونوميكالىق وداق قۇرۋ تۋرالى قۇجاتقا قول قويادى. اتالعان كەلىسىمنىڭ ءمان-ماڭىزىنا بايلانىستى كوپتەگەن جاعىمدى پىكىرلەر ايتىلۋدا. بۇل تۋرالى egemen.kz ءتىلشىسى حابارلادى. XVIII سانكت-پەتەربۋرگ حالىقارالىق ەكونوميكالىق فورۋمىندا رەسەي پرەزيدەنتى ۆلاديمير پۋتين ەۋرازيالىق ەكونوميكالىق وداق جانە ەۋروپالىق وداق اراسىنداعى قارىم-قاتىناستى دامىتۋ قاجەتتىگىن ايتا كەلە: «2015 جىلدىڭ 1 قاڭتارىندا ەۋرازيالىق ەكونوميكالىق وداق زاڭدىق تۇرعىدا كۇشىنە ەنۋى ءتيىس. حالقىنىڭ سانى 170 ملن. ادامدى قۇرايتىن قازاقستان, رەسەي, بەلارۋس مەملەكەتتەرىنىڭ ورتاق ەكونوميكالىق نارىعى تۇزىلەدى. بۇل نارىق ارقىلى كاپيتال, تاۋار, جۇمىس كۇشى مەن قىزمەت كورسەتۋ سالالارى بويىنشا ەركىن بايلانىسقا تۇسەمىز. كاسىپكەرلەر ءۇشىن مۇمكىندىكتەر مول بولادى. سونداي-اق, بىرلەسكەن ينۆەستيتسيالىق جانە كووپەراتيۆتىك جوبالاردى ىسكە اسىرۋعا, ماكروەكونوميكالىق ساياسات كەلىسىمدەرىن جۇرگىزۋگە, سىرتقى نارىقتى ۇيلەستىرۋگە قول جەتكىزىلەدى», – دەدى. سونداي-اق, ول ەۋرازيالىق ەكونوميكالىق وداقتىڭ قۇرىلۋىن بيىلعى جىلدىڭ باستى جاڭالىعى دەپ ەسەپتەيتىنىن اتاپ ءوتتى. جولدىباي بازار. دەرەككوز: egemen.kz. فوتو: pia.ru.