عىلىمي ءىس-شاراعا پپۋ عىلىمي جۇمىس جانە حالىقارالىق بايلانىستار جونىندەگى پرورەكتورى باۋىرجان ەسەنگەلدين, ستۋدەنتتەر, ماگيسترانتتار مەن دوكتورانتتار قاتىسىپ بايانداما جاسادى. سپيكەرلەر عىلىم جانە جوعارى ءبىلىمدى دامىتۋ, وقۋشىعا ساپالى ءبىلىم بەرۋدىڭ ءتيىمدى جولدارىن تابۋ باعىتىندا ازىرلەگەن جاڭا جوبالارى مەن وزەكتى ۇسىنىستارىن ورتاعا سالدى.
– بارشاڭىزعا بەلگىلى, 16 شىلدە كۇنى وتكەن ۇلتتىق قۇرىلتايدا ەل پرەزيدەنتى قاسىم-جومارت توقاەۆ رەسپۋبليكا كۇنىن قايتارىپ, ۇلتتىق مەرەكە مارتەبەسىن بەرۋ جايىندا ۇسىنىس ءبىلدىردى. وسى ۇسىنىس كوپشىلىكتىڭ قولداۋىنا يە بولىپ, ۇلتتىق مەرەكەلەر مەن اتاۋلى كۇندەر كۇنتىزبەسىنە جاڭا وزگەرىس ەنگىزۋ جونىندە شەشىم قابىلداندى. وسى مەرەكە تاريحىنا ءبىر شولۋ جاسار بولساق, 1990 جىلى 25 قازاندا قازاقستاننىڭ مەملەكەتتىك ەگەمەندىگى تۋرالى دەكلاراتسيا قابىلداندى. بۇل ەل تاۋەلسىزدىگىنىڭ العاشقى قادامى بولاتىن. وسىعان وراي رەسپۋبليكا كۇنى ەلىمىزدىڭ مەملەكەتتى قۇرۋ جولىنداعى تاريحي قادامىنىڭ سيمۆولى بولۋى كەرەك دەگەن پىكىر تۋىندادى. وسىلايشا, بۇل كۇن ۇلتتىق مەرەكە ەتىپ بەلگىلەندى. نەگىزى, ەلىمىزدىڭ تاۋەلسىزدىگى وسى كۇننەن باستالادى. بارشاڭىزدى قازاقستاننىڭ ءاربىر ازاماتى ءۇشىن ماڭىزى زور رەسپۋبليكا كۇنى مەرەكەسىمەن قۇتتىقتايمىن. وسى سالتاناتتى كۇندە بارشاڭىزعا يگىلىك پەن باقىت تىلەيمىن! – دەدى باۋىرجان ساتىبالدى ۇلى.
كونفەرەنتسيادا «تاريح» ءبىلىم بەرۋ باعدارلاماسىنىڭ دوكتورانتى ارمان وماروۆ «احمەت بايتۇرسىن ۇلىنىڭ پەداگوگيكالىق كوزقاراستارى» تاقىرىبىندا بايانداما جاسادى. ال «پەداگوگيكا جانە پسيحولوگيا» ءبىلىم بەرۋ باعدارلاماسىنىڭ ەكىنشى كۋرس ماگيسترانتى سانيا ابيلدينوۆا «مەكتەپكە دەيىنگى جاستاعى بالالاردىڭ سويلەۋ ءتىلىن ويىن تەحنولوگيالارى ارقىلى تۇزەتۋ» تاقىرىبىنداعى زەرتتەۋىن ورتاعا سالىپ, ءوز تاجىريبەسىمەن ءبولىستى. سونداي-اق «ماتەماتيكا» ءبىلىم بەرۋ باعدارلاماسىنىڭ ەكىنشى كۋرس ماگيسترانتى يران جاڭابەك جانە مفكس-21 توبىنىڭ ستۋدەنتى ەركەجان قارشىعانوۆا باياندامالار جاسادى.
پاۆلودار پەداگوگيكالىق ۋنيۆەرسيتەتىنىڭ ءباسپاسوز قىزمەتى
