عىلىم جانە جوعارى ءبىلىم مينيسترلىگى قولداۋ كورسەتكەن فورۋمعا مەملەكەت جانە قوعام قايراتكەرلەرى, زيالى قاۋىم وكىلدەرى, وقۋ ورداسىنىڭ وقىتۋشى-پروفەسسورلىق قۇرامى, ستۋدەنتتەر مەن ماگيسترانتتار قاتىستى.
ءال-فارابي اتىنداعى قازاق ۇلتتىق ۋنيۆەرسيتەتىنىڭ باسقارما توراعاسى, رەكتور جانسەيىت تۇيمەباەۆ شاراعا كەلگەن قوناقتار مەن ستۋدەنتتەردى قارسى الىپ, فورۋمنىڭ اشىلۋىن جاريالادى. رەكتور ءوز سوزىندە پرەزيدەنت قاسىم-جومارت توقاەۆتىڭ بيىلعى جولداۋىندا «ادىلەتتى مەملەكەت. ءبىرتۇتاس ۇلت. بەرەكەلى قوعام» قالىپتاستىرۋ باعىتتارىن ايقىنداپ بەرگەنىن جانە مەملەكەت باسشىسى جاستارعا ەرەكشە نازار اۋدارىپ, ۇلكەن ۇمىت ارتىپ وتىرعانىن العا تارتتى.
سونداي-اق جاڭا قازاقستاندى باسەكەگە قابىلەتتى جاستار, ءوز كاسىبىن جەتىك مەڭگەرگەن ماماندار عانا قالىپتاستىرا الاتىنىن ايتىپ, سۇرانىسقا يە بىلىكتى مامانداردى دايارلاۋ ءۇشىن ۋنيۆەرسيتەتتە اۋقىمدى جۇمىستار اتقارىلىپ جاتقانىنا توقتالدى.
فورۋم بارىسىندا رەكتور سالتاناتتى جيىنعا قاتىسۋشىلارعا مەملەكەت باسشىسى بەكىتكەن قازۇۋ قۇرىلىسىنىڭ ەكىنشى كەزەڭىنىڭ جوباسىن تانىستىردى.
جاستار فورۋمىنا ارنايى كەلگەن پرەزيدەنت كەڭەسشىسى مالىك وتارباەۆ: «جاستار – تاۋەلسىز قازاقستاننىڭ بولاشاعى. ستۋدەنتتەر ساپالى ءبىلىم, سانالى تاربيە الىپ, ەل مەن جەرىمىزدىڭ گۇلدەنۋىنە ۇلەس قوسۋعا ءتيىس. مەملەكەتىمىزدىڭ باسەكەلى قوعامعا بوي تۇزەۋى سىزدەردىڭ العان بىلىمدەرىڭىز بەن قابىلەت-قارىمدارىڭىزعا بايلانىستى. ولاي بولسا, ءبارىمىز وتانىمىزعا ادال قىزمەت ەتەيىك», دەدى.
تانىمال تەلەجۇرگىزۋشى گۇلناز الىمگەرەي مەن جول اكتيۆتەرى ۇلتتىق ساپا ورتالىعىنىڭ مامانى, الەۋمەتتىك عىلىمدار ماگيسترى اللا چەچەتكينا جاستاردى قوعامنىڭ دامۋىنا بەلسەندى ۇلەس قوسۋعا شاقىردى.
فورۋمعا قاتىسۋشىلاردىڭ پىكىرىنشە, مۇنداي يگى ءىس-شارانىڭ ماڭىزى ەرەكشە. جاستاردىڭ بويىنا وتانشىلدىق رۋح, پاتريوتتىق سەزىم ۇيالاتادى. ەلىمىزدە بولىپ جاتقان جاڭاشىل وزگەرىستەر مەن بەتبۇرىستى دامۋعا تالانتتى ستۋدەنت جاستاردىڭ ەركىن ارالاسۋىنا جارقىن جول اشادى.
فورۋم جۇمىسىنا سايكەس, «اتامەكەن» تاقىرىبىندا ديكتانت جازۋعا قازۇۋ-دىڭ 16 فاكۋلتەتىنەن 500-گە جۋىق ستۋدەنت قاتىستى. ءبىرىنشى جانە ەكىنشى ورىن فيلولوگيا فاكۋلتەتىنىڭ ستۋدەنتتەرىنە (ارۋجان سالىقوۆا, ايدانا ەركەباەۆا) بۇيىرسا, ءۇشىنشى ورىندى مەحانيكا-ماتەماتيكا فاكۋلتەتىنىڭ ستۋدەنتى حالينۇر ساتىبالديەۆا ەنشىلەدى.
ال «مەنىڭ ارمانىمداعى قازاقستان» تاقىرىبىنداعى ەسسە جازۋ بايقاۋىنا قازاق تىلىندە 80 جۇمىس, ورىسشا 10 جانە اعىلشىن تىلىندە جەتى جۇمىس ءتۇستى. گران-پري جۇلدەسىن جۋرناليستيكا فاكۋلتەتىنىڭ ستۋدەنتى دىنمۇحامەد اتاي جەڭىپ السا, ءبىرىنشى ورىندى بيولوگيا جانە بيوتەحنولوگيا فاكۋلتەتىنىڭ ستۋدەنتى التىناي شاياحمەتوۆا يەمدەندى. ەكىنشى ورىن فيلولوگيا فاكۋلتەتىنىڭ ستۋدەنتى ايناز ەسەكەشكە, ال ءۇشىنشى ورىن جۋرناليستيكا فاكۋلتەتىنىڭ 3 كۋرس ستۋدەنتى انيتا ەلۋباەۆاعا بۇيىردى.
بارلىق جەڭىمپازدار ءى, ءىى, ءىىى دارەجەلى ديپلوممەن ماراپاتتالىپ, ولارعا ءبىر رەتتىك شاكىرتاقى تاعايىندالدى.
ال سوڭعى ءۇشىنشى كەزەڭدە بايقاۋ جەڭىمپازدارىنىڭ جۇمىستارى عىلىم جانە جوعارى ءبىلىم مينيسترلىگىنە جولداندى.
