ەلىمىزدەگى قولعا الىنىپ جاتقان جاڭا رەفورمالارعا سايكەس قازاقستان رەسپۋبليكاسى پرەزيدەنتىنىڭ ءارحيۆى سالالىق تاقىرىپتاردى قامتيتىن نەگىزگى باستامالار كوتەرۋدە ەرەكشە تاسىلدەردى ۇسىنىپ وتىر. سونىڭ ءبىرى ءارحيۆتىڭ – حالىقارالىق ارحيۆتەر كەڭەسىمەن بىرلەسە وتىرىپ, 19-21 قازان ارالىعىندا الماتى قالاسىندا «اشىق قوعامعا – اشىق ارحيۆ» تاقىرىبىمەن I حالىقارالىق ارحيۆشىلەر كونگرەسىن وتكىزگەنىن ايتۋعا بولادى. حالىقارالىق ارحيۆتەر كەڭەسى الەمنىڭ 200 ەلىنىڭ ارحيۆشىلەرىن بىرىكتىرەتىن يۋنەسكو ۇيىمىنىڭ ەڭ ابىرويلى قۇرىلىمىنىڭ ءبىرى بولىپ تابىلادى. جيىننىڭ ءبىزدىڭ ەلىمىز ءۇشىن باسىمدىعى سول – قازاقستان وسى تەكتەس فورماتتا حالىقارالىق ارحيۆتەر كەڭەسىنىڭ تىكەلەي اتسالىسىپ قاتىسۋىمەن ءىس-شارا وتكىزگەن تمد ەلدەرىندەگى العاشقى مەملەكەت بولىپ وتىر.
قر پرەزيدەنتىنىڭ ءارحيۆى حالىقارالىق ارحيۆتەر كەڭەسىمەن بىرلەسىپ دامىعان ارحيۆ رەتىندە وسى كونگرەستى ۇيىمداستىرۋ ارقىلى شەتەلدىك ارىپتەستەرىمەن تاجىريبە الماسىپ, ورتاق كەلىسسوزدەر الاڭىن قۇرۋدى مۇرات تۇتادى. الماتىداعى دوستىق ءۇيىنىڭ دوڭگەلەك زالىندا وتكەن جيىنعا قازاقستان, اقش, يوردانيا, رەسەي فەدەراتسياسى, پولشا, يران, تۇركيا, فرانتسيا, كانادا, وڭتۇستىك كورەيا, قىتاي, تۇركىمەنستان, قىرعىزستان, وزبەكستان سەكىلدى 15 ەلدىڭ مەملەكەتتىك ارحيۆتىك ۇيىمدارىنىڭ دەلەگاتسياسى جانە بۇۇ, يۋنەسكو, حالىقارالىق ارحيۆتەر كەڭەسى ۇيىمدارىنىڭ باسشىلارى مەن ساراپشى ماماندارى قاتىستى. ارحيۆ قىزمەتىنە ءجيى جۇگىنەتىن, ىرگەلى عىلىمي مەكەمەلەردە تاريح سالاسىنىڭ جۇمىسىن ىلگەرىلەتىپ جۇرگەن وتاندىق عالىمدار دا وسى الاڭنان تابىلدى. الماتىنىڭ تورىندەگى بۇل القالى جيىندا ماماندار الەمدەگى جەتەكشى ارحيۆتەردىڭ يننوۆاتسيالىق دامۋ جولدارىن تالقىعا سالدى. كونگرەسس جۇمىسىن ۇيىمداستىرۋ قازاقستان رەسپۋبليكاسى پرەزيدەنت اكىمشىلىگى, مادەنيەت جانە سپورت مينيسترلىگى, سىرتقى ىستەر مينيسترلىگى, اقپارات جانە قوعامدىق دامۋ مينيسترلىگى, الماتى قالاسىنىڭ اكىمدىگى تاراپىنان دا قولداۋ تاپتى. پرەزيدەنت اكىمشىلىگى جالپى ءبولىم مەڭگەرۋشىسى نۇرداۋلەت تولەەۆ, قازاقستان رەسپۋبليكاسى تۇڭعىش پرەزيدەنتى – ەلباسى كىتاپحاناسىنىڭ ديرەكتورى باقىتجان تەمىربولات كونگرەسس قاتىسۋشىلارىنىڭ جۇمىسىنا تابىس تىلەپ, حالىقارالىق جيىننىڭ ماڭىزىن اتاپ ءوتتى.
حالىقارالىق ماڭىزى بار شاراعا قۇرمەت بىلدىرگەن قازاقستان رەسپۋبليكاسىنىڭ پرەزيدەنتى ق.توقاەۆ كونگرەستىڭ ۇيىمداستىرۋشىلارى مەن قاتىسۋشىلارىنا قۇتتىقتاۋ حات جولداپ, قولداۋ ءبىلدىردى. ول ءوز سوزىندە «قازاقستان ءوز دامۋىنىڭ جاڭا كەزەڭىنە قادام باستى. كەڭ اۋقىمدى جاڭعىرۋ ءىس جۇزىندە بارلىق سالالار مەن باعىتتاردى, ونىڭ ىشىندە ارحيۆ ءىسىن دە قامتۋدا. باسقارۋدىڭ بارىنشا دەموكراتيالىق قاعيداتتارىن, وزىق تاجىريبە مەن تسيفرلىق تەحنولوگيالاردى ەنگىزۋ ادەتتەگى ءداستۇرلى كونسەرۆاتيۆتى سالاعا قۋاتتى سەرپىن بەرىپ, زاماناۋي ارحيۆ ۇلگىسىن جاڭعىرتۋدىڭ ساپالى جاڭا دەڭگەيىنە شىعاردى. ءى كونگرەستىڭ تولىمدى كۇن ءتارتىبى مەن قاتىسۋشىلارىنىڭ بەدەلدى قۇرامى ارحيۆتەردى باسقارۋ, ساقتاۋ جانە پايدالانۋدىڭ وزەكتى ماسەلەلەرى بويىنشا مازمۇندى پىكىرتالاستار ورىن الاتىن سۇحبات الاڭىنىڭ قاجەتتىلىگىن ايعاقتايدى» دەپ, كونگرەسس جۇمىسىنىڭ الداعى ۋاقىتتا ءداستۇرلى شاراعا اينالاتىنىنا سەنىم ءبىلدىردى. حالىقارالىق ارحيۆ ءىسىنىڭ كاسىبي قوعامداستىعىنىڭ ىنتىماقتاستىعى مەن بىلىكتىلىگى ۇدەمەلى جانە سەرپىندى دامۋى ءۇشىن وسىنداي كەلىسسوزدەر الاڭى قاجەت ەكەنىن تىلگە تيەك ەتكەن مەملەكەت باسشىسى كونگرەستىڭ جۇمىسىنا دەمەۋ جاساپ, قاتىسۋشىلارىنا عيززات تانىتقانى ارحيۆشىلەردى جىگەرلەندىرىپ, ىجداعاتتىلىقپەن ەڭبەك ەتۋىنە سەرپىن بەرەرى ءسوزسىز.
كونگرەستىڭ اشىلۋىندا سويلەگەن مادەنيەت جانە سپورت ۆيتسە-ءمينيسترى نۇرعيسا داۋەشوۆ قازاقستان ۇكىمەتىنىڭ ارحيۆكە ۇلكەن نازار اۋدارىپ, قولداۋ جاساپ كەلە جاتقانىن, «ارحيۆ-2025» جوباسىنىڭ 2020-2025 جىلدارعا ارنالعان كەشەندى ءىس-شارالار جوسپارى ارحيۆ ءىسىنىڭ نورماتيۆتىك قۇقىقتىق بازاسىن جەتىلدىرۋدى كوزدەپ وتىرعانىن اتاپ ءوتتى. بۇل جوبا مەملەكەتتىك ارحيۆتەردى ماتەريالدىق-تەحنيكالىق جابدىقتارمەن قامتاماسىز ەتۋدى, كادر الەۋەتىن, سونداي-اق وتاندىق جانە شەتەلدىك ارحيۆتەر, مۋزەيلەر, كىتاپحانالار مەن عىلىمي ورتالىقتاردان, كەڭەيتىلگەن حالىقارالىق ىنتىماقتاستىقتىڭ شەڭبەرىندە قازاقستان تاريحى جونىندەگى قۇجاتتارمەن ۇلتتىق ارحيۆ قورىن تولىقتىرۋدى ماقسات ەتەدى.
جاڭا فورماتتاعى ارحيۆ
حالىقارالىق كونگرەستىڭ مودەراتورى, قازاقستان رەسپۋبليكاسى پرەزيدەنتى ءارحيۆىنىڭ ديرەكتورى ءاليا مۇستافينا جاڭا فورماتتاعى ارحيۆ جۇمىسىن جانداندىرۋ بارىسىنداعى وزگەرىستەردەن حاباردار ەتتى. قازاقستان رەسپۋبليكاسى پرەزيدەنتىنىڭ 2022 جىلعى 9 اقپانداعى «قازاقستان رەسپۋبليكاسى پرەزيدەنتى ءارحيۆىنىڭ كەيبىر ماسەلەلەرى تۋرالى» جارلىعىمەن قازاقستان رەسپۋبليكاسى پرەزيدەنتىنىڭ ءارحيۆى قايتا قۇرىلىپ, ونىڭ جاڭا ەرەجەسى مەن قۇرىلىمى بەكىتىلگەن بولاتىن. جاڭا مارتەبەدە مەكەمە قىزمەتىنىڭ ماقساتتارى مەن مىندەتتەرى بۇرىنعىدان دا كەڭەيتىلدى. وسى جىلدىڭ ماۋسىمىندا ارحيۆ 2035 جىلعا دەيىنگى دامۋ تۇجىرىمداماسى مەن ستراتەگيالىق جوسپارىن ازىرلەپ, بەكىتتى. تۇجىرىمدامادا ءارحيۆتىڭ ستراتەگيالىق دامۋ باعىتتارى, ماقساتقا جەتۋ قاعيداتتارى, مىندەتتەرى, سونداي-اق, ولاردى ىسكە اسىرۋ كەزەڭدەرى ايقىندالعان. ايتىلعان جاڭا باستامالار ارحيۆ ءىسىن قۇجاتتاردى ساقتاۋدىڭ توڭىرەگىنەن مەملەكەتتى دامىتۋدىڭ جاڭارعان باعىتتارىنداعى ومىرلىك ماڭىزى بار دەڭگەيگە الىپ شىقتى. مەملەكەتتىڭ بۇگىنگى ۇستانىمىنداعى بۇل جاڭارۋ قۇبىلىستارى قازىرگى ۋاقىتتا تەك ارحيۆ سالاسىندا عانا ەمەس, قوعامداعى بارلىق سالالاردا كورىنىس تابۋدا. جالپىۇلتتىق دەڭگەيدە جاھاندانۋعا بەت العان كوشپەن بىرگە تۇبەگەيلى وزگەرىستەردى ەڭسەرە باستاعان پرەزيدەنت ءارحيۆىن وزگە دە قوعامدىق ينستيتۋتتارداعىداي جاڭا سىن-تاۋەكەلدەر سىناققا الىپ وتىر. بۇعان ارحيۆ ۇجىمى جاڭا تاسىلدەرمەن جاۋاپ قاتا باستادى.
بۇگىنگى تاڭدا ارحيۆتە بۇرىنعى پارتيا ءارحيۆىنىڭ قۇجاتتارىنان باستاپ, تاۋەلسىز قازاقستاننىڭ ساياسي تاريحى جونىندەگى ماتەريالدارى, سونداي-اق, قازاقستاننىڭ كورنەكتى ساياسي, مەملەكەت جانە قوعام قايراتكەرلەرىنىڭ جەكە تەكتىك ارحيۆتەرى بار. ۇلتتىڭ تاريحي-مادەني مۇراسىنىڭ ساقتالۋىنا امانات ارقالاعان ارحيۆتەردىڭ باستى ماقساتى – مەملەكەتتىگىمىزدىڭ تاريحىن قاستەرلەۋ باعىتىنداعى جۇمىستارىنىڭ دەڭگەيىن دامىتىپ, وعان قاتىستى قۇجاتتاردى كوزدىڭ قاراشىعىنداي ساقتاۋ بولىپ تابىلادى. قر پرەزيدەنتى ءارحيۆىنىڭ مۇنداعى ۇستانىمى دا ەرەكشە بولىپ وتىر. حح عاسىر مەن تاۋەلسىزدىك كەزەڭىنىڭ الەۋمەتتىك-ساياسي تاريحى قۇجاتتارىنىڭ ەلدەگى ەڭ ءىرى ساقتاۋشىسى رەتىندە ارحيۆ بۇل جاۋاپكەرشىلىكتى ۋاقتىلى سەزىنىپ, وتاندىق ارحيۆ ءىسىن دامىتۋدا تالىمگەرلىك ينستيتۋت مارتەبەسىنە اينالۋعا باعىت العان. ارحيۆتە قۇجاتتاردى تسيفرلاندىرۋ ماقساتىندا ۇلتتىق ارحيۆ قورىنىڭ قۇجاتتارىن قالىپتاستىرۋ, ازاماتتاردىڭ قۇجات كوزدەرىنە قول جەتكىزۋ پروتسەسىن جەدەلدەتۋ, جەكە جانە زاڭدى تۇلعالاردىڭ سۇرانىمدارى بويىنشا قىزمەتتەر كورسەتۋدى وڭتايلاندىرۋ ماسەلەلەرى بۇگىنگى تاڭدا تولىق شەشىمىن تاۋىپ وتىر.
ءارحيۆتىڭ ىنتىماقتاستىق اۋقىمى
ءارحيۆتىڭ وزگەشەلىگى – ونىڭ قۇجاتتارىنىڭ ساپالىق قۇنى مەن ماڭىزدىلىعىندا. الەمدەگى ءار مەملەكەتتىڭ ساياسي تاريحى تۋرالى تۇسىنىكتەرى قۇجاتتىق نەگىزدە قالىپتاسقان. ەل دەربەستىگىن دارالاپ, مەملەكەتتىلىكتى ماقتان ەتىپ, وتاندىق جانە شەتەلدىك ارحيۆتەردەگى تاريحي دەرەكتەرمەن جۇمىس باعىتى قانشالىقتى قولعا الىنعان دەگەن ساۋال كۇن تارتىبىنەن تۇسكەن ەمەس. بۇل ءوز كەزەگىندە تەك وتاندىق ەمەس, شەتەلدىك ارحيۆتەردەگى زەرتتەۋشىلەردىڭ كوپجاقتى ىرگەلى زەرتتەۋلەرىمەن, مەملەكەتتىڭ تىكەلەي قولداۋىمەن عانا جۇزەگە اسىرىلاتىن جۇمىس. قر پرەزيدەنتىنىڭ ءارحيۆى ءوزىنىڭ قۇقىقتىق بازاسى مەن عىلىمي-ادىستەمەلىك دەڭگەيىن دامىتۋ باعىتىندا ارىپتەستىكتىڭ جاڭا داۋىرىنە وتكەن.
باسقوسۋعا ارنايى شاقىرۋمەن كەلگەن حالىقارالىق ارحيۆتەر كەڭەسىنىڭ اتقارۋشى ديرەكتورى كارلوس سەررانو ۆاسكەز قاتىسۋشىلاردى قۇتتىقتاپ, بايانداما جاسادى. ول ءوز سوزىندە حالىقارالىق ارحيۆشىلەر كونگرەسىن ۇيىمداستىرىپ وتىرعان قازاقستانعا, ىنتىماقتاستىق جولىندا جيىرما ءتورت جىلدى ەڭسەرگەن سەنىمدى سەرىكتەسى قر پرەزيدەنتى ارحيۆىنە العىس ايتتى. سونداي-اق ول «حالىقارالىق ارحيۆتەر كەڭەسىنىڭ ماقساتى – ارحيۆ ءىسى مەن قۇجاتتاردى باسقارۋدىڭ كاسىبي ماسەلەلەرى بويىنشا تاجىريبەلەر, زەرتتەۋلەر جانە يدەيالارمەن الماسۋ ارقىلى قۇجاتتار مەن ارحيۆتەردى باسقارۋعا ءارى پايدالانۋعا, سونداي-اق بۇكىل الەم بويىنشا ادامزاتتىڭ ارحيۆتىك مۇراسىن ساقتاۋعا جاردەمدەسۋ» دەيدى. بۇل جۇمىستاردى يگەرۋ ءۇشىن قازىر ءار ەلدىڭ ارحيۆتەرىنە زەرتتەۋلەر ۇيىمداستىرۋمەن شەكتەلمەي, زاماناۋي ادىستەر مەن قۇرالداردى مەڭگەرۋ جولدارىن قاراستىرۋ قاجەت. ول كونگرەستىڭ وتۋىنە اتسالىسىپ قاتىسۋىنىڭ دا سەبەبىن ءتۇسىندىردى. قازاقستاننىڭ جانە ورتالىق ازيا مەملەكەتتەرىندەگى ارحيۆ ءىسىن جاقىنىراق ءبىلىپ, كەڭەستىڭ جۇمىستارىمەن, ەرەكشەلىگىمەن تانىسا ءتۇسۋ نيەتىن ءبىلدىردى. «ارحيۆتىك قۇجاتتار – بۇل كەرەمەت رەسۋرستار, ولار وتكەن وقيعالاردىڭ قۇجاتتىق دالەلى, بىراق ولار نازىك ءارى وسال بولىپ كەلەدى. ولارعا قۇرمەت تانىتۋ كەرەك. قۇندى قۇجاتتاردى ساقتاپ, ونىڭ ومىرشەڭدىگىنە جاعداي جاساپ وتىرعان ارحيۆتەردىڭ باستى ءرولى – ادامدار مەن مەملەكەتتەردىڭ قۇقىقتارىن قورعاۋ, سونداي-اق ارحيۆ مۇراسىنا جۇرتشىلىقتىڭ بارىنشا كەڭ قولجەتىمدىلىگىن قامتاماسىز ەتۋ بولىپ تابىلادى. وسى جاۋاپتى قىزمەتتە بارلىق قاتىسۋشىلاردى بىرلەسىپ جۇمىس ىستەۋگە شاقىرامىن. ءبىز حالىقارالىق ارحيۆتەر كەڭەسى وسى تەكتەس فورماتتاعى كەلىسسوزدەر الاڭىن قۇرۋدا ارقاشان ارىپتەستىك تانىتۋعا دايىنبىز» دەپ توقتالدى.
كونگرەسس جۇمىسىنا ارنايى قاتىسۋعا كەلگەن وزبەكستاندىق دەلەگاتسيانىڭ باسشىسى, «ۋزارحيۆ» اگەنتتىگى ديرەكتورىنىڭ ورىنباسارى حۋسان يساەۆ باۋىرلاس ەلدىڭ ۇلتتىق ارحيۆتەرىنىڭ دامۋ جولدارىن تىزبەكتەپ شىقتى. مارتەبەلى مەيماننىڭ پىكىرىنشە, كونگرەسس – ءاردايىم سىندارلى ديالوگتى قامتاماسىز ەتەتىن, حالىقارالىق جانە جەرگىلىكتى دەڭگەيدە ارحيۆ ءىسىن سەرپىندى دامىتۋ جونىندە شەشىم قابىلداۋ جولىندا تۋىنداعان مۇددەلەر مەن ماسەلەلەردى تالقىلايتىن, بارلىق قاتىسۋشىنىڭ ءوزارا تىعىز قارىم-قاتىناس جاساۋعا مۇمكىندىك بەرەتىن ءىس-شارا ەكەنىن اتاپ ءوتتى.
قر پرەزيدەنتى ءارحيۆىنىڭ سالالىق سەرىكتەستەرى قر ورتالىق مەملەكەتتىك ءارحيۆى مەن الماتى قالاسىنىڭ مەملەكەتتىك ءارحيۆىنىڭ قوسقان ۇلەسى زور. اتالعان ارحيۆتەر شاراعا قولعابىس جاساپ, وزدەرىنىڭ تىكەلەي ۇيىمداستىرۋلارىمەن زاماناۋي ارحيۆتەگى تەوريالىق جانە تاجىريبەلىك سىن-قاتەرلەردى يگەرۋ تاقىرىپتارىندا دوڭگەلەك ۇستەلدەر وتكىزدى. سونىمەن قاتار الماتىنىڭ بىرنەشە مەتروپوليتەنىندە كونگرەسس جۇمىسىنا باعىتتالعان تاريحي-قۇجاتتىق كورمەلەر ۇيىمداستىردى. سەرىكتەستەرمەن بىرلەسىپ ۇسىنعان بۇل فورماتتاعى كورمەلەر قالالىقتار مەن قوناقتاردىڭ كوڭىلىنەن شىعىپ, وڭ باعاسىن العان بولاتىن.
ناتيجەسىندە, وسىنداي حالىقارالىق كاسىبي ارحيۆ ءىسىنىڭ ماماندارى مەن ۇيىمدارىنىڭ ىمىراسىن جاراستىرعان القالى جيىن ىنتىماقتاستىقتىڭ كوكجيەگىن كەڭەيتىپ, ەلىمىزدىڭ بۇرىن-سوڭدى بەلگىسىز بولعان باعالى قۇجاتتاردى ەنشىلەۋىنە قول جەتكىزۋى ابدەن مۇمكىن.
حالىقارالىق كونگرەستىڭ الەۋەتى
حالىقارالىق كونگرەستى كەشەندى تۇردە ۇيىمداستىرۋعا باسشىلىق جاساعان قر پرەزيدەنتى ءارحيۆىنىڭ ديرەكتورى ءا.مۇستافينا, تەك تمد ەلدەرىنىڭ شەڭبەرىندەگى ءداستۇرلى ۇردىسپەن شەكتەلمەي, الىس-جاقىن شەتەلدىك ارحيۆتىك ۇيىمدارمەن ىنتىماقتاستىق ورناتۋ ءارحيۆتىڭ و باستاعى الدىعا قويعان ماقساتى ەدى, دەيدى. كونگرەسس جۇمىسىندا ءارحيۆتى دامىتۋدىڭ يننوۆاتسيالىق يدەيالارىن قالىپتاستىرۋ, جوبالاردى ىسكە اسىرۋ جانە ۇزدىك ارحيۆتىك تاجىريبەلەردى تيراجداۋ نەگىزگى تاقىرىپقا اينالدى. بۇل جيىننىڭ اياسىندا مادەنيەت, ونەر, ادەبيەت, عىلىم جانە ءبىلىم ارقىلى قوعام ءۇشىن ارحيۆتىك قۇجاتتاردىڭ ءرولى مەن ماڭىزىن اشاتىن تاقىرىپتىق الاڭدار (ارحيۆتىك پىكىرتالاس كۋرستار) ۇيىمداستىرىلدى. ارحيۆتىك لەكتوريلەر فورماتىندا شاقىرىلعان نەگىزگى سپيكەرلەر وتاندىق ارحيۆشىلەر جانە عالىمدارمەن بىرگە ەو, ازيا جانە تمد ەلدەرىنىڭ, سونداي-اق الىس-جاقىن شەتەلدىڭ, بۇۇ مەن يۋنەسكو, حالىقارالىق ارحيۆتەر كەڭەسى ۇيىمدارىنىڭ ساراپشىلارى جانە ماماندارى مەملەكەتتىك ساقتاۋدىڭ ستراتەگيالىق دامۋ جوسپارلارى مەن ءىس-قيمىل اسپەكتىلەرىنىڭ ۇزاقمەرزىمدى پەرسپەكتيۆاداعى شەشىمدەرىن ورتاعا سالدى.
كاسىبي ماماندار كونگرەستىڭ جۇمىسىنان قۇجاتتاردى باسقارۋدىڭ ناقتى تارتىپتەرى مەن ونى ساقتاۋداعى جاڭا رەگلامەنتتەرىن ءبىلىپ, ساندىق فورماتقا كوشىرۋدىڭ الەمدىك ءۇردىسىنىڭ قالاي جۇزەگە اساتىنىنا كۋا بولدى. سونداي-اق قاتىسۋشىلار قۇجاتتىق اقپاراتتىڭ جاڭا تۇرلەرىمەن جۇمىس ىستەۋ ءۇشىن قازىرگى زامانعى شەشىمدەردى پايدالانىپ جۇرگەن تالىمگەرلەرمەن تاجىريبە الماسىپ, جاڭا نورمالار مەن وزىق تەحنولوگيالىق جابدىقتارمەن تانىستى.
بۇل ءوز كەزەگىندە وتاندىق ارحيۆشىلەر ءۇشىن وڭىرلىك ارحيۆتەردە ءتيىستى ارحيۆتىك ادىستەمەلىك بازانى قالىپتاستىرۋدا, قۇجاتتاردى جيناقتاۋدا جانە ساقتاۋ بويىنشا قۇرالداردى جەتىلدىرۋدە ۇلكەن جونسىلتەر بولارى ءسوزسىز. كونگرەستە ەلدەردىڭ ارحيۆ مەكەمەلەرى اراسىنداعى بىرلەسكەن ءىس-شارالاردى ۇيىمداستىرۋدىڭ, الداعى جىلدارعا ارنالعان ءىس-قيمىل جوسپارلارى تالقىلانىپ, حالىقارالىق ارحيۆشىلەر كونگرەسىن ءداستۇرلى تۇردە وتكىزىپ تۇرۋ ماسەلەسى كۇن تارتىبىندە قولداۋ تاپتى.
كونگرەسس اياسىندا فورۋمنىڭ قورىتىندى قۇجاتىنىڭ جوباسى – ارحيۆتەردىڭ ىنتىماقتاستىعى تۋرالى دەكلاراتسيا تالقىلانىپ, قابىلداندى. كەلەسى «اشىق قوعامعا – اشىق ارحيۆ» حالىقارالىق ارحيۆشىلەرىنىڭ كونگرەسى ەكى جىلدان كەيىن 2024 جىلى قازاقستاندا بولاتىنى جوسپارعا الىندى.
الماتى
