دارىنىمەن دارالانعان التى جاسار قىز بۇل ونەر بايگەسىنە «الاشوردا» اتتى كارتينالار توپتاماسىن ۇسىنىپتى. بۇلاردا جيىرماسىنشى عاسىرداعى قازاق زيالىلارىنىڭ جارقىن بەينەلەرى كورىنىس تاپقان.
كادەلى كونكۋرسقا تۇسكەن تۋىندىلاردى الەمنىڭ ءار شالعايىنان كەلگەن 58 قازىلار القاسى ساراپقا سالىپتى. ايى وڭىنان تۋعان ايشا تالانتتار تايتالاسىندا توپ جارىپ قانا قويماي, ۇزدىكتەر ۇكىلەنگەن پروديۋسەرلىك كاتالوگكە دا ەنىپتى.
ايتا كەتەتىن جايت, ايشانىڭ سۋرەتى بويىنشا ءاليحان بوكەيحان, احمەت بايتۇرسىن ۇلى, مىرجاقىپ دۋلاتوۆ سەكىلدى الاش ارىستارى شەتەلدىك VOGUE جۋرنالىنىڭ مۇقاباسىندا بەينەلەنگەن. ءبىر قىزىعى, قيالى جۇيرىك قىلقالام شەبەرى كەيىپكەرلەرىنىڭ ۇستىنە قازىرگى تاڭدا ەكىنىڭ ءبىرى تابا المايتىن ءساندى كوستيۋمدەر «كيگىزىپتى». ول ءوزىنىڭ بۇل سۋرەتتەرىن الەۋمەتتىك جەلى ارقىلى تورتكۇل دۇنيەگە تەگىس تاراتىپ ۇلگەرىپتى.
اناسىنىڭ ايتۋىنشا, ايشا بەس جاسىنان باستاپ سۋرەت سالۋمەن اۋەستەنىپ, ون ەكىگە تولعاندا كەنەپكە پەيزاجدار مەن كەلىستى پورترەتتەر جازىپ اجەپتاۋىر ماشىقتانعان كورىنەدى.
«الاقانعا سالىپ ايالاعان ايشامىز قارشاداي كەزىندە قانت ديابەتىمەن اۋىرىپ, ءۇي-ىشىمىزبەن قاتتى ۋايىمدادىق. ءارى-ءسارى كۇيدەن ايتەۋىر شىقتىق-اۋ. بىردە استاناعا تويعا باردىق. سول جولى كۇيەۋ بالامىز ءبىزدى مۋزەيگە اپاردى. كوز قۋانتار كورمەنىڭ ۇستىنەن تۇستىك. قىزىمىز ەكسپوزيتسياعا قويىلعان كارتينالارعا تەلمىرە قاراپ ۇزاق تۇردى. سودان كەيىن-اق ول تالاپتىڭ تاي جۇيرىگىن ەرتتەپ ءمىنىپ, ونەر جولىنا ءبىرجولا بەت بۇردى», دەيدى اناسى اعىنان جارىلىپ.
بۋىرقانعان بوياۋلار سىرىنا قانىققان قابىلەتتى بويجەتكەن بۇدان كەيىن كوپتەگەن بايقاۋعا قاتىسىپ, قاپتاعان جۇلدەنى قانجىعاسىنا بايلادى. ەگيپەت, بولگاريا, كولۋمبيا جانە باسقا ەلدەردە وسى سالانىڭ مايىن ىشكەن مارعاسقالاردان ماقتاۋ ەستىدى.
بولاشاعىنان ۇلكەن ءۇمىت كۇتتىرەتىن ورەلى ورەنىمىز ونەرسۇيەر قاۋىمعا اسسول ەسىمىمەن تانىمال يلليۋستراتور-گرافيك وتانداسىمىزدى وزىنە ۇلگى تۇتادى. وعان ءتىپتى ەشكىمدى تەڭگەرمەيدى.
ەڭ باستىسى, بالعىن سۋرەتشى تۋعان ەلىنىڭ تاريحىنا قاتتى قىزىعادى, حالقىن سۇيەدى. الاششىل اتالارىنىڭ سۋرەتىن سالىپ, البيون تورىندە اسقاقتاتۋىنىڭ ءتۇپ سەبەبى, ءسىرا سوندا بولسا كەرەك.
