اوسشك ترانسفورماتسياسى جونىندەگى استانا مالىمدەمەسى

ءبىز, ازياداعى ءوزارا ءىس-قيمىل جانە سەنىم شارالارى كەڭەسىنىڭ (اوسشك) مۇشە مەملەكەتتەرىنىڭ مەملەكەت نەمەسە ۇكىمەت باسشىلارى استانادا اوسشك پروتسەسىنىڭ 30 جىلدىعىنا وراي 2022 جىلعى 12-13 قازاندا جينالىپ,

ىنتىماقتاستىعىمىزدىڭ كەلەسى باعىتىن تومەندەگىدەي بەلگىلەۋگە شەشىم قابىلدادىق:

1. وسىمەن ءبىز اوسشك-ءنى تولىققاندى وڭىرلىك حالىقارالىق ۇيىمعا بىرتىندەپ, كەزەڭ-كەزەڭىمەن جانە كونسەنسۋسقا نەگىزدەلگەن قايتا قۇرۋدىڭ قۇرىلىمدى, ينكليۋزيۆتى جانە اشىق كەلىسسوزدەر پروتسەسىن ىسكە قوسامىز;

2. اوسشك-ءنى قايتا قۇرۋ ۇدەرىسى كەلەسى نەگىزگى ماقساتتاردى كوزدەيدى: ءبىزدىڭ بولاشاق ىنتىماقتاستىعىمىزدىڭ جان-جاقتى سالالارىن ايقىنداۋ جانە ىقپالداستىعىمىزدىڭ ۇيىمدىق جانە ينستيتۋتسيونالدىق نەگىزىن نىعايتۋ;

3. سونداي-اق, ءبىز ۇيىمىمىزدى ونىڭ مۇشە مەملەكەتتەرىنىڭ سەرپىندى, ءادىل, جان-جاقتى جانە تەڭگەرىمدى ەكونوميكالىق وسۋىنە, بايلانىستارىنا, الەۋمەتتىك جانە مادەني دامۋىنا ىقپال ەتۋشى رەتىندە قاراستىرامىز. ءبىز قاۋىپسىز جانە گۇلدەنگەن وڭىرگە قول جەتكىزۋ جولىندا جيىرما ءبىرىنشى عاسىرداعى ورتاق ماسەلەلەرىمىزدىڭ بىرلەسكەن شەشىمدەرىن ىزدەستىرۋ جانە بۇۇ جارعىسىنا سايكەس داۋلاردى بەيبىت جولمەن شەشۋگە ۇمتىلۋ ءۇشىن ۇيىمىمىزدىڭ ءبىر بولىگى رەتىندە ۇجىمدىق جۇمىسىمىزدى نىعايتامىز;

4. ءبىزدىڭ ۇيىم ناتيجەلەرگە باعىتتالعان جانە ءبىزدىڭ وڭىردە كونسەنسۋسقا نەگىزدەلگەن كوپجاقتى ىنتىماقتاستىقتى نىعايتۋ ماقساتىندا بارلىق مۇشە مەملەكەتتەر ءۇشىن مۇددەلى سالالاردا, سول ماقساتتار مەن قاعيداتتاردى بولىسەتىن باسقا مەملەكەتتەرمەن, ۇيىمدارمەن جانە فورۋمدارمەن ءوزارا ءىس-قيمىل جاسايدى جانە ىنتىماقتاسادى;

5. ترانسفورماتسيا پروتسەسىنىڭ العاشقى قادامى رەتىندە مىناداي شەشىمدەردى قابىلدادىق:

(1) مەملەكەت نەمەسە ۇكىمەت باسشىلارىنىڭ كەزدەسۋى (سامميت) جانە سىرتقى ىستەر مينيسترلەرىنىڭ كەزدەسۋى (مينيسترلەر كەزدەسۋى) بۇدان بىلاي تيىسىنشە مەملەكەت نەمەسە ۇكىمەت باسشىلارىنىڭ كەڭەسى (سامميت) جانە سىرتقى ىستەر مينيسترلەرىنىڭ كەڭەسى (مينيسترلەر كەڭەسى) دەپ اتالادى;

 (2) اوسشك حاتشىلىعىنىڭ اتقارۋشى ديرەكتورى بۇدان بىلاي باس حاتشى دەپ اتالادى;

(3) حاتشىلىق مۇشە مەملەكەتتەرگە توراعالىق ارقىلى ءتيىستى باسقارۋشى ورگانداردىڭ بەكىتىلۋىنە اوسشك-ءنىڭ ءتيىستى قۇجاتتارىنا تۇزەتۋلەر بويىنشا ۇسىنىستار ەنگىزەدى;

6. مۇشە مەملەكەتتەر ترانسفورماتسيالىق پروتسەستىڭ ەلەمەنتتەرىن (قاشان جانە ەگەر بۇل ورىندى بولعان جاعدايدا), ونىڭ ىشىندە مۇشەلىك كريتەريلەرىن انىقتايدى. وسى باعىتتا ناقتى ىلگەرىلەتۋدى قامتاماسىز ەتۋ ماقساتىندا ءبىز باس حاتشىنىڭ قولداۋىمەن توراعالىق ەتۋدى جانە مۇشە مەملەكەتتەرمەن تىعىز ۇيلەستىرە وتىرىپ, 2023 جىلى مۇشە مەملەكەتتەردىڭ قاراۋى ءۇشىن ترانسفورماتسيا پروتسەسىن ىسكە اسىرۋدىڭ قاجەتتى شارالارىنىڭ جول كارتاسىن قالىپتاستىرۋ جونىندە ۇسىنىستاردى ازىرلەۋدى سۇرايمىز;

7. ءبىز اوسشك دامۋىنىڭ 30 جىلىندا قول جەتكىزگەن ەلەۋلى جەتىستىكتەرىمەن قۇتتىقتايمىز جانە توراعالىقتان مينيسترلەر كەڭەسى مەن مەملەكەت جانە ۇكىمەت باسشىلارى كەڭەسىنىڭ كەلەسى كەزدەسۋلەرىنە ترانسفورماتسيالىق پروتسەستىڭ بارىسى تۋرالى ەسەپ بەرۋدى سۇرايمىز.