اققۋدى انمەن قايىرعان...

قاشاندا قالام ۇستاپ, ءسوزدىڭ قۇدىرەتىنە جەتكەن قالامگەرلەرىن ارداق تۇتىپ, الاقاندارىنا سالىپ قۇرمەت كورسەتەتىن باتىرلار مەن اقىندار ەلى – الماتى وبلىسى, جامبىل اۋدانىنىڭ ورتالىعى ۇزىناعاشتا جىر سۇلەيى ءسۇيىنباي مەن جامبىل جاكەسىنىڭ ءىزىن قۋعان اقىن, كوسەمسوز شەبەرى, قارىمدى جۋرناليست ورىسباي ءابدىلدا ۇلىنىڭ شىعارماشىلىق كەشى دۇركىرەپ ءوتتى. كەش يەسىنىڭ ءجۇرىپ وتكەن ءومىر جولىنان سىر اقتارىپ, بايان ەتكەن قازاقستان جازۋشىلار وداعى باسقارما توراعاسىنىڭ كەڭەسشىسى, «ان ارىس» باسپاسىنىڭ اتقارۋشى ديرەكتورى, بەلگىلى اقىن كادىربەك قۇنىپيا ۇلى «ۇزىناعاشتان باستالعان ۇزاق جولعا» توقتالىپ, قالامگەردىڭ بولمىسىن, ادامي قاسيەتتەرىن, قازاق ءسوز ونەرىنىڭ قايتپاس قارا نارىنا, شىعارماشىلىق دەپ اتالاتىن سان سالالى رۋحاني ءورىستىڭ شاربولاتتاي الداسپانىنا اينالعان ورىسباي اعاسىنا دەگەن ىنىلىك لەبىزىن ءبىلدىردى. – ءار قالامگەردىڭ شىعارما­شىلىق الەمگە كەلۋ جولدارى ارقيلى. بىرەۋ تەمىردەن كەلەدى, بىرەۋ كومىردەن كەلەدى, ەندى ءبى­رەۋ جەڭىلدەن كەلەدى دەگەندەي. ءبى­راق كلاسسيكالىق جول بىرەۋ عانا. ول – شىعارماشىلىققا تىكە­لەي ومىردەن كەلۋ! ورىسباي اعا شىعارماشىلىققا ءومىردىڭ وزىنەن كەلگەن قالامگەر. ءوزى بىلاي دەيدى: «قوي دا باقتىم, كوكپار دا تارتتىم, ءشوپ تە شاپتىم, جۇك تە تاسىدىم, ماشينە دە ءجۇر­گىزدىم, تراكتور وتالدىردىم, بوز كىلەمدە بەلدەستىم, تۋرنيكتە شىر اينالدىم, گارمون سوزىپ, ماندولين تارتتىم, دومبىرا شەرتتىم, ساۋىق-سايران كەشتىم, جەتى رەت ءولىم اۋزىنان قالدىم. بۇل دا بولسا ۇلكەن ولجا شىعار...». مىنە, وسىنداي ازاماتتى ءومىر كور­مەدى, شىعارماشىلىققا ءومىردىڭ وزىنەن كەلمەدى دەپ ايتا الاسىز با؟», – دەي كەلە بايانداماشى «وي توعىس» كىتابىنىڭ باسپادا جاتىپ, مينيسترلىك شەشپەگەن شەشۋدى جامبىل اۋدانىنىڭ اكى­مى ماحاببات سادۋاقاس ۇلى باس-اياعى ەكى اپتادا, وعان قوسا «توي بولسىن» جيناعىن شىعارۋعا مۇ­رىندىق بولعانىن تىلگە تيەك ەتىپ, اقىنىن قادىرلەگەن اكىمگە العىس ءبىلدىردى. ادەمى كەشتە جازۋشىنىڭ قا­لام قارىمى, ازاماتتىعى جايلى بىرقاتار ادەبيەت تارلاندارى ءىلتيپات سوزدەرىن, جۇرەكتەن شىققان جىر جولدارىن ارنادى. جازۋشىلار وداعىنىڭ اتىنان كورنەكتى قالامگەر, «قازاق ادەبيەتى» گازەتىنىڭ باس رەداكتورى جۇماباي شاشتاي ۇلى ورەكەڭنىڭ باۋىرمالدىعى, ازاماتتىعى جايلى اسەرلى اڭگىمە شەرتىپ, يىعىنا جازۋشىلاردىڭ اتىنان شاپان جاپسا, چەشەنستاننىڭ باتىرى, قازاقتىڭ كورنەكتى اقىنى رافاەل نيازبەكوۆ: «...قىل قوبىزىن سارناتىپ قوڭىر كەشتىڭ, تاۋلى ءوڭىردىڭ وي تۇزەپ تورىندە ءوستىڭ. ۇرى-قارى كوبەيگەن بۇل زاماندا, الا ءجىپتى اتتاماي ءومىر كەشتىڭ...» دەپ, ال «ەگەمەن قازاقستان» گازەتى الماتى بولىمشەسىنىڭ جەتەكشىسى, بەلگىلى اقىن, كوسەمسوز شەبەرى, سىيلاس ءىنىسى قورعانبەك امانجول: «جانىڭدا ءزاھارىڭ جوق, ءزام-ءزام عانا, تاپ-تازا تىنىستايسىڭ تاڭنان عانا, سەندەگى سەرى جۇرەك اعاتاي-اۋ, جارالعان اپپاق نۇردان, اردان عانا...» دەگەن جىر جولدارىن ارنادى. الاش سىي­لىعىنىڭ لاۋرەاتى, كورنەكتى جا­زۋشى مارحابات بايعۇت ورە­كەڭ­نىڭ ادامدىقتىڭ اراسىندا ناداندىق دەيتىن «مينا, سنارياد جارىقشاقتارىنان», ادالدىقتىڭ اراسىنداعى جاماندىق دەگەن «بومبادان» تازارتىپ جۇرگەن «ساپەر» سياقتى ەلەمەيتىنىن, قازىر كوپ جەردە جازۋشىلار جا­سىپ, جاسقانشاقتاپ قالعان جاعدايدا اعالارىن جاسىتپاي, جال­تاقتاتپاي مەرەيىن كوتەرىپ, توي جاساپ جاتقان ورەكەڭنىڭ ەل-جۇرتىنا, ەل ازاماتتارىنا راحمەت ايتتى. سونداي-اق, «جاس الاشتا» بىرگە قىزمەتتەس بولعان «ونەر» باسپاسىنىڭ دي­رەكتورى, جازۋشى اشىربەك كوپىش, ورىسباي اعانىڭ زەينەتكە شىعاردا قىزمەت اتقارعان «جەتىسۋ» گازەتى ۇجىمىنىڭ اتىنان باسىلىمنىڭ باس رەداكتورى, اقىن ءنۇسىپباي ءابدىراحىم, ءوزى جۋرناليستىك ەڭبەك جولىن باستاعان اۋداندىق «اتامەكەن» گازەتىنىڭ باس رەداكتورى راتبەك تەرلىكباەۆ, بەلگىلى عالىم, اكادەميك تولەگەن قوجامقۇلوۆ, پارتالاس دوسى نۇرمانبەت قيزاتوۆ, جامبىل اۋىلدىق اقساقالدار القاسىنىڭ توراعاسى ماناپ تۇراپوۆ, ت.ب. ادەمى ەستەلىكتەر اي­تىپ, شىعارماشىلىق تابىس, مىقتى دەنساۋلىق تىلەدى. كەشتە اقىننىڭ جىرلارى وقىلىپ, اۋداننىڭ «قۇلان ساز» فولكلورلىق ءانسامبلىنىڭ انشىلەرى جىرقۇمار قاۋىمعا ءان مەن كۇيدەن شاشۋ شاشتى. اسىرەسە, حالىقارالىق بايقاۋلاردىڭ جە­ڭىمپازى, جاس ءانشى الەكساندر نەچەسوۆ اقىننىڭ ناۋرىزباي با­تىردىڭ رۋحىنا ارنالعان «با­­تىرعا باس يۋ» ءانى مەن قا­زاق­ستان­نىڭ ەڭبەك سىڭىرگەن ءارتىسى, جە­تىسۋدىڭ جەزتاڭداي ءارتىسى ۇلجان ايناقۇلوۆانىڭ ورىنداۋىنداعى قايىرماسى «...الەمگە اتى جا­ي­ىل­­عان, اققۋدى انمەن قايىرعان. جەبەپ جۇرگەن كيەسى, اقپا جىردىڭ يەسى, كوك جايلاۋدىڭ تورەسى, ءسۇيىنباي, جامبىل جەرى وسى» دەپ كەلەتىن «مايتوبە» ءانى جينالعان جۇرت­شىلىقتى كەرەمەت اسەرگە بولەدى. گۇلزەينەپ سادىرقىزى, «ەگەمەن قازاقستان». الماتى وبلىسى, جامبىل اۋدانى.