«اسا ماڭىزدى ماسەلە – حالىقتىڭ الەۋمەتتىك وسال توپتارىن جۇمىسپەن قامتۋ. ول ءۇشىن كاسىپكەرلەرگە جاعداي جاساۋ كەرەك. بيىلعى جىلى ۇلتتىق جوبالاردى ىسكە اسىرۋ شەڭبەرىندە 269 مىڭنان استام جۇمىس ورنى قۇرىلۋى ءتيىس. قازىرگى ۋاقىتتا 203 مىڭنان استام ادام جۇمىسقا ورنالاستى. ولاردىڭ 175 مىڭى – ۋاقىتشا جۇمىس. ءبىز تۇراقتى جۇمىس ورىندارىن كوبەيتۋگە كۇش سالۋىمىز كەرەك», دەپ اتاپ ءوتتى پرەمەر-مينيستر.
ول ءۇشىن تسيفرلىق تەحنولوگيالارعا سۇيەنۋ ماڭىزدى. مەملەكەتتىك ورگانداردىڭ جۇيەلەرىن تولىق ينتەگراتسيالاي وتىرىپ, جۇمىسپەن قامتۋ سەرۆيستەرىنىڭ بارلىعىن تسيفرلاندىرۋ قاجەت.
«وتباسىنىڭ تسيفرلىق كارتاسى, ەلەكتروندىق ەڭبەك بيرجاسى مەن جۇمىس ورىندارىن قۇرۋدىڭ ينتەگراتسيالانعان كارتاسىن بىرىكتىرگەننەن كەيىن, جۇمىسسىز جۇرگەندەرگە ەلەكتروندىق حابارلامالار ارقىلى ۆاكانسيالار ۇسىنۋعا بولادى», دەدى ءا. سمايىلوۆ.
جۇمىسسىزدارعا ءوتىنىش جازباي-اق بوس جۇمىس ورىندارىن ۇسىنۋ ماڭىزدى. مۇنداي قىزمەتتەردى سمارتفون ارقىلى قولجەتىمدى ەتۋ قاجەت. جاستاردى جۇمىسپەن قامتۋدىڭ جاڭا تاسىلدەرى مەن مەحانيزمدەرىن ەنگىزۋگە ەرەكشە نازار اۋدارۋ كەرەك.
«جىل سايىن ەڭبەك نارىعىنا 300 مىڭعا جۋىق جاس شىعادى. ولاردىڭ جۇمىس تاجىريبەسى جوق, سوندىقتان جاستارعا ءبىرىنشى كەزەكتە جۇمىسقا ورنالاسۋعا كومەكتەسۋ كەرەك. ءى جارتىجىلدىقتىڭ قورىتىندىسى بويىنشا NEET ساناتىنداعى جاستاردىڭ سانى ۇلىتاۋ, شىعىس قازاقستان, قاراعاندى, قىزىلوردا, جامبىل جانە الماتى وبلىستارىندا كوپ. ال بۇل وڭىرلەردە ماماندارعا سۇرانىس كوپ. اتالعان وبلىستاردىڭ اكىمدىكتەرى جاستاردى وقىتىپ, جۇمىسقا ورنالاستىرۋ ماسەلەسىن باقىلاۋعا السىن. جاستارعا جۇمىسپەن قامتۋعا جاردەمدەسۋ شارالارى تۋرالى جەتكىلىكتى اقپارات بەرىلمەيدى. سوندىقتان وسى باعىتتا اقپاراتتىق-ءتۇسىندىرۋ جۇمىسىن كۇشەيتۋ قاجەت», دەدى ۇكىمەت باسشىسى.
