وتىرىستى اشقان ۇلتتىق عىلىم اكادەمياسىنىڭ پرەزيدەنتى, اكادەميك مۇرات جۇرىنوۆ الداعى قازاقستان رەسپۋبليكاسى پرەزيدەنتىنىڭ سايلاۋىنا ق.توقاەۆتىڭ كانديداتۋراسىن ۇسىندى. اكادەميا پرەزيدەنتى كىرىسپە سوزىندە مەملەكەت باسشىسىنىڭ اكادەميالىق عىلىمعا ەرەكشە نازار اۋدارىپ وتىرعانىن اتاپ ءوتتى. «پرەزيدەنت ق.توقاەۆ عىلىم ورداسىنا مەملەكەتتىك مارتەبە بەرۋ قاجەتتىگىن ايتتى. بۇل عالىمداردىڭ ەل پرەزيدەنتىنە دەگەن ريزاشىلىعىن تۋدىرعان, كوپتەن كۇتكەن شەشىم ەدى. قاسىم-جومارت كەمەل ۇلى جوعارى ادامگەرشىلىككە, ادامي ىزگى قاسيەتتەرگە يە. ءدال وسىنداي تۇلعا مەملەكەت باسشىسى بولۋعا ابدەن لايىق», دەدى م.جۇرىنوۆ.
جيىندا ۇلتتىق عىلىم اكادەمياسىنىڭ ۆيتسە-پرەزيدەنتى زارەما شاۋكەنوۆا پرەزيدەنت ق.توقاەۆتىڭ ايرىقشا قۇزىرەتتىلىگى مەن جوعارى كاسىبيلىگىن اتاپ ءوتتى. «ول – ماسەلەنىڭ تەرەڭىنە ءۇڭىلىپ, كۇردەلى جاعدايلاردا ۇتىمدى شەشىم تابۋدىڭ جولدارىن ىزدەيتىن ادام. ق.توقاەۆ ءوزىن ەرىك-جىگەرى بار جانە قۇزىرەتتى مەملەكەت قايراتكەرى رەتىندە كورسەتە ءبىلدى», دەدى ول.
فيلوسوفيا, ساياساتتانۋ جانە ءدىنتانۋ ينستيتۋتىنىڭ باس ديرەكتورى, اكادەميك سەرىك سەيدۋمانوۆ مەملەكەت باسشىسىنىڭ الەۋمەتتىك-ساياسي ماسەلەلەردىڭ دارىندى اناليتيگى رەتىندەگى كاسىبي قۇزىرەتىن اتاپ ءوتتى.
وتىرىستا سونداي-اق ا.بايتۇرسىن ۇلى اتىنداعى ءتىل ءبىلىمى ينستيتۋتىنىڭ باس عىلىمي قىزمەتكەرى, اكادەميك زەينەپ بازارباەۆا, ۇلتتىق عىلىم اكادەمياسىنىڭ اكادەميكتەرى مامبەت قويگەلدى, قايروللا راحيموۆ, زايروللا دۇيسەنبەكوۆ, سەرعازى ادەكەنوۆ, ۆياچەسلاۆ لوكشين, مىرزاكارىم الشىنباەۆ, دارياكۇل قوجامجاروۆا, ءابدىراسۇل جارمەنوۆ, اكادەميانىڭ كوررەسپوندەنت-مۇشەلەرى تالعات نۇرعوجين, زيابەك قابىلدينوۆ, ءلاززات نۇرقاتوۆا, فيلوسوفيا, ساياساتتانۋ جانە ءدىنتانۋ ينستيتۋتىنىڭ ساياسي زەرتتەۋلەر ورتالىعىنىڭ ديرەكتورى, ساياساتتانۋشى ايدار امىرەباەۆ, ساياساتتانۋ عىلىمدارىنىڭ دوكتورلارى رۇستەم قادىرجانوۆ, يۋري بۋلۋكتاەۆ, ساياسي تالداۋشى زامير قاراجانوۆ كەزەكتەن تىس پرەزيدەنت سايلاۋىندا مەملەكەت باسشىسى ق.توقاەۆتىڭ كانديداتۋراسىن قولداۋ تۋرالى پىكىرلەرىمەن ءبولىستى.
جيىن قورىتىندىسىندا اكادەميا پرەزيدەنتى مۇرات جۇرىنوۆ: «بارلىق جان-جاقتى جانە تەرەڭ رەفورمالار باعدارلاماسى جالپىۇلتتىق رەفەرەندۋمدا ماقۇلدانعان كونستيتۋتسياعا تۇزەتۋلەردەن جانە پرەزيدەنتتىڭ 2022 جىلعى 1 قىركۇيەكتە قازاقستان حالقىنا جولداۋىندا ايتىلعان ىرگەلى باستامالارىنان باستالدى. قاسىم-جومارت كەمەل ۇلى ۇسىنعان جانە قوعام قولداۋىنا يە بولعان مەرزىمىنەن بۇرىن پرەزيدەنتتىك سايلاۋدىڭ ماقساتى – قازاقستاننىڭ جاڭا سەرپىلىسىنە جاعداي جاساۋ, سىبايلاس جەمقورلىقتى, جۇمىسسىزدىقتى جويۋ, حالىقتىڭ ءال-اۋقاتىن جاقسارتۋ», دەدى.
دايىنداعان
ورالحان احماديا,
«Egemen Qazaqstan»
