عاسىرعا جۋىق جوڭكىلگەن ۋاقىتتىڭ سەكسەن بەس جىلى جان-جۇرەگىن ايقارا اشىپ, باۋىرىنا باسقان قازاق ەلىنە تيەسىلى. قۇرىلعان كۇنىنەن باستاپ كورەي حالقىنىڭ ومىرىمەن تىعىز بايلانىستى تىرشىلىك كەشىپ كەلە جاتقان تەاتر قازاقستاندا ءومىر سۇرەتىن بارلىق كورەيلەردىڭ باسىن قوسىپ, ءتىلى مەن ءدىلىن ۇمىتتىرماي, ونەرى مەن ءداستۇرىن ۇيىستىراتىن ءىرى ورتالىق رەتىندە وتانىمىزدىڭ كوپۇلتتى مادەنيەتىنىڭ بولىنبەس ءبىر بولشەگىنە اينالىپ كەتكەن.
رەسپۋبليكاداعى ەڭ وزىق شىعارماشىلىق ۇجىمداردىڭ ورتاسىندا ءوز ورنى بار مەملەكەتتىك اكادەميالىق كورەي مۋزىكالىق تەاترىنىڭ سالتاناتتى جيىنى ءۇش تىلدە – قازاق, كورەي جانە ورىس تىلدەرىندە جۇرگىزىلگەنى, اسىرەسە جۇرگىزۋشىلەر مەن شاقىرىلعان قوناقتاردىڭ قازاق جانە كورەي تىلدەرىنە باسىمدىق بەرە سويلەگەنى تەاتردىڭ مەملەكەتتىك ءتىل ساياساتىن دامىتۋعا نەمقۇرايدى قارامايتىنىن, قازاق ءتىلىن شىنايى قادىر تۇتاتىنىن بايقاتادى. تەاتر ارتىستەرىنىڭ دەنى مەملەكەتتىك ءتىلدى ەركىن مەڭگەرگەن, ال جۇرگىزۋشى سەرگەيدىڭ ءتىلى ءتىپتى جاتىق. تەاتردى مەرەيتويىمەن قۇتتىقتاپ كەلگەن قوناقتار دا اق تىلەگىن مۇمكىندىگىنشە قازاق تىلىندە اقتارىپ, كورەي مەن قازاق ەلىنىڭ تۋىستىعىن وسى ورىستەن تاۋىپ, تارقاتىپ جاتتى.
مادەنيەت جانە سپورت مينيسترلىگى مادەنيەت كوميتەتى توراعاسىنىڭ ورىنباسارى دانيار اليەۆ تەاتردىڭ تورقالى توقسان جىلدىق تويىنا تارتۋ رەتىندە بىرقاتار ارتىستەر مەن قىزمەتكەرلەردى توسبەلگىمەن ماراپاتتادى. مادەنيەت سالاسىنىڭ دامۋىنا ەرەكشە ۇلەس قوسقان ەڭبەگى ءۇشىن «مادەنيەت سالاسىنىڭ ۇزدىگى» توسبەلگىسىمەن سەرگەي كيم, ال قۇرمەت گراماتوسىمەن PhD, حالىقارالىق بايقاۋلاردىڭ لاۋرەاتى اننا تسوي, رومان تسوي, اناستاسيا تسوي, Super star KZ بايقاۋىنىڭ قاتىسۋشىسى, I m singer Kazakstan بايقاۋىنىڭ جەڭىمپازى رومان كيم, تەاتردىڭ جەتەكشى ءارتىسى ناتاليا لي ماراپاتتالسا, مينيسترلىكتىڭ العىس حاتى تەاتردىڭ باس بالەتمەيستەرى لاريسا كيم, قازاقستاننىڭ ەڭبەك سىڭىرگەن ءارتىسى زويا كيم, تەاتر ارتىستەرى ەڭلىك ءاشىموۆا, كونستانتين پاك, ەۆگەنيا يۋنعا تاپسىرىلدى.
الماتى قالالىق مادەنيەت باسقارماسىنىڭ وكىلى ماقسات جايىقوۆ, قازاقستان حالقى اسسامبلەياسى سەكرەتارياتى ەتنوسارالىق قاتىناستاردى دامىتۋ ءبولىمىنىڭ جانە الماتى قالاسى قوعامدىق دامۋ باسقارماسىنىڭ باسشىسى نازار بالعىمباەۆ قۇتتىقتاپ, قازاقستان مادەنيەتىن بايىتىپ, ونەرىن تۇرلەندىرۋ جولىندا ولشەۋسىز ەڭبەك ءسىڭىرىپ كەلە جاتقان كورەي تەاترىنىڭ وسى سالاداعى جاڭاشىلدىق پەن زاماناۋي ىزدەنىس جولىنداعى ماقساتىن جان-جاقتى اتاپ ءوتتى. قازاقستانداعى كورەي قاۋىمداستىعىنىڭ توراعاسى يۋري شين تەاتر ارتىستەرى انگەلينا يۋگاي مەن باقتيار رازيەۆكە كيم دين اتىنداعى سىياقىنى تابىستادى. سونداي-اق سالتاناتتى جيىنعا كورەيا رەسپۋبليكاسىنىڭ قازاقستان رەسپۋبليكاسىنداعى باس كونسۋلى پاك نە چحون ارنايى كەلىپ قاتىستى. «قازاقستانداعى كورەي مەملەكەتتىك اكادەميالىق دراما تەاترى تاريحي وتانىنان جىراقتا ءومىر سۇرەتىن كورەيلەردىڭ ءتىلىن, تاريحىن, ءداستۇرىن ساقتاۋ جولىندا اۋقىمدى ءىس اتقارىپ وتىرعان كۇللى الەمدەگى بىرەگەي ماڭىزى بار تەاتر. توقسان جىلدىق تاريحىندا تەاتر ءوز ەلىنىڭ, الىس-جاقىن پوستكەڭەستىك ەلدەردىڭ كورەرمەندەرىنە كاسىبي شەبەرلىكتىڭ ۇلگىسىن كورسەتىپ قويماي, حالىقارالىق ونەر الاڭدارىنىڭ بيىك باعاسى مەن اۋقىمدى بايگەلەردىڭ ماراپاتىنا يە بولدى. وسى تەاتردىڭ ارقاسىندا قازاقستانداعى جانە ورتالىق ازياداعى كورەيلەر ۇلتتىق بىرەگەيلىگى مەن بەت-بەينەسىن ساقتاي الدى. كورەي تەاترىنىڭ دامۋى ءۇشىن ۇزدىكسىز قولداۋ كورسەتىپ كەلە جاتقان قازاقستان رەسپۋبليكاسىنىڭ ۇكىمەتىنە العىس بىلدىرەمىن», دەدى باس كونسۋل پاك نە چحون.
تاۋەلسىزدىكتىڭ العاشقى جىلدارىندا تەاتر مەن ساحنانى ساقتاۋ جولىنداعى تاۋقىمەتكە توتەپ بەرىپ, كورەي تەاترىنىڭ وركەندەۋى ءۇشىن ايانباي تەر توگىپ, وتىز جىلعا جۋىق ديرەكتور بولعان ليۋبوۆ ني ۇزاق جىلدار بويى قازاقستانداعى كورەي مادەنيەتىنىڭ دامۋى ءۇشىن ونەر وشاعىنا دەمەۋشىلىك جاساپ, قولداپ كەلگەن دياسپورا وكىلدەرىنە, زيالى قاۋىمعا, كاسىپكەرلەر مەن جاي عانا قاراپايىم جاناشىر ازاماتتارعا العىسىن ءبىلدىردى. سالتاناتتى جيىننىڭ رەسمي ءبولىمى اياقتالعان سوڭ مەرەيتوي مەيماندارى مەن كورەرمەندەر «بىزگە 90!» سپەكتاكل-كونتسەرتىن تاماشالادى. باستى كەيىپكەر فلەيتاشى تەاتر جايلى, ونىڭ قىزىقتى دا قيىن ۇزاق تاريحى تۋرالى سىر شەرتىپ, تەاتر قىزمەتكەرلەرىنىڭ, كورەي تەاترىندا اتى قالعان بەلگىلى تۇلعالاردىڭ ءومىر جولى مەن جەتىستىگى جايلى باياندادى.
تاريحي وتانىنان باسقا الەمنىڭ بىردە-ءبىر ەلىندە بالاماسى جوق, تەك قازاق جەرىندە كوكتەپ, وركەن جايىپ, جەكە وتاۋ بولىپ وتىرعان كورەي تەاترى – ءوز حالقىنىڭ قىمبات قازىناسى, ماقتانىشى جانە ۇلتىنىڭ بايلىعى. كورنەكتى تەاتر قايراتكەرلەرىنىڭ شىعارماشىلىق شەبەرلىگىنىڭ نەگىزىندە شىڭدالىپ, كەيىنگى بىرنەشە بۋىن تالانتتى شاكىرتتەردىڭ ونەرىمەن ءوز ورنىن ايشىقتاعان تەاتردىڭ تاريحى قازاقستان كورەيلەرىنىڭ ومىرىمەن بىتە قايناسىپ, ءبىرتۇتاس تاريح پاراقتارىن تولىقتىرا بەرمەك.
الماتى
