كۇز مەزگىلى – سۋرەتشىلەر, مۇسىنشىلەر, ساندىك قولدانبالى ونەر شەبەرلەرى ءۇشىن شىعارماشىلىق شابىت كەزەڭى. جىل سايىن «التىن الما» كورمە-جارمەڭكەسىن ۇيىمداستىراتىن ورتالىق مەملەكەتتىك مۋزەيدىڭ سول شەبەردىڭ ءبارىن دە شاقىرىپ, قازاقستان جانە ورتا ازيا اۋماعىندا الما يدەياسىن شيراتا تۇسەتىنى قۇپتارلىق داستۇرگە اينالعان. الما يدەياسى – ءبىر عانا جەمىستىڭ تاريحى ەمەس, كوپقىرلى تالانت يەلەرى وعان شەكسىز ماعىنا سىيعىزادى. ناتيۋرمورت پەن پەيزاج, پورترەت پەن جانرلىق كورىنىستەر, كەسكىندەمە, گرافيكا, فوتوسۋرەتتەر مەن گوبەلەن, بيسەر مەن باتيك سياقتى ساندىك ونەر تۋىندىلارىندا كورىنىس تاپقان. ءبىر تاقىرىپتى ءار سۋرەتشى وزىنشە تارقاتادى, ءار شەبەر وزىنشە جىرلايدى. تانىس تاقىرىپتىڭ شەكسىز قيالمەن تۇرلەنىپ, دۇنيەتانىمعا دارا سيپاتىمەن قوزعاۋ سالاتىن قاسيەتى كەلگەندەردىڭ تاڭدانىسىن تۋدىرماي قويمايدى.
كورمەگە قازاقستاننىڭ بارلىق وڭىرىنەن, قىرعىزستان, وزبەكستان ەلدەرىنەن كەلگەن قولونەر شەبەرلەرى وزدەرىنىڭ ءساندى, اسەم بۇيىمدارى مەن كادەسىيلارىن, زەرگەرلىك بۇيىمدار, ديزاينەرلىك ويىنشىقتار, ادەمى قۇراق كورپەشەلەر, كيىزدەن جانە جىبەك ماتادان جاسالعان بۇيىمدار مەن كيىمدەر, سازدى اسپاپتار, شىعىس مينياتيۋراسى, توقىما, تەرىدەن جاسالعان زاتتار, ساندىقتار مەن كىلەمدەر ۇسىندى.
قولدانبالى ونەر تۋىندىلارىن قىزىقتاعاندار بۇل زاتتاردىڭ جاسالۋ تەحنيكاسىمەن تانىسىپ قانا قويماي, جىلداعى ءداستۇر بويىنشا شەبەرلىك ساباقتارى نەگىزىندە ءوز قولدارىمەن قىشتان قۇمىرا جاساپ, كيىز باسىپ, سۋرەت سالىپ, ءارتۇرلى كادەسىي جاساۋدىڭ ءادىس-ءتاسىلىن ۇيرەنەدى. مۇنىڭ ەڭ پايدالى جاعى, ادام بۇرىن بايقاماعان, بويىندا بۇعىپ جاتقان بەيمالىم قاسيەتىن تانىپ, قولونەردىڭ قانداي تۇرىنە بەيىمى بار ەكەنىن بىلە الادى. كورمە-جارمەڭكەدە مارات سارسەباەۆ قىش جاساۋدان, الەكساندرا ۆولكوۆا بيسەرمەن توقۋ ونەرى بويىنشا شەبەرلىك ساباعىن وتكىزگەندە, كەلگەندەردىڭ اسا ىقىلاسپەن نيەت تانىتقانى سوندىقتان بولسا كەرەك.
كورمە-جارمەڭكەنى ۇيىمداستىرۋشىلاردىڭ باستى ماقساتى – ورتالىق ازيا حالىقتارىنىڭ ماتەريالدىق مادەنيەتىنىڭ الۋان تۇرلىلىگىن كورسەتۋ بولسا, قالا تۇرعىندارى مەن قوناقتارى قولونەر بۇيىمدارىنىڭ ۇزدىك ۇلگىلەرىمەن تانىسىپ, ءداستۇرلى جارمەڭكەنى الداعى جىلى اسىعا كۇتەتىنىن ايتىپ تارقاستى.
الماتى
