ساياسات • 05 قازان، 2022

ءوڭىر جانە وركەنيەت

104 رەت كورسەتىلدى

كەيىنگى بىرنەشە جىل الەم ءۇشىن دە، قازاقستان ءۇشىن دە اۋىر كەزەڭ بولعانى بەلگىلى. كوروناۆيرۋس ىندەتى جەر-جاھانعا قيىندىق تۋعىزدى. مەملەكەت باسشىسى قاسىم-جومارت توقاەۆتىڭ ەل تىزگىنىن قولىنا العاننان كەيىن وڭىرلەردى تولىقتاي ارالاۋىنا مۇمكىندىگى بولعان جوق.

سوڭعى ون كۇننىڭ كولەمىندە پرەزيدەنت بىرنەشە ءوڭىردى ارالاپ قايتتى. العاشقى ساپارىن تۇركىستان وبلىسىنان باستادى. ول جاقتا كوپتەگەن زيالى قاۋىم وكىلىمەن، شارۋالارمەن، تۇرعىندارمەن جانە جاستارمەن كەزدەستى. شىمكەنت قالاسىندا دا وسىنداي كەزدەسۋلەر ۇيىمداستىرىلدى. مەملەكەت باسشىسىنىڭ بۇل جولعى ساپارىن تۇگەل تۇركىنىڭ تەمىرقازىعىنا اينالعان تۇركىستاننان باستاۋىنىڭ ءمانى زور.

بىرىنشىدەن، قوجا احمەت ياساۋيگە زيارات جاساپ، ارۋاقتارعا ارناپ قۇران باعىشتاتىپ، تاعزىم ەتتى. مۇنى ەل ءۇشىن ماڭىزدى كەزەڭدە ۇلى تۇلعانىڭ باتاسىن العانمەن تەڭ دەپ تۇسىندىك. ەكىنشىدەن، شىمكەنت – كەيىنگى كەزدە مەگاپوليس اتاعىن العان، ەل دامۋىندا ماڭىزعا يە ىرگەلى شاھار. مەملەكەت باسشىسىنىڭ وسىنداي كەزەڭدە قالانىڭ تىنىس-تىرشىلىگىمەن تانىسۋدى ءجون ساناۋى دا – قۇپتارلىق قادام. اسىرەسە وڭىردە كاسىپكەرلىككە، شاعىن جانە ورتا بيزنەسكە قاتىستى قانداي جۇمىس ىستەلىپ جاتقانىن، الداعى ۋاقىتتا قانداي باعىتتا دامۋ قاجەتىن تالقىلاپ، پىكىر الماس­تى. كاسىپكەرلەرمەن كەزدەسىپ، مەملەكەتتىك باعىتتاعى ءوز كوزقاراسىمەن ءبولىستى.

سودان كەيىن جاڭادان قۇرىلعان اباي وبلىسىنا باردى. شىنىندا، بۇرىنعى سەمەي، قازىرگى اباي وبلىسى دامۋى كەنجەلەپ قالعان ءوڭىر ەكەنى بەلگىلى. بۇعان وڭىرلەرگە ساپار كەزىندە ءوزىمىز دە كۋا بولعانبىز. اۋىل شارۋاشىلىعىنا قاتىستى بىرنەشە سالادا بولماسا، قالعان باعىتتار ۇلكەن وزگەرىستى قاجەت ەتەتىن ەدى.

ءوز الدىنا جەكە وبلىس اتانعاننان كەيىن ۇلتتى ۇيىستىرعان ۇلىلار ولكەسىنە پرەزي­دەنتتىڭ بارۋى جاڭا سەرپىن بەرىپ، پارمەندى دامۋىنا، وبلىس مارتەبەسىنە ساي بولۋىنا جول اشادى. رەسپۋبليكالىق بيۋدجەتتەن اباي وبلىسىنا ترانسفەرت ارقىلى كوپتەگەن قارجى بولىنەدى. وسىلايشا، ءوڭىردىڭ، سونىڭ ىشىندە سەمەي قالاسى ينفراقۇرىلىمىنىڭ دامۋىنا، كاسىپكەرلىكتىڭ تىڭ سەرپىن الۋىنا، جولداردىڭ جوندەلۋىنە، تۇرعىن ءۇي قۇرىلىسىن جانداندىرۋعا مۇمكىندىك بەرەدى.

مەملەكەت باسشىسىنىڭ سەمەي قالاسىنا بارعان ساپارىنداعى ەرەكشە تۇسىنا نازار اۋدارعىم كەلىپ وتىر. اتاپ ايتقاندا، قازاق حالقىنىڭ تاريحىنا وشپەس ءىز قالدىرعان، ۇلى دەپ اتاۋعا لايىق ەكى تۇلعاعا ارنالعان ەسكەرت­كىش اشتى. مۇحتار اۋەزوۆ پەن قايىم مۇحا­مەد­­حانوۆتىڭ قاتار تۇرعان ەسكەرتكىشى ۇستاز بەن شاكىرتتى ۇلىقتاۋدىڭ ۇزدىك ۇلگىسى بولا ءبىلدى. سالتاناتتى راسىمدە پرەزيدەنت زيالى قاۋىم الدىندا ءسوز سويلەپ، جازۋشىلارعا، جالپى زيا­لى قاۋىمعا قاتىستى كوزقاراسىمەن ءبولىستى.

«بۇل – ۇستاز بەن شاكىرت، اعا مەن ءىنى ارا­سىنداعى رۋحاني بىرلىكتىڭ سيمۆولى. شىن مانىندە، قوس الىپتى بولە-جارىپ قاراۋ مۇمكىن ەمەس. ولار اباي مۇراسىن زەرتتەپ، دارىپتەۋگە ولشەۋسىز ەڭبەك ءسىڭىردى. ءتول ادەبيەتىمىزدى جاڭا بەلەسكە كوتەردى. مۇحتار اۋەزوۆ ابايدى، اباي ارقىلى قازاقتى بۇكىل الەمگە تانىتتى. ۇلى ويشىلدىڭ كوركەم بەينەسىن سومداپ، ونىڭ اسىل مۇراسىن ادامزاتتىڭ ورتاق قازىناسىنا قوستى. جازۋشىنىڭ ءار تۋىندىسى جۇرتىمىزدىڭ جۇرەگىنەن وشپەس ورىن الدى. مۇحتار اۋەزوۆ – الەم ادەبيەتىنىڭ شىڭىنا كوتەرىلگەن قالامگەر. ال قايىم مۇحامەدحانوۆ – ۇلى جازۋشىنىڭ جاقىن سەرىگى ءارى شاكىرتى. ول بۇكىل عۇمىرىن ابايتانۋ، شاكارىمتانۋ جانە الاشتانۋ عىلىمىنا ارنادى. قۋعىن-سۇرگىنگە ۇشىراسا دا، تاعدىردىڭ سىناعىنا قارسى تۇرىپ، ەلىنە ادال قىزمەت ەتتى»، دەدى مەملەكەت باسشىسى.

وسى ورايدا، ەكى تۇلعانى ءبىر-بىرىنەن بولەك قاراستىرۋعا بولمايتىنىن ايتا كەتكەن ءجون. مۇحتار اۋەزوۆ قازاقتىڭ كلاسسيك جازۋ­شى­لارىنىڭ ءبىرى بولسا، قايىم مۇحامەد­حانوۆ – مۇحتاردان ءتالىم العان تۇلعالاردىڭ ءبىرى.

نەگە پرەزيدەنت كەيىنگى كەزدە وڭىرلەردى ءجيى ارالاي باستادى؟ ونىڭ ەڭ باستى سەبەبى – پرەزيدەنت كەزىندە ءوزى ايتىپ وتكەندەي، مەملەكەت وڭىرلەردەن قۇرالادى. اۋىلدار، اۋداندار مەن كىشىگىرىم قالالار ىرگەتاسىن قالايدى. سوندىقتان كۇشتى ءوڭىر بولمايىنشا كۇشتى مەملەكەت قۇرا المايمىز. مۇنداي تۇجىرىمدامانى مەملەكەت باسشىسى حالىققا جولداۋلارىندا ءجيى كوتەرەدى. ەندەشە، وڭىرلەردى اياققا تۇرعىزباي، ەكونوميكاسىن جاقسارتپاي، كۇشتى مەملەكەت قۇرا المايمىز. پرەزيدەنتتىڭ وڭىرلەرگە ساپارىن وسى باعىتتى ىلگەرىلەتۋگە جول اشاتىن يگى نىشان دەپ بىلەمىن. باسقالاي ايتقاندا، ءوڭىردى وركەندەتۋ وركەنيەتكە باستاۋ بولار قادام دەپ ايتۋعا بولادى.

وڭىرلەرگە ساپارىمىز كەزىندە تۇرالاعان ماسەلەلەر وتە كوپ ەكەنىنە كۋا بولامىز. جول، اۋىز سۋ، جايىلىمدىق جەر، شاعىن جانە ورتا بيزنەس ماسەلەلەرى ءجيى كوتەرىلەدى. پرەزيدەنتتىڭ وڭىرلەرگە ءجيى بارۋى، قاراپايىم حالىقپەن كەزدەسۋى ەل ىنتىماقتاستىعىن نىعايتۋعا جول اشاتىنى ءسوزسىز.

 

مۇرات باقتيار ۇلى،

سەنات دەپۋتاتى

سوڭعى جاڭالىقتار

بۇگىنگى ۆاليۋتا باعامى

قارجى • بۇگىن، 09:55

ۇقساس جاڭالىقتار