قوعام • 03 قازان، 2022

«استانا بالەت» تەاترى ۇزدىك رەتسەنزياعا بايقاۋ جاريالادى

48 رەت كورسەتىلدى

«استانا بالەت» تەاترى كورەرمەندەر اراسىندا «تىرناق الدى تۋىندى» اتتى رەتسەنزيا بايقاۋىن جاريالادى، دەپ حابارلايدى Egemen.kz.

بايقاۋ ناتيجەسى 31-ءشى قازاندا تەاتردىڭ سايتى مەن الەۋمەتتىك جەلىلەرىندە جاريالانادى. جەڭىمپازعا 100 000 تەڭگە كولەمىندە اقشالاي جۇلدە مەن سپەكتاكلدەردى تاماشالاۋعا ابونەمەنت بەرىلەدى.

بايقاۋدىڭ نەگىزگى ماقساتى – دارىندى بالەت سىنشىلارىن انىقتاپ، قولداۋ كورسەتۋ. ولاردىڭ شىعارماشىلىق الەۋەتىن ارتتىرىپ، بايقاۋعا قاتىسۋشىلاردى وتاندىق مادەنيەت پەن ونەردىڭ ۇزدىك تۋىندىلارىمەن تانىستىرۋ.

بايقاۋعا قاتىسۋ ءۇشىن تەاتردىڭ ينستاگرام اككاۋنتىنا تىركەلۋ قاجەت. بايقاۋعا قاتىسۋشىعا تەاتردىڭ رەپەرتۋارىنداعى ەكى ءبىر اكتىلى بالەتتىڭ ءبىرىن تاڭداپ، كورۋ مۇمكىندىگى بەرىلەدى. سپەكتاكلدەر جايلى انىقتاما مالىمەتتەرى (قويىلىم توبى، بالەتتىڭ سيپاتتاماسى) astanaballet.com رەسمي سايتىندا ورنالاستىرىلعان.

«استانالىق تەاتر شىعارماشىلىعىنىڭ جانكۇيەرى بولساڭىز، سپەكتاكلدەردى ءجيى كورىپ، ءوز ويىڭىزبەن، العان اسەرىڭىزبەن بولىسكىڭىز كەلسە «تىرناق الدى تۋىندى» («پروبا پەرا») بايقاۋىنا قاتىسۋدى ۇسىنامىز. كورگەن سپەكتاكلىڭىز جايلى وي قورىتىپ، العان اسەرىڭىزدى، ارتىستەردىڭ ونەرى، ساحنا كەڭىستىگىنىڭ بەزەندىرىلۋى، ورىندالعان مۋزىكا جايلى ويىڭىزدى قاعاز بەتىنە ءتۇسىرىڭىز. سپەكاتكلدى مەيلىنشە ءدال، تولىق ءارى قىزىقتى سۋرەتتەۋگە تىرىسىڭىز. پىكىرىڭىزبەن تانىسقان وقىرمان – كورەرمەن زالىندا جانىڭىزدا وتىرىپ، ساحناداعى كورىنىستى بىرگە تاماشالاعانداي اسەر السىن»، دەلىنگەن تەاتر حابارلاماسىندا.

بايقاۋ بارىسىندا 3500 - 7000 بەلگىدەن تۇراتىن ءتولتۋما رەتسەنزيالار ىرىكتەلەدى. رەتسەنزيالار 2022 جىلعى 1-25 قازان ارالىعىندا pressa@astanaballet.kz پوشتاسىنا «تىرناق الدى تۋىندى»  دەگەن تاقىرىپ قويىپ جولداۋ قاجەت.

بايقاۋ جەڭىمپازىن ىرىكتەۋ كوميسسياسى انىقتايدى. كوميسسيا قۇرامىندا ديرەكتوردىڭ ورىنباسارى ۆالەري كۇزەمباەۆ، كوركەمدىك جەتەكشى نۇرلان كانەتوۆ جانە باس بالەتمەيستەر مۋكارام اۆاحري بار. جەڭىمپازدىڭ رەتسەنزياسى اۆتوردىڭ ەملەسى مەن تىنىس بەلگىلەرىن ساقتاي وتىرىپ، تەاتردىڭ سايتىندا جاريالانادى.

سوڭعى جاڭالىقتار

QazaqGaz ديرەكتورلار كەڭەسىنىڭ قۇرامى وزگەردى

قازاقستان • 02 جەلتوقسان، 2022

ماۋلەن اشىمباەۆ قىتاي حالقىنا كوڭىل ايتتى

پارلامەنت • 02 جەلتوقسان، 2022

ۇقساس جاڭالىقتار