ايماقتار • 01 قازان، 2022

الماتىدا «قىتايدىڭ الەمدىك مۇرا نىساندارى» حالىقارالىق كورمەسى باستالدى

98 رەت كورسەتىلدى

ەلدىگىمىزدىڭ ەجەلگى تاريحىنان باستاپ، تاۋەلسىزدىك بەدەرىندەگى بار جادىگەرلەرىمىزدى جيناقتاپ، كوزدىڭ قاراشىعىنداي ساقتاپ وتىرعان الماتىداعى مەملەكەتتىك ورتالىق مۋزەيى 17 جىلدان بەرى ۇزبەي قىتاي حالىق رەسپۋبليكاسىنىڭ باس كونسۋلدىعىمەن قويان-قولتىق جۇمىس ىستەپ كەلەدى، دەپ جازادى Egemen.kz.

مۋزەيدە ەكى ەلدىڭ تاتۋلىعىنا  قىزمەت ەتەتىن ديپلوماتيالىق ءىس-شارالار شەڭبەرىندە ءتۇرلى كورمەلەر مەن مادەني ءىس-شارالار ءوتىپ جاتادى.  

بۇل جولى مەملەكەتتىك ورتالىق مۋزەيى قحر باس كونسۋلدىعىمەن بىرلەسىپ، قىتاي حالىق رەسپۋبليكاسىنىڭ قۇرىلعان كۇنىنە وراي، «قىتايدىڭ الەمدىك مۇرا نىساندارى» اتتى حالىقارالىق فوتوكورمەسىنىڭ تۇساۋىن كەستى.

قىتاي – قايتالانباس تاريحي ەسكەرتكىشتەرى ساقتالعان ەجەلگى وركەنيەت پەن وزىندىك مادەنيەتتىڭ ەلى. بۇل ەلدىڭ تاريحي جادىگەرلەرى بۇكىل ادامزاتقا ورتاق ەسكەرتكىش رەتىندە عالامات اۋقىمىمەن تاڭ قالدىرادى. وعان قوسا تابيعات الۋاندىعى دا كورگەن ادامدى ءتانتى ەتپەي قويمايدى.

سونىمەن «قىتايدىڭ الەمدىك مۇرا نىساندارى» كورمەسىنەن يۋنەسكو-نىڭ بۇكىلالەمدىك مۇرالارى تىزىمىنە ەنگەن قىتايدىڭ تاريحي جانە مادەني ەسكەرتكىشتەرىنىڭ سۋرەتتەرى ورىن الدى.

كەلۋشىلەر نازارىنا « ۇلى قىتاي قابىرعاسى»، «يمپەراتور تسين ءشيحۋانديدىڭ قابىرى مەن تەرراكوتالىق مۇسىندەر»، «ۋدانشان تاۋلارىنداعى ەجەلگى عيماراتتار كەشەنى»، ەجەلگى ليتسزيان قالاسى، تسيۋيفۋداعى كونفۋتسي عيباداتحاناسى، «موگاو ۇڭگىرلەرى»، «لۋشان ۇلتتىق پاركى»، «سۋچجوۋ قالاسىنداعى كلاسسيكالىق باقتار»، «داتسزۋدىڭ جارتاستاعى رەلەفتەرى» سياقتى عالامات فوتولار ۇسىنىلدى.

كورمەگە ەجەلگى وركەنيەتتىڭ ءىنجۋ-مارجاندارىنىڭ 59 استام فوتوسۋرەتى قويىلعان. بۇل سۋرەتتەردى تانىمال قىتاي فوتوگرافتارى – چجوۋ تسزيانيەن، سۋن چجيتسزيۋن، تان مين سىندى تالانتتى ادامدار تۇسىرگەن.

كورمەنىڭ رەسمي اشىلۋ سالتاناتىندا ەكى ەلدىڭ ديپلوماتيالىق كورپۋسىنىڭ وكىلدەرى مەن قالا جاستارى دا قاتىسىپ، قر مەملەكەتتىك ورتالىق مۋزەيىنىڭ ديرەكتورى راشيدا حاريپوۆا، قىتاي حالىق رەسپۋبليكاسىنىڭ باس كونسۋلى تسزيان ۆەي   ءسوز سويلەيدى.

«ورتالىق مەملەكەتتىك مۋزەيى ءاردايىم قىتاي ەلىمەن مادەنيەت الماسۋدى ىقىلاسپەن اتقارادى. قىتايدىڭ ايتۋلى كۇندەرى مەن مەرەكەلەرىنە جانە قىتاي مەن قازاقستاننىڭ قارىم-قاتىناسىنا ارنالعان تاقىرىپتىق كورمەلەر وتكىزۋ داستۇرىمىزگە اينالدى. وسى فوتوكورمە قحر-دىڭ 73 جىلدىعى مەن قىتاي-قازاقستان ديپلوماتيالىق بايلانىستارىنىڭ 30 جىلدىعىنا ارنالىپ وتىر. قازىرگى تاڭدا يۋنەسكو-نىڭ بۇكىلالەمدىك مادەني مۇرالارىنىڭ تىزىمىنە قىتايدىڭ 55 نىسانى ەنگەن. بۇل جادىگەرلەر – قىتاي ەلىنە عانا ەمەس، بۇكىل الەمگە، ادامزات بالاسىنا ورتاق. مەن وسى كورمەنىڭ ارقاسىندا قازاقستاندىق دوستارىمىز قىتاي تۋرالى كوبىرەك ءبىلىپ، ادام جانى مەن مادەنيەتىن تىلدەستىرە الاتىن تاماشا ديالوگ تابادى دەپ ۇمىتتەنەمىن»، دەيدى قىتاي حالىق رەسپۋبليكاسىنىڭ باس كونسۋلى تسزيان ۆەي  حانىم.

باس كونسۋل تسزيان ۆەي  حانىم وسى 30 جىلدا ەكى ەلدىڭ بارىس-كەلىسى مەن الىس-بەرىسى ىرعاقتى ارناعا تۇسكەنىن، ءوزارا سەنىم مەن دوستىق بايلانىستار جاڭا بەلەسكە كوتەرىلگەنىن اتاي كەلە:

«وسىدان ەكى اپتا بۇرىن عانا توراعا سي تسزينپين قازاقستانعا مەملەكەتتىك ىسساپارمەن كەلدى. بۇل قىتاي باسشىسىنىڭ پاندەميادان كەيىنگى العاشقى شەتەلدىك ءىسساپارى ەكىجاقتى بايلانىستاردىڭ ءمانى تاريحي ماڭىزدىلىققا يە ەكەندىگىنە ايعاق بولا الادى. وسى وقيعا بارىسىندا ەكى مەملەكەتتىڭ باسشىسى «قازاقستان – قىتاي: مىڭجىلدىقتاردىڭ تىلدەسۋى» كورمەسىنە باردى. وسى كورمەدەگى ەكسپوناتتاردىڭ ءبىر بولىگى قر ورتالىق مەملەكەتتىك مۋزەيى مەن ونەر مۋزەيىنەن الىندى. وسىناۋ كورمە كوشباسشىلارىمىزدىڭ مادەني-گۋمانيتاردىق ارىپتەستىككە ۇلكەن ءمان بەرەتىنىنە كۋا بولا الادى.

مەن بارلىق كەزدە ادامداردىڭ جان دۇنيەسىن جاقىنداتۋ ەلدەردىڭ دوستىق بايلانىستارىن نىعايتۋدا ماڭىزدى ءرول اتقاراتىنىنا سەنىمدىمىن. باس كونسۋل رەتىندە دە ماڭىزدى مىندەتىم – ەكى حالىقتىڭ تۇسىنىستىگى مەن تاتۋلىعىن بەكەمدەۋ. جانە بۇل ديپكورپۋستاعى ءاربىر ارىپتەسىمە ورتاق ميسسيا. كەلەشەكتە دە باس كونسۋلدىق قازاقستاندىق دوستارىمىزبەن بىرگە مۇنان دا قىزىقتى ءارى ىنتىماقتاستىققا مۇددەلى تاماشا مەرەكەلەرگە مۇرىندىق بولۋعا دايىن»، دەدى قىتاي حالىق رەسپۋبليكاسىنىڭ باس كونسۋلى تسزيان ۆەي.

«قىتايدىڭ الەمدىك مۇرا نىساندارى» حالىقارالىق فوتوكورمەسى 12 قازانعا دەيىن جالعاسادى.

سوڭعى جاڭالىقتار

بۇگىنگى ۆاليۋتا باعامى

قارجى • بۇگىن، 09:55

ۇقساس جاڭالىقتار