جاندوس ومىراليەۆ وتاندىق اقپاراتتىق كەڭىستىكتە جانە الەۋمەتتىك مەديادا ءتۇرلى تاقىرىپتار بويىنشا كورىنەۋ جالعان اقپارات تاراتۋ جاعدايلارى جيىلەپ كەتكەنىن ايتتى.
ونىڭ ايتۋىنشا, جەلىدەگى كەيبىر بلوگەرلەردىڭ ارانداتۋشىلىق مالىمدەمەلەرى پايدالانۋشىلاردىڭ ۇلتتىق ارازدىقتى تۋدىراتىن بەلگىلەرى بار پىكىرلەرىن جاريالاۋعا نەگىز بولادى.
«ناقتى ازاماتتاردىڭ ار-نامىسى مەن قادىر-قاسيەتىنە نۇقسان كەلتىرەتىن, سونداي-اق بىرقاتار تانىمال تۇلعانى ۇستاۋ جانە قىلمىستىق جاۋاپكەرشىلىككە تارتۋ تۋرالى جالعان حابارلامالار تارادى. مۇنداي جالعان اقپاراتتى ورنالاستىراتىن بلوگەرلەر قاساقانا, ءوز مۇددەلەرى ءۇشىن جانە ءۇشىنشى تۇلعالاردىڭ مۇددەلەرى ءۇشىن ارەكەت ەتەدى. ولاردىڭ ماقساتى - جەكە بايىتۋ جانە قاراجاتتى بوپسالاۋ ارقىلى ماتەريالدىق پايدا الۋ. ۇلتتىق ارازدىقتى قوزدىرۋعا, قورقىتۋعا, كورىنەۋ جالعان اقپارات تاراتۋعا باعىتتالعان ءىس-ارەكەتتەر قازاقستان رەسپۋبليكاسى قىلمىستىق كودەكسىنىڭ 174, 194 جانە 274-باپتارى بويىنشا قىلمىستىق جاۋاپتىلىققا اكەپ سوعادى», دەپ قوستى باس پروكۋروردىڭ ورىنباسارى.
وسىعان بايلانىستى, قازاقستان رەسپۋبليكاسىنىڭ باس پروكۋراتۋراسى ەل ازاماتتارىن, بۇقارالىق اقپارات قۇرالدارىنىڭ وكىلدەرىن, الەۋمەتتىك جەلىلەردىڭ پايدالانۋشىلارىن زاڭنامانى بۇلجىتپاي ساقتاۋعا جانە جوعارىدا كەلتىرىلگەن كەز كەلگەن قۇقىق بۇزۋشىلىقتاردىڭ جاسالۋىنا جول بەرمەۋگە, ارانداتۋشىلىققا بوي بەرمەۋگە جانە تەك رەسمي اقپارات كوزدەرىنە سەنۋگە شاقىرادى.
