«سىزدەردى قازاقستاندا قارسى العانىما شىن جۇرەكتەن قۋانىشتىمىن. پروكۋراتۋرا قىزمەتى زاڭدىلىق پەن قۇقىق ۇستەمدىگىن قامتاماسىز ەتۋدە, ادىلەتتى قوعام قۇرۋدا ماڭىزدى ءرول اتقارادى. وسى تۇرعىدا قازاقستان شىۇ مەملەكەتتەرى قاداعالاۋ ورگاندارىنىڭ كوپجىلدىق ىنتىماقتاستىعىن جوعارى باعالايدى. ترانسۇلتتىق قىلمىسقا قارسى ءىس-قيمىل شىۇ-نىڭ نەگىزگى مىندەتتەرىنىڭ ءبىرى سانالادى. ونى شەشۋ وڭىرلىك قاۋىپسىزدىكتى نىعايتۋعا ىقپال ەتەدى», دەپ جازدى پرەزيدەنت قۇتتىقتاۋ حاتىندا.
مەملەكەت باسشىسىنىڭ ايتۋىنشا, بۇگىندە ەلدەن زاڭسىز شىعارىلعان قاراجاتتى قايتارۋ وزەكتى ماسەلە بولىپ وتىر.
«20-شى مەرەيتويلىق وتىرىستىڭ كۇن تارتىبىنە زاڭسىز شىعارىلعان قاراجاتتى قايتارۋ بويىنشا تاجىريبە الماسۋ ماسەلەسى ەنگىزىلدى. بۇل ماسەلە شىۇ-نى جاھاندىق ەكونوميكالىق پلاتفورماعا اينالدىرۋ پەرسپەكتيۆالارى سالاسىندا ەرەكشە وزەكتى بولىپ وتىر. شىۇ اياسىندا ءوزارا ءتيىمدى ارىپتەستىكتىڭ زور الەۋەتىن تولىققاندى پايدالانۋ كوپ جاعدايدا ترانسۇلتتىق ەكونوميكالىق قىلمىسقا قارسى كۇرەس جونىندەگى بىرلەسكەن كۇش-جىگەردىڭ تيىمدىلىگىنە بايلانىستى ەكەنى انىق. بۇگىن ناتيجەلى پىكىر الماسۋ ءوتىپ, وسى باعىتتاعى جاڭا تاسىلدەر ازىرلەنەدى دەپ سەنەمىن. وتىرىسقا قاتىسۋشىلارعا قويىلعان مىندەتتەردى شەشۋدە تابىس تىلەيمىن», دەدى قاسىم-جومارت توقاەۆ.
