قر يدم اۆتوموبيل جولدارى كوميتەتى مەن «قازاقستان جول عىلىمي-زەرتتەۋ ينستيتۋتى» اق-نىڭ ۇيىمداستىرۋىمەن وتكەن كوشپەلى سەمينار-ترەنينگكە جول قۇرىلىسىن جوبالاۋ جانە قىزمەت كورسەتۋ سالالارىنداعى مەكەمەلەر مەن ماماندار قاتىستى. سونىمەن قاتار باسقوسۋعا عالىمدار, مەردىگەر كومپانيا وكىلدەرى مەن كاسىپكەرلەر, «قازاۆتوجول» ۇك, «جول اكتيۆتەرىنىڭ ۇلتتىق ساپا ورتالىعى» قىزمەتكەرلەرى جانە وبلىس اكىمدىكتەرىنىڭ ماماندارى دا شاقىرىلدى.
جيىن بارىسىندا اۆتوموبيل جولدارى كوميتەتىنىڭ توراعاسى تولەگەن ابدۋللين سەمينار مەملەكەت باسشىسىنىڭ 2025 جىلعا دەيىن جولداردىڭ ساپاسىن جاقسارتۋ جونىندەگى تاپسىرماسىن ىسكە اسىرۋ شەڭبەرىندە يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆتىڭ باستاماسىمەن ۇيىمداستىرىلىپ وتىرعانىن جەتكىزدى.
«پرەزيدەنت اۆتوموبيل جولدارى سالاسىنا ەرەكشە ءمان بەرەدى. قاسىم-جومارت توقاەۆ قازاقستان حالقىنا ارناعان بيىلعى جولداۋىندا جەرگىلىكتى ماڭىزى بار جولدارعا جەتە نازار اۋدارىپ, بۇل تاراپتاعى بىرقاتار ماسەلەنى اتاپ ءوتتى. ارينە, ايماقتاردا ءتۇيىنى تارقاتىلماعان تۇيىتكىلدى جاعداياتتار بارشىلىق. وسى ورايداعى ماسەلەلەردى وڭتايلى شەشۋ ءۇشىن بۇگىنگى جيىن وتكىزىلىپ وتىر. باسقوسۋعا وتاندىق جانە شەتەلدىك جول سالاسىنىڭ بىلىكتى ماماندارى قاتىسۋدا», دەدى تولەگەن ابدۋللين.
سەمينار-ترەنينگ جۇمىسى «جەر قىرتىسىنىڭ تومەنگى قاباتى جانە نەگىزى», «جول جابىنى», «جولدى كۇتىپ ۇستاۋ جانە جوندەۋ», «جولداعى قاعيدالار مەن جول قوزعالىسىنىڭ قاۋىپسىزدىگى», «كوپىر قۇرىلىسى جانە ونى جوندەۋ جۇمىستارى كەزىندە قولدانىلاتىن ماتەريالدار مەن جاڭا تەحنولوگيالار» باعىتتارى بويىنشا جۇرگىزىلدى. ءاربىر بولىمدە جول ينفراقۇرىلىمى مەن نىسانىنىڭ قىزمەت كورسەتۋ مەرزىمىن ۇزارتۋعا جانە ونىڭ ونىمدىلىك سيپاتتامالارىن جاقسارتۋعا سەپتەسەتىن يننوۆاتسيالىق ماتەريالدار مەن قۇرىلىس جۇمىستارىن جىلدامداتۋعا ىقپال ەتەتىن زاماناۋي تاسىلدەر جان-جاقتى قاراستىرىلدى.
اسىرەسە, كوپشىلىك تاراپىنان جولدىڭ توسەنىشتىك قاباتىنىڭ بەرىكتىگىن قامتاماسىز ەتەتىن ماتەريالدار قىزىعۋشىلىق تۋعىزدى. سونىمەن قاتار جول بيتۋمىنىڭ ساپاسىن ارتتىرىپ, ونى قازاقستاننىڭ ءتۇرلى كليماتتىق جاعدايلارىنا بەيىمدىگىن قامتاماسىز ەتەتىن موديفيكاتسيالىق اسفالتبەتون جابىنىنا دا ۇلكەن ىقىلاس تانىتىلدى.
جيىن اياسىندا رەسەيلىك جول قۇرىلىسى سالاسىنداعى ماماندار اسفالتبەتوندى جىلدىڭ سۋىق مەزگىلىندە توسەۋگە ارنالعان ەرەكشە قوسپانى تانىستىردى. بۇل ماتەريال ەلىمىزدىڭ كليماتىنا سايكەس كەلەدى جانە جول قۇرىلىسى ماۋسىمىن ۇزارتۋعا ەداۋىر سەپتەسەدى. اتالعان قوسپانى قولدانۋ ارقاسىندا جول قۇرىلىسىن جۇرگىزەتىن كومپانيالار سۋىق اۋا-رايىندا جول جابىنىن ەشقانداي كەدەرگىسىز ساپالى تۇردە توسەۋگە مۇمكىندىك الماق.
ايتا كەتەرلىگى, «جول قۇرىلىسىنداعى يننوۆاتسيالىق تەحنولوگيالار مەن ماتەريالدار» سەمينار-ترەنينگى جول-قۇرىلىسى ۇيىمدارى مەن ىسكەر توپ وكىلدەرىنىڭ ءوزارا تىعىز قارىم-قاتىناس ورناتۋعا ەلەۋلى ىقپالىن تيگىزدى.
«قازاقستان جول عىلىمي-زەرتتەۋ ينستيتۋتى» اق پرەزيدەنتى ارمان اليباەۆانىڭ ايتۋىنشا, باسقوسۋ شەڭبەرىندە بىرقاتار كەلىسىمگە قول جەتكىزىلىپ, جول-قۇرىلىسى جۇمىستارىنىڭ ساپاسىن ارتتىرۋ باعىتىندا يننوۆاتسيالىق جاڭاشىلدىقتاردى قولدانۋ اياسى ارتتى. سونداي-اق ول الداعى ۋاقىتتا وسى تاقىلەتتەس سەمينارلار تۇراقتى تۇردە وتكىزىلىپ تۇراتىنىن جەتكىزدى.
