توتەنشە جاعدايلار ءمينيسترى يۋري يلين بيىلعى كوكتەمدە ەلدى مەكەندەردى سۋ باسۋدىڭ نەگىزگى سەبەبى ەگىستىكتەردەن ەرىگەن قار مەن جاڭبىر سۋلارىنىڭ مول اعۋى ەكەنىن ايتتى. بۇل ورايدا سۋ تاسقىنىنا قارسى ءىس-شارالاردى ۋاقىتىلى جۇرگىزۋ ارقىلى عانا تج تۋىنداۋ تاۋەكەلىن تومەندەتۋگە بولادى.
ونىڭ ايتۋىنشا, قازىرگى ۋاقىتتا سۋ تاسقىنى قاۋپى بار ەلدى مەكەندەردىڭ تىزىمىنە تۇزەتۋ ەنگىزىلدى, ولاردىڭ سانى 1 046-عا دەيىن ارتتى. سونىمەن قاتار اكىمدىكتەر ءتيىستى ءىس-شارالاردى قارجىلاندىرۋ ماسەلەسىن ەلەمەي وتىر, وسىعان بايلانىستى ءىس-شارالار ۋاقىتىلى ورىندالماي قالۋى مۇمكىن.
وڭىرلەردە جول كارتاسى ءىس-شارالارىنىڭ ىسكە اسىرىلۋ بارىسى تۋرالى تۇركىستان وبلىسىنىڭ اكىمى دارحان ساتىبالدى, باتىس قازاقستان وبلىسىنىڭ اكىمى عالي ەسقاليەۆ جانە اقتوبە وبلىسىنىڭ اكىمى ەرالى توعجانوۆ باياندادى.
پرەمەر-مينيستر جول كارتاسىنىڭ وسى جىلعا ارنالعان ءىس-شارالارىن ىسكە اسىرۋ جونىندەگى جۇمىستاردى اياقتاۋدى جەدەلدەتۋدى, سۋ باسىپ قالاتىن قاۋىپتى جەرلەردى عيماراتتار سالۋعا بەرىپ قويماۋ ءۇشىن ولاردى سۋدان قورعاۋ بەلدەۋلەرىنە ۋاقىتىلى اۋىستىرۋدى قامتاماسىز ەتۋدى, سونداي-اق ءتيىستى قۇرىلىس نورمالارى مەن ەرەجەلەرىندە جاۋىن-شاشىن كارىزدەرى جۇيەلەرىنىڭ وتكىزۋ قابىلەتى نورمالارىن قايتا قاراۋدى تاپسىردى.
«كەلەسى كوكتەمدە سۋ تاسقىنىنا دايىن بولۋ ءۇشىن قازىردەن-اق قوماقتى قارجى شىعىندارىن قاجەت ەتپەيتىن الدىن الۋ جۇمىستارىن جۇرگىزۋ كەرەك. ياعني وزەن ارنالارىن, ارىقتار مەن كانالداردى, درەناج جۇيەلەرىن تازارتۋ, قورعاۋ بوگەتتەرىن سالۋ جانە گيدروتەحنيكالىق قۇرىلىستاردى دايىنداۋ جۇمىستارىنا باسا نازار اۋدارۋ كەرەك. جالپى ءوڭىر اكىمدەرى سۋ تاسقىنىنىڭ زارداپتارىن ازايتۋ ماسەلەلەرىن جەكە باقىلاۋدا ۇستاۋى ءتيىس», دەدى ۇكىمەت باسشىسى.
