ء«بىزدىڭ مىندەتىمىز – ءاربىر ازاماتتى ساپالى ءارى قولجەتىمدى مەديتسينالىق كومەكپەن قامتاماسىز ەتۋ. ول ءۇشىن دەنساۋلىق ساقتاۋ نىساندارىن سالۋعا, مەديتسينالىق قۇرال-جابدىقتار ساتىپ الۋعا, زاماناۋي تەحنولوگيالاردى ەنگىزۋگە, كادرلاردى دايارلاۋعا قوماقتى قارجى بولىنۋدە. قىمبات مەديتسينالىق تەكسەرۋلەر قولجەتىمدى بولدى. ونىڭ ىشىندە ماگنيتتى-رەزونانستى توموگرافيا, كومپيۋتەرلىك توموگرافيا تەكسەرۋلەرى قولجەتىمدى بولدى», دەدى پرەمەر-مينيستر ۇكىمەت وتىرىسىندا.
سونداي-اق ۇكىمەت باسشىسى وتكەن جىلى ورتالىق ازيا ەلدەرىندە اۋرۋلاردى راديوحيرۋرگيالىق جولمەن ەمدەۋگە ارنالعان العاشقى گامما-پىشاق ورتالىعى اشىلعانىن ەسكە سالدى.
«مەديتسينا قىزمەتكەرلەرىنىڭ جالاقىسى ايتارلىقتاي ءوستى. بيىل دارىگەرلەردىڭ ورتاشا جالاقىسى 420 مىڭ تەڭگەنى, ورتا مەديتسينا قىزمەتكەرلەرىنىڭ جالاقىسى 234 مىڭ تەڭگەنى قۇرادى. دارىگەر ماماندىعى تارتىمدى ءارى بەدەلدى بولىپ كەلەدى», دەدى ءاليحان سمايىلوۆ.
پرەمەر-مينيستر سونداي-اق مەملەكەت باسشىسىنىڭ تاپسىرماسى بويىنشا «اۋىلدىق دەنساۋلىق ساقتاۋدى جاڭعىرتۋ» پيلوتتىق جوباسى ازىرلەنىپ جاتقانىن ايتتى. 2025 جىلعا قاراي اۋىلدىق جەرلەردە 650 العاشقى مەديتسينالىق-سانيتارلىق كومەك كورسەتۋ نىسانىن سالۋ جوسپارلانۋدا. سونداي-اق ولار 32 اۋداندىق اۋرۋحانانى جاڭعىرتۋدان وتكىزەدى.
ءاليحان سمايىلوۆ اتاپ وتكەندەي, بۇل جۇيەلى شارالار دەنساۋلىق ساقتاۋدىڭ ساپاسى مەن قولجەتىمدىلىگىن ارتتىرۋعا باعىتتالعان.
