ءاليحان سمايىلوۆ قازاقستان مەن ءباا اراسىندا سىندارلى ساياسي ديالوگ ورناتىلعانىن جانە ەكىجاقتى ىنتىماقتاستىقتىڭ جوعارى دەڭگەيىنە قول جەتكىزىلگەنىن اتاپ ءوتتى. ۇكىمەت باسشىسىنىڭ ايتۋىنشا, وعان ەڭ جوعارى دەڭگەيدەگى تۇراقتى بايلانىستار ىقپال ەتىپ وتىر.
«بىرىككەن اراب امىرلىكتەرى – قازاقستاننىڭ وڭىردەگى نەگىزگى ساۋدا-ەكونوميكالىق سەرىكتەسى. امىرلىكتەر ءبىزدىڭ ەلمەن تاۋار اينالىمى بويىنشا اراب ەلدەرى اراسىندا كوش باستاپ تۇر», دەدى پرەمەر-مينيستر.
ماسەلەن, 2021 جىلدىڭ قورىتىندىسى بويىنشا ءوزارا تاۋار اينالىمى $709 ملن بولدى, بۇل كورسەتكىش وتكەن جىلمەن سالىستىرعاندا 50%-عا جۋىق ارتتى.
«بۇل – جاقسى ناتيجە, الايدا ءبىز ءوزارا ساۋدا نومەنكلاتۋراسىن ودان ءارى كەڭەيتۋ بويىنشا بىرلەسىپ كۇش-جىگەر جۇمساي الامىز», دەدى ءاليحان سمايىلوۆ.
سونىمەن قاتار ۇكىمەت باسشىسى سوڭعى جىلدارى ءباا-دەن قازاقستانعا ينۆەستيتسيالاردىڭ جۇيەلى تۇردە ءوسىپ كەلە جاتقانىن اتاپ ءوتتى. وتكەن جىلدىڭ قورىتىندىسى بويىنشا بۇل كورسەتكىش 43%-عا ءوسىپ, $250 ملن-عا جەتتى. بۇل ترەند بيىل دا ساقتالىپ وتىر.
ء«بىز تاۋ-كەن مەتاللۋرگيا كەشەنى, اۋىل شارۋاشىلىعى, مۇناي حيمياسى, ەنەرگەتيكا, گەولوگيا سياقتى سالالاردا ينۆەستيتسيالىق ىنتىماقتاستىقتى ارتتىرۋ جانە تەرەڭدەتۋ ءۇشىن ايتارلىقتاي الەۋەتتى بايقاپ وتىرمىز. اتالعان سالالار ءبىزدىڭ ستراتەگيالىق ماقساتتارىمىزعا ساي كەلەدى», دەدى ءاليحان سمايىلوۆ.
وسىعان بايلانىستى شەيح مانسۋر بەن زايد ءال ناحايانعا جالپى سوماسى $6,5 ملرد-تان اساتىن پەرسپەكتيۆالىق ينۆەستيتسيالىق جوبالاردىڭ ءتىزىمى قاراۋعا بەرىلدى. بۇل رەتتە ونەركاسىپتەگى, ەنەرگەتيكاداعى, بانك سەكتورىنداعى جانە اۋىل شارۋاشىلىعىنداعى, ونىڭ ىشىندە بىرلەسكەن ۆەنچۋرلىك قور قۇرۋ, قانت زاۋىتىن سالۋ جانە كالتسي قوسىلعان سودا ءوندىرىسىن ىسكە قوسۋ بويىنشا ەڭ ءىرى بەس جوباعا باسا نازار اۋدارىلدى.
«قازاقستان ۇكىمەتى ءباا-مەن بارلىق باعىتتار بويىنشا ءوزارا ءتيىمدى ىنتىماقتاستىقتى تەرەڭدەتۋگە جانە نىعايتۋعا نيەتتى», دەپ تۇيىندەدى ۇكىمەت باسشىسى.
كەزدەسۋ قورىتىندىسى بويىنشا ەكولوگيا, ساۋدا, مادەنيەت جانە ءبىلىم بەرۋ سالالارىندا بىرقاتار ەكىجاقتى ۆەدومستۆوارالىق قۇجاتقا قول قويىلدى. ءوز كەزەگىندە شەيح مانسۋر بەن زايد ءال ناحايان بۇل ساپاردىڭ ەكى ەل اراسىنداعى ىنتىماقتاستىقتى نىعايتۋ ءۇشىن ماڭىزى ەرەكشە ەكەنىن اتاپ كورسەتتى. ول قازاقستاننىڭ ءباا-ءنىڭ ورتالىق ازيا وڭىرىندەگى جەتەكشى ارىپتەستەرىنىڭ ءبىرى ەكەنىن ايتتى.
سونداي-اق بانك سالاسى مەن اۋىل شارۋاشىلىعىندا, ونىڭ ىشىندە قانت جانە ءسۇت ونىمدەرىن ءوندىرۋ بويىنشا بىرلەسكەن جوبالاردى ىسكە اسىرۋعا مۇددەلى ەكەنىن ءبىلدىردى. شەيح مانسۋر بەن زايد ءال ناحايان قازاقستان ۇكىمەتى باسشىسىنىڭ وسى ساپارى ەكى ەل اراسىنداعى قاتىناستاردى جوعارى دەڭگەيگە كوتەرۋگە ىقپال ەتەتىنىنە سەنىم ءبىلدىردى.
