ماسەلەن, بيىل الماتى وبلىسىنان ەكىنشى جاس تالاپ «بولاشاق» باعدارلاماسى بويىنشا گرانت يەگەرى اتانىپ وتىر. ءسال بۇرىنىراقتا جامبىل اۋدانىنا قاراستى ۇزىناعاش اۋىلىنداعى ورتا مەكتەپتىڭ ماتەماتيكا ءپانىنىڭ مۇعالىمى گۇلزيا قۇمانحان «بولاشاق» باعدارلاماسى بويىنشا شەتەلدە وقۋعا قول جەتكىزگەن بولاتىن. ول ەندى امەريكانىڭ جەتەكشى وقۋ ورىندارىنىڭ ءبىرى – وڭتۇستىك فلوريدا ۋنيۆەرسيتەتىندە وقيدى.
– اۋىلدا تۋىپ-ءوسىپ, مەكتەپ ءبىتىردىم. ۇزدىك وقىپ, جوعارى ءبىلىم الدىم. ودان اۋىلعا ورالىپ, مەكتەپتە ساباق بەردىم. بالا كۇنگى ارمانىما وسىلايشا جەتتىم. شاكىرت تاربيەلەپ ءجۇرىپ, زاماننىڭ كوز الدىڭىزدا وزگەرىپ, تۇرلەنىپ وتىرعانىن اڭعاراسىز. ۋاقىتقا ىلەسۋ ءۇشىن ىزدەنىس قانا ەمەس, تاجىريبە دە قاجەت ەكەنىن ۇعاسىز. ونى دامىعان ەلدەردەن ۇيرەنۋدى ويلايسىز, وسىلاي وي ارمانعا اينالادى. مەنىڭ «بولاشاق» ستيپەندياسىنا قۇجات تاپسىرۋىما وسى ارمانىم تۇرتكى بولدى. دايىندالدىم, الدىمەن اعىلشىن ءتىلىن ۇيرەنۋگە كۇش سالدىم. اۋەلى ينتەرنەت جەلىسىندەگى ونلاين ساباقتىڭ كومەگىمەن اعىلشىن ءتىلىنىڭ باستاپقى دەڭگەيىن مەڭگەردىم, سوسىن ارنايى كۋرستان ءوتىپ جوعارى دەڭگەيگە ءوتتىم. ەرىنبەي, شەت ءتىلىن كۇنىنە 5-6 ساعات بويى وقىدىم. بار ويىم IELTS ەمتيحانىنان جوعارى باعا الۋ بولدى. بۇيىرىپ, ءتيىستى 9 ۇپايدىڭ جەتەۋىن جينادىم, – دەيدى گۇلزيا.
ال كۇنى كەشە الماتى وبلىسىنىڭ قاراساي اۋدانىنا قاراستى جىبەك جولى اۋىلىنداعى ورتا مەكتەپتىڭ ماتەماتيكا ءپانىنىڭ مۇعالىمى مارجان ەرجان «بولاشاق» باعدارلاماسى بويىنشا اقش-تاعى جوعارى وقۋ ورنىنىڭ دوكتورانتۋراسىندا وقيتىن بولدى. ياعني ەندى اۋىلدان شىققان «بولاشاق» ستيپەنديانتى وڭتۇستىك كاليفورنيا ۋنيۆەرسيتەتىندە ءبىلىم سالاسىنداعى باسقارۋدى زەرتتەيدى.
– اتا-انامنىڭ جولىن قۋىپ, ۇستاز بولسام دەگەن ارمان پايدا بولدى. اۋىل مەكتەبىندە ماتەماتيكادان ساباق بەرەمىن, كوپبالالى وتباسىنان بالالارعا اعىلشىن ءتىلىن تەگىن ۇيرەتەمىن. ءوزىم دە اۋىل مەكتەبىن ءبىتىردىم. شەتەلدە وقۋعا مۇمكىندىگىم بولادى دەپ ويلاماپپىن. «بولاشاق» باعدارلاماسى ارقىلى وتانداستارىمىز الەمنىڭ ۇزدىك جوعارى وقۋ ورىندارىندا اكادەميالىق ءبىلىم الىپ, عىلىمي دارەجە الۋعا مۇمكىندىك الدى. اقش-تاعى ۋنيۆەرسيتەتتىڭ دوكتورانتۋراسىن بىتىرگەننەن كەيىن ەلىمىزدىڭ ءبىلىم سالاسىن دامىتۋعا ءوز ۇلەسىمدى قوسقىم كەلەدى, – دەيدى مارجان ەرجان.
الماتى وبلىسى
