جىل سايىن جاستاردىڭ باسىن قوساتىن سپورت دوداسى سارقان اۋدانىندا ءوتتى. بۇل يگىلىكتى ءىس-شارا قوجاسباەۆتار وتباسىنىڭ دەمەۋشىلىگىمەن ءارى اۋدان اكىمدىگىنىڭ قولداۋىمەن ۇيىمداستىرىلدى. اتالعان سپورتتىق جارىسقا جەتىسۋ وبلىسىنىڭ تۇكپىر-تۇكپىرىنەن, سونداي-اق الماتى قالاسى مەن الماتى وبلىسىنان 1000 سپورتشى قاتىستى. جارىستىڭ جالپى جۇلدە قورى 7 ملن تەڭگەنى قۇرادى.
سپارتاكيادا باعدارلاماسىنا جاسوسپىرىمدەر اراسىنداعى ەركىن كۇرەس جانە دجيۋ-دجيتسۋ, قول كۇرەسى, ەرلەر اراسىنداعى ۆولەيبول, ەرلەر مەن ارداگەرلەر اراسىنداعى شاعىن فۋتبول, سونداي-اق جالپى مارافون تۇرلەرى كىردى.
ايتا كەتەر بولساق, سارقان اۋدانىندا تۋىپ-وسكەن قوجاسباەۆتار وتباسى اۋداننىڭ قوعامدىق ومىرىنە بەلسەنە اتسالىسىپ, مەملەكەت-جەكەمەنشىك ارىپتەستىگى اياسىنداعى جوبالار مەن بيزنەس-جوبالاردى جۇزەگە اسىرۋعا قولداۋ ءبىلدىرىپ, جەرلەستەرىنە الەۋمەتتىك قولداۋ مەن جاستاردىڭ بۇقارالىق سپورتىن دامىتۋعا ەرەكشە كوڭىل ءبولىپ كەلەدى.
ماسەلەن, سوڭعى جىلدارى قوجاسباەۆتار وتباسى سارقان قالاسىندا 8 سپورت الاڭىن سالىپ بەردى. وبلىستىق ءماسليحاتتىڭ دەپۋتاتى رەتىندە كاسىپكەر رۋسلان قوجاسباەۆ مەتسەناتتىقپەن اينالىسىپ, ءوڭىردىڭ دامۋىنا ءوز ۇلەسىن قوسىپ ءجۇر.
جەتىسۋ وبلىسى
